دێ دانوستاندنێن دناڤبه‌را تالیبان و حوكمه‌تا ئه‌فغانستانێ ده‌ست پی كه‌ن
ئه‌ڤرۆ نیوز:
هنارتیێ تایبه‌تێ ئه‌مریكا بۆ كارۆبارێن ئه‌فغانستانێ راگه‌هاند ئه‌مریكا پێشبینیێ دكه‌ت ل چه‌ند رۆژێن بهێت دانوستاندنێن دناڤبه‌را حوكمه‌تا ئه‌فغانستانێ و رێكخراوا تالیبان ده‌ست پێ بكه‌ن.
زالمای خه‌لیلزاد هنارتیێ تایبه‌تێ ئه‌مریكا بۆ كارۆبارێن ئه‌فغانستانێ راگه‌هاند پێشبینێ دكه‌م ب ڤان نێزیكان پرۆسیسا ئازادكرنا زیندانكریان ب دوماهی بهێته‌كرن و ل چه‌ند رۆژێن بهێت ژی دانوستاندنێن ئاشتیێ دناڤبه‌را كابول و تالیبانێ ده‌ست پێ بكه‌ن، ئه‌و سه‌قایێ نوكه ل ئه‌وی وه‌لاتی دروست بوویی ده‌لیڤه‌كا دیرۆكی یه بۆ مسوگه‌ركرنا ئاگربه‌ستا هه‌رتمی و دوماهی هاتن ب شه‌ری درێژخایه‌نێ ئه‌وی وه‌لاتی.
خه‌لیلزاد ئه‌و چه‌نده ژی دا زانین ئه‌مریكا دڤێت ئه‌فغانستان ب بیته ده‌وله‌ته‌كا دیموكراتی و خودان سه‌روه‌ریا ده‌سه‌لاتا خو هه‌بیت، بریارا ئازادكرنا زیندانیێن تالیبان پێنگاڤه‌كا باش و گرنگ دبیت بۆ بده‌ستڤه ئینانا ئه‌وێ ئارمانجێ.
په‌رله‌مانێ ئه‌فغانستانێ ژی بریارا ئازادكرنا 400 زیندانیێن تونده‌ره‌و سه‌ر ب ریكخراوا تالیبان ڤه په‌سندكر، ئه‌ڤه رێ خوشكه‌ره دبیت بۆ دانوستاندنێن ئاشتیێ دناڤبه‌را تالیبان و حوكمه‌تا ئه‌فغانستانێ ب هه‌ڤكاریا ئه‌مریكا بوویه.
