دێ ژ لايێ به‌نكا نێڤده‌وله‌تى ڤه هێته پشته‌ڤانيكرن
ئەڤرۆ نيوز:
وەزارەتا پەروەردێ یا حوکمەتا ھەرێما کوردستانێ دیار کر، بانکا نێڤدەولەتی دێ ھاریکاریا کەرتێ پەروەردێ ل ھەرێما کوردستانێ کەت و چەند پرۆژان د ڤی واری دا ل ھەرێما کوردستانێ ب جھئینیت، دا کو پرۆسا پەروەردە و فێرکرنێ نەھێتە ڕاوەستاندن.
ل دووڤ ڕاگەھاندنەکا وەزارەتا پەروەردێ یا حوکمەتا ھەرێما کوردستانێ، دوھی 31/1/2016 دکتۆر پشتیوان سادق، وەزیرێ پەروەردێ د گەل شاندەکێ بانکا نێڤدەولەتی ب سەرۆکاتیا (تومی می) رێڤەبەرا ئۆفیسا رۆژھەلاتا ناڤەراست یا بانکا ناڤبری کۆمبوو، تێدا بەحسی ھاریکاریکرنا کەرتێ پەروەردێ ل ھەرێمێ ھاتە کرن.
تومی می، رێڤەبەرا ئۆفیسا رۆژھەلاتا ناڤەراست یا بانکا نێڤدەولەتی دیار کر، مەرەم ژ ھاتانا وان بۆ ھەرێما کوردستانێ ئەوە، بزانن وەزارەتا پەروەردێ پێدڤە ب چ ھەیە و چەوا ھاریکاریا کەرتێ پەروەردێ بکەن و گۆت: “مە چەند پرۆژە و پلان و ھاریکاری بۆ وەزارەتا پەروەردێ ھەنە و بڕیارە ل ھەرێمێ ئەنجام بدەین”.
د ڕاگەھاندنا وەزارەتێ دا ھاتیە: “بانکا ناڤەندی ل بەرە چەند پرۆژان ل ھەرێما کوردستانێ ئەنجام بدەت، وەکو: گرنگیدان ب گەشەیا زارۆیێن پێشوەخت، چەوانیا گرنگیدان ب گەشەیا شیانێن مامۆستایان، دیتنا میکانزما پەیوەندیێ د ناڤبەرا کەرتێ تایبەت و گشتی د کاروبارێن پەروەردەیی دا و ھەلسەنگاندنا قوتابیان”.
ل دووڤ وێ ڕاگەھاندنێ وەزیرێ پەروەردێ داخواز کر، بانکا نێڤدەولەتی ھاریکاریا ھەرێما کوردستانێ بکەت، دا کو پرۆسا پەروەردە و فێرکرنێ نەھێتە ڕاوەستاندن.
