دێ ژ چیای ھێتە خوار
ئەڤرۆ نيوز:
حاکم گۆران پشتی بۆ ماوێ پتر ژ سێ ھەیڤان ل سەرێ چیایێ زێوا شێخ شەفیق ل ھنداڤی بەنداڤا دھۆکێ ژیایی، دھی رۆژا چارشەمبی رێکەفتی 12/27/2017 بریار دا ژ سەرێ چیای بھێتە خوار.
حاکم گۆران بۆ رۆژناما ئەڤرۆ گۆت: من بریار دا ژ سەرێ چیای بھێمە خوار و بەرەڤ ھەموو باژێرک و پارێزگەھێن ھەرێمێ بچم، ئەڤا ھەتا نوکە من کری پێنگاڤا ئێکێ بوو، نھا ژ ئەڤرۆ وێڤە دێ دەست ب پێنگاڤا دوویێ کەم، ئەو ژی سەرەدانا ھەمی باژێرک و پارێزگەھێن ھەرێمێ یە ژلایێ من ڤە و د ڤێ سەرەدانا خۆ دا دێ داخواز ژ ھەموو ھاوولاتیان کەم ئیمزایان کۆم بکەن، بۆ ھندێ خەلک بێژن بەلێ بۆ ئێکرێزی و چاکسازی دناڤ مالێن کوردی دا.
حاکم گۆران گۆتژی: پشتی دەنگێ ھەموو ھاوولاتیێن ھەرێمێ کۆم ڤە دکەم، دێ چمە پەرلەمانێ کوردستانێ و دەنگێ خەلکی گەھینمە وان و دێ داخواز ژ وان کەم ئێکسەر پێکڤە بروینن بۆ ئاڤاکرنا مالا کوردی.
ھێشتا گۆت: داخوازێ ژ لایەن و بەرپرسێن سیاسی دکەم پشتەڤانیا من بکەن، چونکو خەباتا من بۆ کوردستانێ یە و بۆ پاشەرۆژا خەلکێ ڤی وەلاتی یە و من پێدڤی ھەیە ل ھەر پارێزگەھەکێ 20 گەنج ژ ھەموو پارتەکێ دەستێ خۆ بدەنە ل گەل من و ئەم پێکڤە ڤی پرۆژەی برێڤەببەین.
سوبحی عەبدولرەحمان ناڤدار ب (حاکم گۆران) کەسەکێ (55) سالی یە، ل سالا 1980 ھەتا 1992 پێشمەرگێ شۆرەشا ئەیلولێ بوو، ماوێ 26 سالانە چوویە دەرڤەیی وەلاتی و ئەڤە ھەشت ھەیڤە ھاتیە ل کوردستانێ دژیت و ئەڤە سێ ھەیڤ بوو خیڤەتەک ل سەرێ چیایێ گۆندێ زێوا شەفیق ل ھنداڤ سکرێ دھۆکێ دانایە و ل وێرێ دژیا.
حاکم گۆران ئاشکرا ژی کر، کو ل سالا 1992 چوویە وەلاتێ ھۆلەندا و ب خێزان ڤە ل وێرێ دژیت و دو کۆر ھەنە و ھەر شەڤ خێزانا وی ب فایبەری ل گەل دئاخڤن و دلێ وان ب دووف رایە، و دبێژنێ ڤەگەرەڤە، گۆت: بەلێ ئەز دبێژمە وان تەمەنێ من یێ مەزن بووی و من دڤێت تەمەنێ مایی بۆ کوردینیێ تەرخان بکەم.
