دەرچوویێن پەیمانگەھێن راھێنان و گەشەپێدانا پەروەردەیی دێ ئیمتیازاتێن بەکالۆریۆس وەرگرن
ئەڤرۆ نيوز:
وەزارەتا دارایی و ئابووری یا حوکمەتا ھەرێما کوردستانێ بڕیارەک ل دۆر دەرچوویێن پەیمانگەھێن راھێنان و گەشەپێدانێ یێن سەر ب وەزارەتا پەروەردێ ڤە دەرخست و تێدا ھاتیە: دەرچوویێن وان پەیمانگەھان ھەر وەکو یێن باوەرنامێن بەکالۆریۆس ھەین؛ دێ ئیمتیازاتان وەرگرن.
وەزارەتا دارایی و ئابووری یا حوکمەتا ھەرێما رۆژا 16-7-2017 ب نڤیسارەکا فەرمی یا ھژمار 9-7-8982 و ئیمزا رابەر سەدیق، بریکارێ وەزارەتا دارایی ب وەکالەت ل سەرە، تێدا بەرسڤا وەزارەتا پەروەردێ دایە کو ھەموو ئیمتیازاتێن بەکالۆریۆسێ بۆ دەرچوویێن پەیمانگەھێن راھێنان و گەشەپێدانێ یێن سەر ب وەزارەتا پەروەردێ ڤە ب مەزێخیت.
د وێ نڤیسارا وەزارەتا دارایی و ئابووری دا کو وێنەک دەست رۆژناما ئەڤرۆ کەفتیە و تێدا ھاتیە: “دەرچوویێن پەیمانگەھێن راھێنان و گەشەپێدانا پەروەردەیی یێن پارێزگەھێن: دھۆک، ھەولێر و سلێمانیێ و ئیدارا گەرمیان، پشتی ل وان پەیمانگەھان دەردچن دێ ھەموو ماف و ئیمتیازاتێن بەکالۆریۆسێ وەرگرن کو ژ مەزاختنا 45% یا باوەرناما بەکالۆریۆسێ ژ لایێ دارایی و کارگێڕی ڤە پێک دھێت، لێ ب مەرجەکی ژ چارچوڤێ وەزارەتا پەروەردێ دەرنەکەڤیت”.
وەزارەتا دارایی و ئابووری د وێ نڤیسارێ دا خویا ژی کریە کو د دەمێ ڤەگوھاستنا وان دەرچوویان دا بۆ وەزارەتەکا دی، وان ماف و ئیمتیازاتێن بەکالۆریۆسێ وەرناگریت، دیسا ھەلگرێن باوەرنامێن وان پەیمانگەھان نەشێن بەردەوامیێ ب خواندنا بلند بدەن.
