دەزگەھێ کاروبارێن دەرڤە یێ ئەمریکی: کاودانێن عیراقێ گەلەک یێ گونجایە بۆ جودابوونا کوردان
ئەڤرۆ:
راپۆرتەکا ئەمریکی دیاردکەت کو بارودۆخێ سیاسیێ نوکە یێ عیراقێ گونجایترین دەمە بۆ جودابوونا کوردان و دەولەتا خوە راگەھینن.
دەزگەھێ کاروبارێن دەرڤە یێ ئەمریکی د راپۆرتەکا خوەدا ب ناڤێ (سالەکا مەزن بۆ کوردان) دبێژیت” بارودۆخێ سیاسیێ عیراقێ گونجایترین دەمە کورد ژ وی وەلاتی جوداببن و دەولەتا سەربەخوە رابگەھینن”.
د وێ راپۆرتێ دا کو پتریا کەنالێن بیانی و ناڤخوەیێن عیراقێ بەلاڤکریە، ھاتیە “کاریگەریا روودانێن سالا ٢٠١٤ بۆ کوردان وەکو یێن سالا ١٩٩١ نە، د دەمەکی دا وەکو پێنگاڤا ئێکێ شیان ژ حوکمەتا ناڤەندی جوداببن و ھەرێمەکا سەربخوە ل ٢٠٠٣ رابگەھینن”.
د راپۆرتا ناڤبری دا ھاتیە ژی”ئاراستەیا بۆسەلێ د بەرژەوەندیا کوردان دابوو، ب تایبەتی د شەش مەھێن بۆری دا، شکاندنا داعشێ ژ لایێ ھێزێن پێشمەرگەی ڤە و رزگارکرنا پتریا دەڤەران، ئێک ژ ھۆکارێن ب ھێزبوونا پێگەھێ کوردان و دروستکرنا بنەمایەکێ ب ھێز بۆ پەیوەندیێن کوردان ل گەل وەلاتێن زلھێز و ھژمارکرنا پێشمەرگەی وەکو ھێزەکا جیھانی”.
دەزگەھێ کاروبارێن دەرڤە یێ ئەمریکی ئاماژێ ب وێ چەندێ ژی دکەت کو ھێزێن پێشمەرگەی، پشت بەستن ب شیان و ئەزموونێن خوە وەکو ھێزەکا مەشق پێکری و خودان باوەری دیاربووی، دشێت ببیتە لەشکرەکێ نیشتمانی.
ل دۆر کەرتێ ئابووری ل ھەرێما کوردستانێ، راپۆرتا ناڤبری دیارکریە کو رێککەفتنا د ناڤبەرا ھەرێمێ و بەغدا دا دێ بیتە پالدەرەک کو ھەرێمێ پێگەھەکێ ئابووری ھەبیت و ئەوژی ئێک ژ بنەمایێن دروستکرنا دەولەتێ یە و کوردستان دشێت مفای ژێ ببینیت.
ب گۆرەی راپۆرتێ، دروستکرنا دەولەتا کوردی دڤێت ژێدەرەکێ گرنگ بۆ ھەبیت، ئەوژی ب ھێزکرنا پەیوەندیانە ل گەل نێزیکترین ھەڤسنۆر، کو ل سەر ئاستێ جیھانێ کاریگەریا خوە یا ھەی، ئەوژی تورکیا و ئیرانن.
ب دیتنا دەزگەھێ کاروبارێن دەرڤە یێ ئەمریکی، بارودۆخێ سیاسیێ نوکە یێ عیراقێ گونجایترین دەمە کورد جوداببن و دەولەتا سەربەخوە رابگەھینن.
