دەستووریا 140 کارگەھێن دھۆکێ ھاتە ھەلوەشاندن
دھۆک، حەمزە رەزیکی:
ژ بەر ب سەرڤەچوونا دەمێ وان و نەکارکرنا وان ل دەمێ خوە، رێڤەبەریا گەشەپێدانا پیشەسازی ل دھۆکێ دەستووریێن 140 کارگەھان ھەلوەشاند و ب تنێ خودانێ کارگەھەکێ نەرازیبوونا خوە دیارکریە، بەنکا پیشەسازی ژی چار کارگەھان رەوانەی دادگەھێ دکەت.
رێڤەبەرا گەشەپێدانا پیشەسازی ل دھۆکێ نازدار عەبدولقادر دیارکر کو پتریا دەستووریێن ھاتینە ھەلوەشاندن یێن کارگەھێن بیناسازی نە و ھندەک ژی یێن کەرستێن خوارنێ و ئاڤێ نە و گۆت: “106 کارگەە مە ب نڤیسار ھەلوەشاندینە و 34 کارگەە ژی ل دووڤ داخوازیا خودانێن وان ھاتینە ھەلوەشاندن”.
ل دۆر ئەگەرێن ھەلوەشاندنێ نازدار عەبدولقادر دیارکر کو پشتی خودان ئەردی ژ باژێرڤانیێ وەردگریت ئەو ئاگەھداریا وان دکەن پێدڤیە د شەش ھەیڤان دا کارگەھێ ب دانیت و ئاگەھداریا رێڤەبەریا وان بکەت، بەلێ ھندەک ھەنە ھەشت سالە ئەرد وەرگرتی و پێگیری ب دەستووریێ نەکریە و نەکەفتیە کاری، لەورا ئەو نەچار دبن دەستووریێ ب ھەلوەشینین و ئەرد بۆ باژێرڤانیێ دھێتە ڤەگەراندن و گۆت ب تنێ ئێکی نەرازیبوونا خوە دیار کریە، بەلێ ل دووڤ قانوونێ وی کەسی ژی مافێ نەرازیبوونێ نینە.
ژلایێ خوە ڤە رێڤەبەرێ بەنکا پیشەسازی ل دھۆکێ عادل عەلی بۆ رۆژناما ئەڤرۆ دیارکر کو 51 کارگەھێن پێشەسازی ل دھۆکێ قەرێن جورا و جور ل دەڤ وان وەرگرتینە و ئەو 75% قەران ددەنێ وەکو پشتەڤانی بۆ کەرتێ پێشەسازی و ھندەک ژ وان کارگەھان ھەتا ملیار دیناران و ھندەک ژی ھەنە 100 ملیۆن وەرگرتینە و چو کارگەھان قستێن خوە ب دووماھی نەئیناینە، بەلێ ھندەک ھەنە قستێن خوە نەئیناینە و گۆت ئەڤ سالە چار کارگەھان کو سێ ژ وان یێن ئایس کریمانە و ئێک ژی چێکرنا بۆریێن پلاستیکی یە، قستێن خوە نەداینە، لەورا ئەم نەچار بووینە پێرابوونێن قانوونی ل ھەمبەر وان وەرگرین، ژ وان پێرابوونان ژی ئاگەھدارکرنە و پاشی ب رێیا پۆلیسان و ل دووماھیێ ب رێیا داواکارێ گشتی ل دادگەھێ، ھەکە قستێن خوە دان ئەو دێ بەردەوامیێ ب کارێ خوە دەن، ھەکە نەدان ژ بەر ھەر ئەگەرەکێ ھەبیت ئەم دێ نەچاربین کارگەە بھێتە (حجز) کرن و دەستووریا وی ژێ بھێتە ستاندن و کارگەە ب رێیا سەرئێک زێدەکرنێ بھێتە فرۆتن و ئەرد دێ بۆ باژێرڤانیێ ھێتە ڤەگەراندن.
