دەستکاری دێ د خشتێ مووچەی دا ھێتەکرن
ئەڤرۆ نیوز:
پەرلەمانتارەکێ پارتی ل دۆر بڕیارا حوکمەتا ھەرێما کوردستانێ بۆ دەستکاریکرنێ د خشتێ نوو یێ مووچێ فەرمانبەران دا، رۆنکرنەکێ ددەت و دبێژیت: “چاڤەرێ دھێتەکرن گوھۆرین د خشتێ مووچەی دا بھێتە کرن”.
د ڤان رۆژێن بۆری دا بھایێ بەرمیلەکا پەترۆلێ د بازارێن جیھانێ دا بۆ 38 دۆلاران بلند بوو، چاڤەرێ دھێتەکرن بھایێ بەرمیلەکا پەترۆلێ ھێشتا بلند ببیت، ژ ڤێ چەندێ ژی حوکمەت دێ دەستکاریێ د خشتێ نوو یێ مووچەی دا کەت.
عەلی ھالۆ، ئەندامێ پەرلەمانێ کوردستانێ ل سەر فراکسیۆنا پارتی دیموکراتی کوردستان دیار کر کو پشتی حوکمەتا ھەرێما کوردستانێ بڕیارا دەستکاریکرنێ د خشتێ نوو یێ مووچێ فەرمانبەر و مامۆستایان دای، چەند جارەکان حوکمەتێ دوپاتکریە کو گوھۆرین د خشتێ مووچێ فەرمانبەران دا، دێ ل دووڤ زێدەبوونا داھاتی بیت و ل گۆرەی داھاتێ بەردەست دێ شێن دەستکاریێ د خشتێ مووچەی دا کەن و گۆت: “ھەرێما کوردستانێ پشت بەستنێ ل سەر داھاتێ پەترۆلێ دکەت، لەو ئەگەر بھایێ پەترۆلێ بلند بیت، دێ گوھۆرین د خشتێ مووچێ فەرمانبەران دا ھێتە کرن”.
وی پەرلەمانتارێ پارتی گۆت: “بۆ چارەکرنا ھەموو ئارێشان پێدڤیە سیستەمەکێ کارگێری یێ باش و مۆکم بھێتە دانان، ب ڤێ رێیێ ژی دێ شێین روو ب روو ھەموو ئارێشێن ماینە ھەلاویستی بین، یێن ئەڤرۆ تووشی ھەرێما کوردستانێ بووین”.
