دەستێوەردان د کارۆبارێن دادگەھان دا دھێتە کرن
ئەڤرۆ، قائيد ميرۆ:
چالاکڤانەکێ مەدەنی کو شارەزایی د کاروبارێن قانوونی دا ھەیە ئاماژە ب ڤێ چەندێ کر کو ل کوردستانێ ب شێوەیەکێ بەربەلاڤ دەستێوەردان دناڤا کاروبارێن دەستھەلاتا دادوەریێ دا ھەیە و گۆت: دادوەر ھەیە چاڤەڕێ دکەت بەرپرسەک تێلەفونەکێ بۆ بکەت ھەتا کارەکی بۆ بەرپرسی بکەت و ھەیە ژی نامەکا مەزنترین بەرپرسێ ھەرێما کوردستانێ بۆ ببەی دێ کەتە د سەتلا گێلشی دا، ب کورتی دادوەرێن بێلایەن ھەنە و ھندەک ژی ھەتا بن دفنێ حزبینە.
ل گەل ڤێ چەندێ مە چەندین دادوەر ھەنە ل سەرانسەری ھەرێما کوردستانێ نامەکا مەزنترین بەرپرسێ ھەرێما کوردستانێ بۆ ببەی دێ کەتە د ناڤا سەتلا گێلشی دا، دادوەرێن عادل د زۆرن بەرۆڤاژی یێن نەعادل ژی ھەنە، دادوەر ژی ھەیە چاڤەڕێ دکەت بەرپرسەک تێلەفونەکێ بۆ بکەت ھەتا کارەکی بۆ بەرپرسی بکەت، ب کورتی دادوەرێن بێلایەن ھەنە و ھندەک ژی ھەتا بن دفنێ حزبینە.
ھندەک دادوەر ھەنە مەمنونن بەرپرسەک تێلەفۆنێ بۆ بکەت ھەتا کاری بۆ بەرپرسان بکەن و بەرۆڤاژی دادوەر ھەیە ژی ناما مەزنترین بەرپرس دکەنە د ناڤا سەتلا گلێشی دا.
شوان سابر، چالاکڤانێ مەدەنی بۆ رۆژناما ئەڤرۆ گۆت: ل سالێن بۆری مە کۆنگرەک لدۆر پێشڤەبرنا سیستەمێ دادوەریێ ل ھەرێما کوردستانێ ئەنجام دا و تێدا ھەموو لایەنێن پەیوەندی ب قانوون و سیستەمێ دادوەریێ ڤە ھەی پشکدار بوون، ئەف کۆنگرە لبن چاڤدێریا سەرۆکێ جڤاتا دادوەریێ بو ل ھەرێما کوردستانێ ب ھەڤکاری ل گەل ھژمارەک رێکخراوێن مەدەنی و بۆ دەمێ سالەکێ ڤەکێشا و تێدا چەندین رۆنشتن ھاتنە کرن.
شوان زێدەتر گۆت: کۆمبون ل گەل 10 لایەنێن پەیوەندار ھاتنە کرن بۆ دیارکرنا کێماسیێن سیستەمێ دادوەریێ ل کوردستانێ د ئەنجامدا، 440 کێماسی ھاتنە کۆمکرن، د کۆنگرێ پێشبرنا سیستەمێ دادوەریێ ب ئامادەبوونا چەندین لایەنێن دادوەری ل عێراق و کوردستانێ سەرۆکێ جڤاتا دادوەریێ دانپێدان کر کو بەلێ ئەف 440 کێماسیە ھەنە د سیستەمێ دادوەریێ دا و ئێک ژ وان دەستوەردانا حزبی و دەرڤەی حزبا ژی بو ل کاروبارێن دادگەھان، واتە جڤاتا دادوەریێ بخوە دبێژیت دەستوەردان ھەیە د کاروبارێن دادگەھێ دا، نەک بتنێ حزب بەلکو حوکمەت و پەرلەمان ژی دەستوەردانێ د کاروبارێن دادگەھێ دا دکەن.
ئەڤی چالاکڤانێ مەدەنی دیار کر ژی کو دەستوەردانا حزبان د کاروبارێن دادگەھان دا بڤی شێوەی نینە لدۆر بادەکەکێ بێژنە دادوەری وەسا بکە وەکی مە دڤێت، ب لیست دادوەر و ڤەکۆلەرێن دادگەھێ و داخوازکارێن گشتی دھێنە دامەزراندن، بڤی شێوەی دەستوەردانێ دکەن و گۆت: ژلایەکێ دیڤە ھەتا نھا دارایی یا جڤاتا دادوەریێ د دەستێ وەزارەتا دارایی و ئابوریا حوکمەتێ دایە، ئەڤە بخوە دەستوەردانا دەستھەلاتا بجە ئینانێ یە د کاروبارێن دادگەھێ دا.
چالاکڤانی گۆتژی: ژبەرکو دەمێ دادگەە بۆ دەمێ دو سێ سالا مژوولی ڤەکۆلینەکێ بیت لدۆر تاوانەکێ و ئێکسەر ژلایێ سەرۆکاتیا وەزیران یان پەرلەمانی لێبورین بۆ دەردچیت ئەڤە ھەموو دەستوەردانە.
شوان سابر د بەردەوامیا ئاخفتنێن خوە دا گۆت: ئەف دادوەرێن داخوازکارێ گشتی یێن سکالایا ل سەر بەرپرسان تۆمار دکەن دھێنە سزا دان و ھەموو بۆ دەڤەرێن سنوری ھاتینە ڤەگوھاستن، ل سالا 2015 ێ پەیڤدارێ فەرمیێ جڤاتا دادوەریێ ئاشکرا کر کو سێ ھزار کەس ھەنە فەرمانا دەستەسەرکرنێ ھەیە و ھەردو وەزارەتێن نافخۆ پێشمەرگە بجە نائینن، ھەکە 300 کەس ل پەیمانگەھا دادوەریێ بھێنە وەرگرتن ئەڤە ب تنێ لەوانەیە بۆ ناڤی 15 کەسەکا دانن یێن دی ھەموو ژلایێ حزبێ ڤە دھێنە دانان.
شوان سابر د ئاخفتنا خوە یا دووماھیێ دا گۆت: دادوەرەک ب منەتا حزبێ ھاتبیتە دامەزراندن نەشێت بەرۆڤاژی بەرژەوەندیا حزبێ کار بکەت، ل گەل ڤێ چەندێ مە چەندین دادوەر ھەنە ل سەرانسەری ھەرێما کوردستانێ نامەکا مەزنترین بەرپرسێ ھەرێما کوردستانێ بۆ ببەی دێ کەتە د ناڤا سەتلا گێلشی دا، دادوەرێن عادل د زۆرن بەرۆڤاژی یێن نەعادل ژی ھەنە، دادوەر ژی ھەیە چاڤەڕێ دکەت بەرپرسەک تێلەفونەکێ بۆ بکەت ھەتا کارەکی بۆ بەرپرسی بکەت، ب کورتی دادوەرێن بێلایەن ھەنە و ھندەک ژی ھەتا بن دفنێ حزبینە.
