دەستەیا پاراستنا ژینگەھێ مه‌ترسيه‌كا مه‌زن ل سه‌ر ژيانا وه‌لاتيان ئاشكه‌را دكه‌ت
ئه‌ڤرۆ نيوز:
پەیڤدارێ دەستەیا پاراستن و چێکرنا ژینگەھێ ئاشکرا کر کو چەندین پارزینگەھێن نەقانوونی ل ھەرێما کوردستانێ ب شێوەیەکێ نەقانوونی ھاتینە دانان و بووینە مەترسی ل سەر ژیانا وەلاتیان و گۆت: “پێدڤیە پارزینگەە ل دووری سەنتەرێن باژێڕان بن و فلتەر بۆ بھێنە دانان”.
لوقمان شێروانی، پەیڤدارێ دەستەیا پاراستن و چێکرنا ژینگەھێ بۆ رۆژناما ئەڤرۆ دیار کر کو ب سەدان پارزینگەھێن نەقانوونی ل دەڤەرێن جودا جودا یێن ھەرێما کوردستانێ ھاتینە چێکرن و ئەڤ پارزینگەھە بووینە ئەگەرێ پیسبوونا ژینگەھێ و کارتێکرنەکا بەرچاڤ ل ساخلەمیا وەلاتیان کریە و گۆت: “دڤێت ھەموو مەرجێن قانوونی د پارزینگەھان دا ھەبن داکو مەترسی ل سەر ژیانا وەلاتیان پەیدا نەبیت”.
ناڤھاتی ئاماژە دا وێ چەندێ کو دەستەیا پاراستن و چێکرنا ژینگەھێ ب ھەماھەنگی دگەل دەزگەھێن پەیوەندیدار چەندین ھەوێن جودا بۆ داخستنا پارزینگەھێن نەقانوونی ئەنجامداینە و ھەتا نوکە ھژمارەکا بەرچاڤا پارزینگەھێن ناڤھاتی ھاتینە داخستن، بەلێ ھێشتا ھژمارەکا مەزن یا ڤان پارزینگەھان ماینە و نەھاتینە داخستن و گۆت: “مخابن ھەتا نوکە ئامارا دروست نینە داکو بزانین چەند پارزینگەھێن بێ مۆلەت کار دکەن”.
ل دووماھیێ پەیڤدارێ دەستەیا پاراستن و چێکرنا ژینگەھێ خویا کر کو دڤێت بۆ چێکرنا ھەر پارزینگەھەکێ مۆلەت ژ وەزارەتا سامانێن سرۆشتی بھێتە وەرگرتن و رەوشا ساخلەمیا وەلاتیان و پاراستنا ژینگەھێ بەرچاڤ بھێتە وەرگرتن.
