دەست ب بەلاڤکرنا پارێ جۆتیاران ھاتە کرن
ئه‌ڤرۆ نيوز:
رێڤەبەرێ ڕاگەھاندنێ ل وەزارەتا چاندن و ژێدەرێن ئاڤێ یا حوکمەتا ھەرێما کوردستانێ بۆ ئەڤرۆ دیار کر کو حوکمەتا ھەرێما کوردستانێ، کۆژمێ چار ملیۆن و 445 ھزار دۆلار ژ پارێ پەترۆلێ بۆ کرینا جەھێ جۆتیاران تەرخانکرن و دوھی 10ى ته‌باخێ دەست بەلاڤکرنا پارێ جۆتیارێن جەھی وان ھاتیە وەرگرتن ھاتە کرن.
ماجد دەباغ، رێڤەبەرێ ڕاگەھاندنێ ل وەزارەتا چاندن و ژێدەرێن ئاڤێ یا حوکمەتا ھەرێما کوردستانێ بۆ ئەڤرۆ ئاشکرا کر، ل سالا 2014 زێدەتر ژ دو ملیۆن دۆلاران ھاتبوونە مەزاختن بۆ جۆتیاران و پارێ دی مابوو، ژبەر قەیرانا دارایی ھەرێما کوردستانێ نەدشیا ڤی کۆژمێ پارەی بۆ جوتیاران تەرخان بکەت، بەلێ پشتی دانوستاندن د گەل بەنکا کوردستان ھاتینە کرن رازیبوون ل سەر مەزاختنا پارێ مایی ژ پارێ پەترۆلا حوکمەتا ھەرێما کوردستانێ ھاتە کرن و گۆت: “ئەو جۆتیارێن ھەتا نوکە پارێ خوە یێ جەھی وەرنەگرتین پارێ وان ھاتە بەلاڤکرن”.
ناڤھاتی ئاشکرا ژی کر، ئەڤ سالە جۆتیاران جەە گەلەک کێم چاندبوو، چونکی جەھێ وان زوو ناھێتە وەرگرتن، ژبەر ڤێ چەندێ بەھرا پتریا جۆتیاران ئەڤ سالە گەنم چاندبوو، بەلێ وەزارەتا چاندن و ژێدەرێن ئاڤێ ل حوکمەتا ھەرێما کوردستانێ جەە ژ جۆتیاران کری و گۆت: “ئەڤ سالە ژی رێژا بەرھەمئینانا گەنمێ جۆتیاران ب شێوەکێ گەلەک باشبوو”.
ل دووماھیێ رێڤەبەرێ ڕاگەھاندنێ ل وەزارەتا چاندن و ژێدەرێن ئاڤێ گۆت: “ئەم دخوازین پارێ گەنمێ جۆتیاران ژی زوو بھێتە مەزاختن، داکو جۆتیار بشێن ئەڤ سالە زێدەتر گەنمی بچینن و چاڤدێریا بەرھەمێ خوە بکەن، ب ھەموو رەنگان ئەم بزاڤێ دکەین جۆتیار جەھی و گەنمی بەرھەم بینن”.
