دەست ژ مافێن خوە یێن دستووری بەرنادەین
دوهی دوشەمبی
2023-8-14مەسرور بارزانی سەرۆكێ حوكمەتا هەرێما كوردستانێ د ڕێورەسمەكێ تایبەت دا ل باژێرێ زاخۆ، پڕۆژەیێ گەشتیاری یێ كۆرنیشا دەلال ڤەكر.
سەرۆكێ حوكمەتێ د وی ڕێورەسمی دا پەیڤەك پێشكێشكر و ئەڤە دەقێ وێ یە:
گەلەك پێخوەشحالم ئەڤرۆ ل گەل هەوە ل ڤێرێ پشكدارم بۆ ڤەكرنا ڤێ پڕۆژەیێ گرنگ و جوان كو د دەمەكێ گەلەك كێم دا هاتیە بجهئینان، پیرۆزباهیێ ل هەوە و خەلكێ زاخۆ و هەموو خەلكێ كوردستانێ دكەم، هیڤیدارم مفای ژێ ببینن و ببیتە جهێ ڕازیبوونا هەوە هەموویان، سوپاسیا كۆمپانیا جێبەجێكار و ئیدارەیا سەربخوە یا زاخۆ و سوپاسیا خەلكێ زاخۆ دكەم بۆ بێهنفرەهی و هاریكاریا وان، هیڤیدارم ڕۆژانە پڕۆژەیێن زێدەتر ل زاخۆ و ڤێ دەڤەرێ و هەموو دەڤەرێن كوردستانێ بهێنە بجهئینان.
بۆ من جهێ دلخوەشیێ یە دەمێ دبینم ئەم پێشوەخت هندەك سۆزا ددەین، پشتی دەمەكی دهێین و دبینین ئەو سۆزێن مە داین بۆ بجهئینانا پڕۆژەیان، ئەنجام هەنە و پشكداریێ د ڤەكرنا ڤان پڕۆژەیان دا دكەین.
وەكو دزانن ئەڤە تاكە پڕۆژە نینە، بەلكو ل زاخۆ چەندین پڕۆژەیێن دی هاتینە دروستكرن وەكو ڤەكرنا ڕێك و جادەیان و هندەك پڕۆژەیێن دی یێن گرنگ ل ڤێ دەڤەرێ وەكو نووژەنكرنا بازارێ كەڤنێ زاخۆ كو هیڤیدارم بۆ وی ژی مە دەم هەبیت و سەرەدانا وی بكەین و ویژی ببینین.
ب گشتی وەكو دزانم زێدەتر ژ 170 پڕۆژە ل سنوورێ ئیدارەیا سەربخوەیا زاخۆ د ڤێ دەمی دا هاتینە بجهئینان. د بەرنامەیێ مە دایە ل قۆناغا داهاتی گەلەك پڕۆژەیێن دی ژی ئەنجام بدەین ئێك ژوان دروستكرنا جادەیا 60 متری یە، هەروەسا مزگینیێ ددەینە هەوە كو دێ بەردەوام بین ل سەر دروستكرنا كۆرنیشێ زاخۆ هەتا ڕووبارێ خابیری ل زاخۆ تمام دبیت، دێ هەموو قۆناغێن دی ژی هێنە بجهئینان.
هەروەسا سكرێ زاخۆ ل خابیری دێ هێتە دروستكرن، ئەوژی پڕۆژەیەكێ مەزن و ستراتیژیە و هەر دەمێ دیزاین و بەرنامەیێ وی ژی تمام بوو، ئەوژی دێ كەڤیتە بوارێ بجهئینانێ، بێگومان دێ وی ژی مفایەكێ مەزن بۆ خەلكێ زاخۆ و خەلكێ هەموو كوردستانێ ژی هەبیت.
زاخۆ باژێرەكێ گرنگە بۆ مە، نەكو تنێ ژبەر وێ چەندێ كو باژێرەكە ل سەر سنوورێ هەرێما كوردستانێ و دەرگەهەكە بۆ پەیوەندیێ ل گەل توركیا و ئورۆپا و جیهانێ، بەلكو باژێرەكە هەموو دەمان پشتەڤان بوو بۆ پاراستنا هەرێما كوردستانێ و قەهرەمانێن گەلەك مەزن ل زاخۆ هەنە و ڤێ دەڤەرێ گەلەك شەهید یێن داین، مخابن گەلەك ژوان ئەڤرۆ ل ڤێرێ نینن، هەرچەندە ئەم ژ نێزیك دنیاسین، مخابن ل ڤێرێ نینن، بەلێ ئەم سەرێ ڕێزێ بۆ وان و بنەمالێن سەربلندێن شەهیدان و پێشمەرگێن قەهرەمان دچەمینین كو ئەڤ كارە ژ ئەگەرێ خەباتا وان هاتیە ئەنجامدان .
حەز دكەم وێ چەندێ ژی بێژم كو ب ڕاستی من گەلەك پێخوەش بوو كو ئەم دلێ سەرۆكی ژی ژ خوە ڕازی بكەین، ئەڤجا هیڤیدارم هوون ژی ژ مە ڕازی ببن تاكو دلێ سەرۆكێ ژ مە ڕازی ببیت.
مە گەلەك زەحمەت دیت، چ وەكو مللەت و چ وەكو ڤێ كابینەیێ ژی، گەلەك ئاستەنگ ل سالا بۆری بۆ مە هاتنە دروستكرن، ل بوارێ ئابۆری، سیاسی، هندەك جاران هندەك كێشەیێن ئەمنی ژی بۆمە دروستكرن بۆ وێ چەندێ ئەم نەشێن بەردەوام بین د گەهاندنا خزمەتگوزاریان بۆ خەلكێ خوە ل هەموو دەڤەرێن كوردستانێ، بەلێ سوپاس بۆ خودێ و خۆراگریا خەلكێ قەهرەمانێ كوردستانێ، ئەم بەردەوام بووین و مە سەرێ خوە بۆ هیچ نەحەز و فشار و ئاستەنگەكێ نە چەماند و مە شیا وان قۆناغان دەرباز بكەین و هندەك ژ وان پڕۆژەیان ژی بجهبینین.
بۆ مە جهێ شانازیێ یە و مەزنترین شانازی بۆ من ئەوبوو كو خەلكێ كوردستانێ پشتەڤانێن مە بوون، پشتەڤانیا هەوە هێز دا مە، پشتەڤانی و خۆڕاگریا هەوە هێز دا مە تاكو بشێین بەرامبەر وان هەموو فشارێن كو هاتینە سەر حوكمەتا هەرێما كوردستانێ، ڕاوەستین، لەوما هیڤیدارم ئەو پشتەڤانیە بەردەوام بیت تاكو ئەوا دشیانێن مە ژی دا بیت بۆ خزمەتكرنا هەوە، بەردەوام بین.
دخوازم مفای ژ ڤێ دەلیڤەیێ وەربگرم بۆ وێ چەندێ هندەك باسێ ڕەوشا كوردستانێ ژی بكەم، د دەمێ بۆری دا مە چەندین شاند هنارتنە بەغدا تاكو دانوستاندن بهێتە كرن چ ل سەر بابەتێ هنارتنا پەترۆلا هەرێما كوردستانێ بۆ دەرڤە و چ ل سەر بابەتێ بودجەی كو مخابن مە چەندین ڕێككەفتن ل گەل سەرۆك وەزیرێن ئیراقێ و حوكمەتا فیدرالی ئەنجامدان، بەلێ پاشی ئەو ڕێككەفتنە هاتنە پشت هاڤێتن یان دەستكاری تێدا هاتە كرن و هندەك بیر و بۆچوونێن دی ل سەر خەلكێ كوردستانێ سەپاندن، سەرەرای وێ چەندێ ژی مە دیسان بزاڤكر و دێ بزاڤێ ژی كەین كو هەتا دوماهی قۆناغ ل گەل بەغدا بگەهینە ئەنجامەكی كو بەرهەمێ وی د خزمەتا هەموو خەلكێ ئیراقێ و ب تایبەتی د خزمەتا هەرێما كوردستانێ دا بیت، بێی ئەمم هیچ داگیرانەكێ ل سەر دەستكەفت و شایستە و مافێن خوە یێن دستووری بكەین. ئەم دێ بەردەوام بین بۆ وێ چەندێ مافێن خوە یێن دستووری بپارێزین، دێ بەردەوام بین ژی بۆ وێ چەندێ ل گەل حوكمەتا ئیراقێ بگەهینە ئەنجامەكێ ئاشتیانە و ئەو كێشەیێن هەین چارەسەر بكەین. ل ڕۆژێن داهاتی ژی جارەكا دی شاندێ مە دێ چیتە بەغدا بۆ گەهشتنێ ب ڕێككەفتنێ ل سەر بابەتێ هنارتنا بودجەی. هەروەكو هوون دزانن پێشتر گازندەیا وێ چەندێ دهاتە كرن كو حوكمەتا هەرێما كوردستانێ مووچەی نادەت یان ل دەمێ خوە مووچە نەدایە، دخوازم وێ چەندێ بێژم كو هەتا ڕێگری ل هنارتنا پەترۆلا كوردستانێ هاتیە كرن، حوكمەتا هەرێمێ ب شانازی ڤە هەموو مەهەكێ مووچەیێ خەلكێ كوردستانێ دابین كریە. ب خوەشی بیت و ب زەحمەت و هەر جۆرەكی بیت، بەلێ مە ئەو بەرپرسیارەتیێ ل ستوویێ خوە گرت و د خزمەتا خەلكێ خوە دا بووین. نوكە ژی ئەو فشارا ل سەر مە دبیت بۆ وێ چەندێ بیت كو ئەم دەست ژ هندەك مافێن خوە یێن دستووری بەردەین، بەلێ دخوازم هەوە پشتڕاست بكەم كو ئەم دەست ژ مافێن خوە یێن دستووری بەرنادەین. ب پشتەڤانیا هەوە و خودێ مەزن، دێ بەردەوام بین ل داكۆكیكرنێ ژ هەموو مافێن خوە و یێ گەشبینم ب وێ چەندێ دێ گەهینە ئەنجامەكێ باش ل گەل ڤێ حوكمەتێ، تاكو ئەوژی بودجەی د دەمێ خوە دا بۆ خەلكێ هەرێما كوردستانێ بهنێرن و بابەتێ بودجەی ژی نەكەنە بابەتەكێ سیاسی و تێكهەلی كێشەیا سیاسی نەكەن كو هندەك جاران مخابن بهانەیێن بێ ڕامان بۆ دئینن.
