دەم پارتی و كەساتیێن سیاسی یێن باكورێ كوردستانێ سوپاسییا سەرۆك بارزانی دكەن
سەرۆك بارزانی ل گەل هەژمارەكا كەسایەتیێن سیاسی و شاندێ بلند یێ دەم پارتی باس ل پرۆسەیا ئاشتیێ كر و شاندێ ناڤبری داخواز ژ سەرۆك بارزانی كر، د پشتەڤانیكرنا ڤێ پرۆسەیێدا بەردەوام بیت و سەرەدانا عەبدوللا ئۆجەلانی بكەت.
بارەگەهێ بارزانی بەلاڤكر، ل سەلاحەدین سەرۆك بارزانی پێشوازی ل هەژمارەكا كەسایەتیێن سیاسی و شاندێ بلند یێ دەم پارتی كر كو پێكهاتبوو ژ ئەحمەد تورك، لەیلا زانا، سری ساكێك، تونجەر باكرهان، هەڤسەرۆكێ دەم پارتی، چیدەم قلێچگون ئوچار، هەڤسەرۆكێ هەرێمێن دیموكرات، مەرال دانشبەشتاش، پەرلەمانتارێ دەم پارتی و بەردان ئوزتورك، بەرپرسێ هەڤبەندیێن دەرڤە یێن دەم پارتی.
د دیدارەكێدا شاندێ مێهڤان دەستخوەشی ل سەرۆك بارزانی كر بۆ رۆلێ وی یێ نەتەوەیی و ستراتیژی یێ ب هێز د پشتەڤانیكرنا پرۆسەیا ئاشتیێ دا ل توركیا.
هەروەسا شاندێ ناڤبری داخواز ژ سەرۆك بارزانی كر، د پشتەڤانیكرنا وێ پرۆسەیا دیرۆكیدا ل قۆناغێن جودا جودا دا بەردەوام بیت.
شاندی سەرەرای گەهاندنا پەیام و داخوازییا ئۆجەلانی، داخواز ژی ژ سەرۆك بارزانی كر سەرەدانا ئۆجەلانی بكەت.
ژ ئالیێ خوەڤە سەرۆك بارزانی دوپاتی ل وێ چەندێ كر كو ئەو پێنگاڤێن د پرۆسەیا ئاشتیێدا هاتینە هاڤێتن، پێنگاڤێن گرنگن ب ئاراستەیا دروست. ئەوژی راگەهاند كو پرۆسەیا ئاشتیێ پێدڤی ب بێهنفرەهیێ و هووربینیێ هەیە بۆ وێ چەندێ بگەهیتە ئەنجامەكێ باش.
هەروەسا سەرۆك بارزانی دوپاتكر كو 10 سالێن دانوستاندنێ باشترە ژ ئێك ساتا شەڕی و ب شەڕی و توندوتیژیێ كێشە ناهێنە چارەسەركرن و دڤێت پشتبەستن ب خەباتا سیاسی و دانوستاندنێ و هەڤدو قەبوولكرنێ و دیپلۆماسیەتێ بهێتە كرن.
سەرۆك بارزانی ئاماژە ب وێ چەندێ ژی دا ژ پێخەمەت سەرئێخستنا پرۆسەیا چارەسەریێ ئەوا د شیاندا بیت دێ ئەنجامدەت و سەبارەت داخوازیێن سەرەدانا وی بۆ ئالیێ ئۆجەلانی راگەهاند: د رەوشەكا گونجایدا دێ سەرەدان هێتە ئەنجامدان.
سەرۆك بارزانی داخواز ژی كر هەموو ئالیێن سیاسی یێن كوردستانی پشتەڤانێن چارەسەرییا ئاشتیێ ل توركیا بن.
