د به‌رژه‌وه‌ندا كوردستانێ دا، ئه‌مريكا به‌رسڤا عه‌بادى دا
ئه‌ڤرۆ نيوز:
ئاخفتنكه‌را ب ناڤێ وه‌زاره‌تا ژ ده‌رڤه يا ئه‌مريكا هيزر نويرت ره‌خنه ل حوكمه‌تا عيراقێ گرتن ل دۆر گرتنا ده‌رگه‌هێن ئه‌سمانى ل هه‌مبه‌ر كوردستانێ وه‌كو سزادانه‌ك ل به‌رامبه‌ر وێ راپرسيا ئه‌نجام داى.
نويرت د كۆنگره‌كێ رۆژنامه‌ڤانى دا ئه‌ڤرۆ گۆت: “گرتنا ده‌رگه‌هێن ئه‌سمانى ژ لايێ حوكمه‌تا به‌غدا ڤه نه‌يا دروسته”، خويا ژى كر “هه‌ڤركى و تۆندوتيژيێ ژ هه‌ردۆلا قه‌بوول ناكه‌ين”.
دا زانين ژى كو ئه‌و پشته‌ڤانيا راپرسيا كوردستانێ ناكه‌ن و پشته‌ڤانيێ ژى ل حوكمه‌تا عيراقێ ناكه‌ن، “ئه‌م پشته‌ڤانيا ئێكپارچه‌يا عيراقێ دكه‌ين”.
ئاخفتنكه‌را ب ناڤێ وه‌زاره‌تا ژ ده‌رڤه يا ئه‌مريكا ته‌كست ل سه‌ر وێ چه‌ندێ كر كو ژمارا پشكداريێ د راپرسيا هه‌رێما كوردستانێ دا گه‌له‌ك بوو، “راپرسيێ حه‌ز و ڤيانه‌كا زۆر هه‌بوو ژ لايێ كوردستانيان”.
گۆتژى: “ئه‌م تێدگه‌هين بۆچى ب ڤى ره‌نگى گه‌لێ كوردستانێ حه‌ز ل سه‌ر هه‌يه”، هيڤى ژى ژ به‌غدا و هه‌ولێر كر كو دانوستاندنان ب رژدى بكه‌ن ژ بوو نه‌هێلانا وان كێشه‌يێن د ناڤبه‌را وان دا هه‌يى.
حه‌يده‌ر عه‌بادى سه‌رۆك وه‌زيرێن عيراقێ راگه‌هاند، هه‌موو گه‌شتێن نێڤده‌وله‌تى بۆ فرۆكخانه‌يێن هه‌رێمێ و هه‌رديسا هاتن بۆ وان دێ راگريت هه‌كه هات و د ماوێ سێ رۆژان دا ئه‌و فرۆكخانه نه‌خستنه بن كونترۆلا حوكمه‌تا عيراقێ.
حه‌يده‌ر عه‌بادى، د كۆمبوونا ئه‌ڤرۆ يا جڤاتا وه‌زيرێن عيراقێ دا ده‌رباره‌ى ريفراندۆما هه‌رێما كوردستانێ راگه‌هاند: “سه‌ركردێن هه‌رێمێ گوهێ چو بانگهێشتان نه‌دا، ده‌رباره‌ى ده‌ستوورينه‌بوونا ريفراندۆمێ”.
عه‌بادى د كۆمبوونێ دا بڕيار دا، كونترۆلا هه‌موو ده‌رگه‌هێن سنورى يێن هه‌رێمێ بێخيته بن ده‌سته‌لاتا حوكمه‌تا ناڤه‌ندى.
هه‌ڤده‌م حه‌يده‌ر عه‌بادى ل ده‌مێ ب دووماهى هاتنا كۆمبوونێ كۆنگره‌كێ رۆژنامه‌ڤانى گرێدا و تێدا راگه‌هاند كو حوكمه‌تا عيراقێ ده‌سته‌لاتا سيادى يا فيدرالى يا خوه ب سه‌ر دێ ب سه‌ر هه‌موو ئاخا عيراقێ دا سه‌پينيت.
روونژى كر كو ده‌سته‌به‌ردارى ئێكپارچه‌يى و سه‌روه‌ريا خوه نابن ب گۆره‌ى دستوورى پێدڤيه بۆدجا ئتيحادى ڤه‌گه‌ريێن بۆ حوكمه‌تا ناڤه‌ندى.
