د ترسێن ده‌وله‌تێ وه‌لاتيێن باكوورێ كوردستانێ ئه‌ڤ باژێره ژى چۆلكر
ئەڤرۆ نيوز:
پشتی کو وەزیرێ ناڤخوە یێ تورکیا راگەھاندی کو پشتی جزیرێ و سورێ دێ ل چەندین دەڤەرێن دیتر ژی دەست ب ئۆپەراسیۆنا پاقژکرنا تیرۆرستان کەن، خەلکێ باژێرێ نسێبینی یێ سەر ب مێردینێ ڤە ژ ترسا ئۆپەراسیۆنان و کوشتنا ژن و زارۆیێن وان دەست ب چۆل کرنا باژێرێ خوە دکەن و ل گۆر ئاگاھیێن ژ باکورێ کوردستانێ دگەھن ھەتا نھا رێژەکا مەزن یا خەلکی باژێری چۆل کرینە و بەر ب دەڤەرێن دی یێن ئارام ڤە دچن.
ل گۆر نووچەکا ئاژانسا دیجلە ھەتا نھا شەش جاران ل وی باژێری رەوشا نەئاسایی ھاتیە راگەھاندن و گەلەک کەسێن مەدەنی ژی گیانێ خوە ژ دەست داینە و پشتی کو خەلکێ باژێری دیت کو چ ل َ خەلکێ جزیرێ و سورێ ھاتیە ئەو ژ نھا ڤە دەست ب چۆل کرنا باژێرێ خوە دکەن دا تووشی چارەنڤیسێ وان نەبن.
ئاژانسا دیجلە ھەروەسا دیار کریە کو چەند رۆژ بەری نھا بەرپرسێن ئێمناھیا باژێری داخواز ژ کارمەندێن دەولەتێ ژی کریە کو ژ بەر ئۆپەراسیۆنان ژ باژێری دەرکەڤن دا کو چو زیان نەگەھیتە وان و ژ بەر ھندێ ژی نھا ترسەکا گەلەک مەزن ل دەف خەلکی دروست بوویە و ھەر کەس یێ بزاڤان دکەت دا کو جانێ خوە و خێزانا خوە قورتال کەن و نھا رەوشەکا گەلەک خراب ل باژێرێ نسێبینێ یا ھەی.
