د شه‌رى دا هه‌تا نوكه چه‌ند كه‌س هاتينه كوشتن و شه‌هيد بووينه؟
ئه‌ڤرۆ نيوز، نيوار محه‌مه‌د سه‌ليم:
ره‌وانگه‌ها سورى بۆ مافێن مرۆڤى ل سوريا راگه‌هاند كو ئه‌و شياينه كوشتنا 553 كه‌سان ل سوريا دێكيۆمێنت بكه‌ن هه‌ر ژ ده‌سپێكا دربێن ئه‌سمانى يێن هێزێن هه‌ڤپه‌يمانان ل 23 ئيلۆنێ ژ وان ژى سڤيل و زارۆ و ژن ل گه‌ل هنده‌كان ژى ژ جه‌بهه‌ت نوسره بووينه، به‌لێ پتريا وان ژى ژ داعش بووينه.
ره‌وانگه‌ها مافێن مرۆڤى ل سوريا راگه‌هاند كو ئه‌ڤرۆ رۆژا پێنجشه‌مبى هه‌تا نوكه كوشتنا 32 كه‌سان راگه‌هانديه كو شه‌ش ژ وان زارۆ بووينه و پێنج ژن ژ ئه‌نجامێ دربێن ئه‌سمانى يێن هێزێن هه‌ڤپه‌يمانا بۆ ده‌ڤه‌رێن په‌ترۆلى ل ده‌ڤه‌را حه‌سه‌كه‌يا باشوور و باشوورێ رۆژهه‌لات و دێر زۆر و ره‌قه و ريف ئه‌دله‌ب.
ره‌وانگه‌هێ ئه‌وا باره‌گايێ وێ يێ سه‌ره‌كى ل له‌نده‌ن دا زانين كو 57 كه‌س ژ جه‌بهه‌ت نوسره هاتينه كوشتن ژ ئه‌گه‌رێ دربێن ئه‌سمانى ل سه‌ر باره‌گايێن وان ل رۆژئاڤايێ حه‌له‌ب و باكوورێ ئيدلن.
ئاشكه‌را ژى كر كو 464 چه‌كدارێن داعش ژى هاتينه كوشتن و پتريا وان ژ ناسنامێن نه‌يێن سورى نه، ژ ئه‌نجامێ هێرشێن ئه‌سمانى و موشه‌كان ل باره‌گايێن داعش و جهێن په‌ترۆلێ ل حه‌مس و حه‌ما و حه‌له‌ب و حه‌سه‌كه ره‌قه و دێر زوور.
ره‌وانگه‌ها سورى ئه‌و ئێك ژى ل مالپه‌رێ خوه به‌لاڤكريه كو ئه‌و وه‌سان هزر دكه‌ن كو پترترين رێژا كوشتيان د ناڤ رێزێن داعش دا بوويه ئه‌وێن وان به‌لگه كرين هه‌تا نوكه.
