د شەش ھەیڤان دا نێزیکی 170 پەرتووکان ل دھۆکێ ھاتینە وەشاندن
ئه‌ڤرۆ نيوز:
رێڤەبەرێ پەرتوکخانێن گشتی بەحسێ رەوشا پەرتووکان ل پارێزگەھا دھۆکێ دکەت و ئاشکرا دکەت کو پلان ھەیە سێ پەرتوکخانێن دی ل پارێزگەھێ ڤەکەن، ھەروەسا چەندین رێ ھەنە بۆ گەھاندنا پەرتووکان بۆ پەرتووکخانێ و چەندین پرۆژە ھەنە بۆ سالا داھاتی بکەڤنە د بیاڤێ بجھئینانێ دا و گۆت:
ئسماعیل تاھر رێڤەبەرێ پەرتوکخانێن گشتی ل پارێزگەھا دھۆکێ بۆ رۆژناما ئەڤرۆ گۆت: مە رێڤەبەریا گشتی یا پەرتوکخانێن گشتی ل پارێزگەھا دھۆک جوداکر، پەرتوکخانا بەدرخانیان، ل گەل یا زاخۆ، ئاکرێ، ئامێدیێ چوار پەرتوکخانەنە سەر ب رێڤەبەریا پەرتوکخانێن گشتی ل دھۆکێ و ئەم پشکەکین سەر ب رێڤەبەریا پەرتوکخانێن گشتی ل ھەرێما کوردستانێ و پشکەکین سەر ب وەزارەتا رەوشەنبیری ڤە ل ھەرێما کوردستانێ، د ماوێ حەفت ھەیڤێن بۆری دا ھاتیمە ڤێرێ پەرتوکخانە ھاتە ڤاڤارتن و پەرتووک ھەموو ھاتنە ژێک جوداکرن و ھۆلەکا مەزن بۆ پەرتوکێن عەرەبی ھاتە تەرخانکرن و جھەکێ تایبەت بۆ رۆژنامە و گۆڤاران ھاتە تەرخانکرن و جھەکێ تایبەت بۆ پەرتووکێن زارۆکان و ئێکێ تایبەت بۆ زمانێن بیانی ھاتە تەرخانکرن، دیسا ل گەل نامێن ماستەر و دکتورایی، دیسا سێ جە ھاتینە تەرخانکرن بۆ خەلکێ قەستا پەرتوکخانێ دکەت و پەرتووکان دخوینن و دیسا جھێ وەرگرتنا پەرتووکان بۆ چەند دەمژمێران و ھەتا ببەتە مال ل گەل پێرابوونێن قانوونی و ئەڤە نیاسینا وی مرۆڤی یە دا پەرتووکا مە بەرزە نەبیت و بزڤرینتە ڤە و د چاڤێن مە دا ھەر پەرتووک سامانەکێ گەلەک گرنگە د پەرتووکخانێ دا.
ناڤبری ئەو ژی گۆت: ھەتا نوکە 75 ھزار ناڤ و نیشانێن پەرتووک ل پەرتوکخانا بەدرخانیان ھەنە و ھندەک پەرتوکان ھەتا پێنچ و ھەتا 12 دانە مە ھەنە.
ناڤبری ھێشتا گۆت: دو کەسێن شارەزا وە رێڤەبەرێن پەرتوکخانا بەدرخانیان ھاتینە دەست نیشانکرن بۆ دەوامێن سپێدێ و ئێڤاری و دیسا دانوستاندن ل گەل پەروەردێ ھاتینەکرن بۆ سالا خواندنێ رۆژانە قوتابی سەرەدانا پەرتووکخانان بکەن و پشک بۆ بھێنە شرۆڤەکرن و بزانیت پەرتووکخانە چیە و دیسا ل گەل زانکۆیا دھۆکێ، دیسا مە مالپەر ھەنە و ئەم ناڤێ کەسێ پەرتووک چێکری و ناڤێ پەرتووکێ زانین و ھەر کەسەکێ سەرەدانا مە بکەت و ھەر پەیڤەکێ بێژیت ئێکسەر دێ پەرتووک بۆ ھێتە دیارکرن.
رێڤەبەرێ پەرتوکخانێن گشتی ئەو چەندە ژی ئاشکراکر کو پشکا شێری یا پەرتووکان ل پەرتووکخانێ عەرەبی نە و ئەڤە ژی دھێتە ڤەگەراندن بۆ ھندێ کو پەرتووکخانە ل سالا 1962 ھاتیە دانان و سەر ب موسل ڤە بوو و پەرتووک ھەموو ژ وێرێ دھاتن و کەڤنترین دەستنڤیس ل دەف مە ھەیە یا 1191 مشەختیە و ئەڤە بەری 300 سالان بوویە و ئەڤە ھەموو د پاراستینە.
ل دۆر رێیێن ھاتنا پەرتووکان بۆ پەرتوکخانێ ناڤبری گۆت: پارە بھێنە تەرخانکرن ب رێیا لیژنەکێ و کرینا پەرتووکان ژ بازاری و ئەڤە ھاتنا من ھەتا نوکە ئەڤە نەبوویە، دیسا رێ ھەیە خەلک بۆ پەرتوکخانێ پەرتووکان بکرن، دیسا دەولەمەند ھەنە پارەکی تەرخان دکەن تایبەت دەمێ پیشانگەھەک یا پەرتوکان ڤە بیت بۆ کرینا پەرتووکان بۆ پەرتووکخانێ و ئەڤە ھەبووینە و دیسا رێیەکا دی ھەیە پەرتووکخانێن نڤیسەرێن مەزن و دەمێ وەغەردکەن مالێن وان پەرتوکێن وا بۆ مە دکەنە دیاری و ئەڤە ژی ھەبوویە و ئەڤ پەرتووکە ناڤ ل سەر ھاتنیە دانان و جودا ھاتینە دانان، رێیا چارێ دەمێ نڤیسەرەک پەرتووکا خوە چاپ دکەت بۆ مە 10 دانە دھێن و ئەم ل سەر پەرتووکخانێن خوە بەلاڤ دکەین.
ناڤبری ئەو ژی گۆت: مە پلان ھەیە وەک پەرتوکخانێن گشتی ل پارێزگەھا دھۆک سێ پەرتوکخانێن نوو ل پارێزگەھێ ڤەکەین ل قەزایێن (شێخان، بەردەرش، سێمێل) جە ھەیە و دەڤەردارێن و رێڤەبەرێن رەوەشەنبیری ل گەل دام و دەزگەھێن وان قەزا ھەموو ھاریکارن و ب تنێ چەند پێرابوون ل پارێزگەھێ ھەنە و ئەگەر بجە ھات ب زووترین دەم دێ ھێنە ڤەکرن، پاشی دێ ھەر ل ھندەک دەڤەرێن دی ھێتەکرن مینا (بامەرنێ، خانکێ، شاریا، باتێلێ، باتیفا، کانی ماسێ) بۆ جھێن خەلک مفاداربیت و دێ ب شێوەکێ تایبەت بن و ھەموو بزاڤێن مە ئەوە پتر خزمەتا خاندەڤانێ خوە بکەین و ب ھەر رێیەکا ھەبیت.
ئسماعیل تاھر گۆت: سوپاسیا عەبدالکریم زێباری دکەم، دورێن 100 ھزار پەرتوکێن ئەلکترونی ب سیدی و ھارد دا کرنە د کومپوتەرێن پەرتووکانێ دا و ھەموو ژی ژێک جوداکرن، دیسا ھندەک ژ وان پەرتوکان یین گوھداریکرنێ نە بۆ وان کەسان یێن کورە یان نەشێت بخوینیت دشێت گوھێ خوە بدەتێ و ئەڤە ل وەلاتێن پێشکەفتی ھەیە کو پەرتووکا گوھداریکرنێ و دشێی مال ژی گوھێ خوە بدەیێ و ھەتا د ترۆمبێلێ ژی دا گوھێ خوە بدەیێ.
رێڤەبەرێ پەرتوکخانێن گشتی ل پارێزگەھا دھۆک ئەو ژی نەڤەشارت و گۆت: نابیت چو پەرتووک ل بازاری بھێنە فرۆتن ئەگەر ژمارا راسپاردانا رێڤەبەریا مە ل سەر نەبیت، دیسا قوتابخانە ھەنە قەستا مە کرینە و مە پەرتووکێن خوە یێن زێدە بۆ کرینە دیاری و وان ژی پەرتووکخانە ل قوتابخانێن خوە داناینە، دیسا چووینە بنگەھێ زێوە مە دیت دێ مفایی ژ وەرگرن مە گەلەک پەرتووک دیاری داینێ، مێھڤانێن بیانی سەرەدانا پەرتووکخانێ دکەن و ھێشتا ئەو رەوشەنبیری بۆ مە چێنەبوویە دەمێ مێھڤانەک بۆ مە دھێت بینینە پەرتوکخانێ و ھەکە مێھڤانەک ژ دەرڤە ھەبیت دێ بەتە کافیەکێ یان جھەکێ گەشتیاری و خوزی ئەم ھەمی ھاریکارباین ل گەل ئیک، دیسا ھندەک کەس بووینە دوستێن پەرتووکێ و رۆژانە سەردانا پەرتوکخانێ دکەن و ئەگەر چەند رۆژان نەھێت ئەم پرسیار لێ دکەین.
ل دۆر جھێ پەرتووکخانا بەدرخانیان ناڤبری گۆت: جھێ مە یێ ستراتیجی یە و ل سەر جادا بارزانە و دیسا بەرامبەر ھەر دو پارکێن ئازادی و پانوراما و نێزیکی چەندین قوتابخانان یە و ئەو کەسێن ئەڤ جە ھەلبژارتی راستی زیرەک بووینە و ھزرەکا جوان بوویە و مە جھەکێ باش و ھەتا سەد کەسان ژی بھێن ئەم شێن روینە خوارێ و ھەتا ھولێن پەرتوکخانبَن دمەزنن، دیسا قوتابی وەرزێ خواندنێ گەلەک مفایی ژێَ وەردگرن و جھێن بەرفرەە بۆ خواندنێ ھەنە، دیسا کەسانێن شارەزا دھێنە پەرتووکخانێ و بابەتان گەنگەشە دکەن.
رێڤەبەرێ پەرتوکخانێن گشتی ل پارێزگەھێ ئەو ژی گۆت: د شەش ھەیڤێن بوری ھەتا 6500 ھزار کەسان سەرەدانا پەرتووکخانێ کرینە و ئەڤە یا کێمە، لێ ڤان کاودانان و ڤێ قەیرانێ ، دیسا ئەڤان شەش ھەیڤێن بوری دا مە وەک پەرتوکخانا بەدرخانیان 107 ژمارێن راسپاردنێ داینە، دیسا گەلەکا پەرتووکێن خوە برینە ھەولێر و سلێمانیێ و برینە تورکیا دشێین بێژین ھەتا 170 پەرتووکان ل پارێزگەھا دھۆک ھاتینە چاپکرن.
رێڤەبەرێ پەرتوکخانێن گشتی ئەو ژی گۆت: سوپاسیا کارگێریا پارێزگەھا دھۆک دکەم کوژمەکێ پارەیی دا مە و شیاین پتر ژ 300 پەرتووکان بۆ پەرتووکخانێ بکرین، مە چو ھاریکاری ژ کومپانی و رێکخراو و سازیێن حوکمەتێ نەوەرگرتینە، چونکە ب شێوەکێ گشتی د بێ پارەنە.
ل دووماھیێ ناڤبری گۆت: پەرتووک مە ھەنە و جە مە نینە بدانینێ، ب تنێ پەرتووکا نوو د پەرتووکخانا مە دا پیچەکێ یا کێمە و بەرۆڤاژی تشتێ کەڤن مە گەلەک ھەیە، ھیڤیا من ئەوە جھەکێ تایبەت بۆ دەستنڤیسان دروست بکەین و وان جامێن دژی توزێ دابین بکەین و ئەگەر پەرتووکێن گەلەک کەڤن دەڤ مە ھەبن ئەم نزانین دێ چاوا پارێزین ھەکە مە ئالاڤێن پاراستنێ نەبن.
