د فەرهەنگا پارتی و بارزانیێ نەمر دا كەركووك باژاڕەكێ كوردستانییە و دلێ كوردستانێ یە
نایف مەحموود
كەركووك ئەو باژار و پارێزگەها چەندین نەتەوە و پێكهاتێن جودا د ناڤ خوە دا هەمبێز دكەت و بوویە ناڤەندا چەندین ناسنامە و زمان و كولتوورێن جودا، ژ وان ژی كورد و عەرەب و توركمان و كلدانی. خۆیایە كو پارێزگەهەك ب ڤی ڕەنگی بیت؛ ئەڤە نموونەیا پێكڤەژیانێ یە و ڕێزگرتنە ل بیرورایێن هەمەڕەنگ و تێكهەل، هەلبەت ڕێباز و پەیرەوێ پارتی دیموكراتی كوردستان داكۆكیێ ل ڤێ چەندێ دكەت و پالپشتیەكا مەزن ل ڤی پەیرەوی دكەت داكو مافێن چ پێكهاتە و نەتەوەیان نە هێنە بنپێكرن. هەرچەندە یا ب ساناهی ژی نینە كو ب ڤی شێوەی پێكهاتا ڤی باژێڕی یا بێ كێشە و ئالۆزی بیت، بەلێ ب شێوەیەكێ گشتی ئەڤ جۆرە پێكڤەژیانە و هەڤدو قەبوولكرنە جهێ پەسەندێ یە ب حوكمێ وێ چەندێ نە گەهشتیە وی ڕادی ئێك یێ دی تەهمیش بكەت و قەبول نەكەت. ژ بەر ڤێ چەندێ وەك عورفەكێ دینی، ئەخلاقی، جڤاكی و سیاسی پێدڤیە ڕێز ل ڤێ چەندێ بهێتە گرتن و كەركووك ژی وەك نموونەیا باژێڕێ پێكڤەژیانێ بهێتە ناساندن. گەر بزڤڕینە ڕەهندێ سیاسی كا بۆچی ئەڤ باژێڕە ب ڤی ئاوای بوویە واقعەكێ دیرۆكی و هەتا ڤێگاڤێ ئەڤ پێكهاتە هەمی پێكڤە نیشتەجێبوویێن ڤێ پارێزگەهێنە، لێ ئەڤە دێ زڤڕیت بۆ گەلەك ئەگەر و هندەك هویربینیێن تایبەت ڕەنگە د ڤێ گۆتارێ دا جهێ ڤێ مژارێ نەكەت، ڤێجا ل ڤێرێ خالا هەرە گرنگ و ژ لایێ جوگرافی ڤە ئەڤ ئاخە د كەڤیتە د نەخشەیێ كوردستانێ دا ب هەمی وان بەلگە و دیكیومێنتێن مێژوویی كەركووك باژێڕەكێ كوردستانی یە، وەكی بارزانیێ نەمر باشترین پێناسە دایێ و گۆتی: “ كەركووك دلێ كوردستانێ یە “ ئەڤجا ب حوكمێ كو كەركووك باژێڕەكێ كوردستانیە، بەلێ ژبەر هندەك ئەگەرێن سیاسی و نەخاسمە باژێڕەكێ دەولەمەندە ب كانزایێ نەفتێ، ڤێ چەندێ ئەو واقع چێكر كو ببیتە جهێ ناكۆكی و شەڕ و بهەڤچوونان بتایبەت ژ لایێ عەرەبان ڤە وان دەستێن هەرێمایەتی و حەتا دەولەتێن زلهێز ژی ئەوێن هاتینە دناڤ ڤێ گۆرەپانێ دا. بێگۆمان پارتی وەك حزبەك سەرقافلەیا بزاڤا ڕزگاریخوازا گەلێ كوردستانێ بوویە و ژ پێناڤی ڤێ چەندێ ڕۆبارەكێ خوینێ ڕشتیە حەتا ئەڤڕۆ ل بن سیبەرا ئالایێ كوردستانێ هەناسەیا ئازادیێ دكێشین و ژیانێ دشۆپینین. داكو نێزیكی مەبەستا خۆ ببین و مژارا ڤێ داویێ یا كو بوویە دەنگ و باسەكێ میدیایی یێ گەرم، نەخاسمە گوهۆڕینا پارێزگەرێ كورد ب ئێكێ غەیری كورد و وان ڕێكەفتنێن ژێربژێر یێن كوتلە و لایەنێن سیاسی ژ بەر هندەك بەرژەوەندی و سەفەقاتێت بازڕگانی یێن تایبەت و ڤێ چەندێ ژی دلگرانیەكا مەزن ئێخستە ناڤ جادا كوردستانی هەمیێ و ئەو چەندە د سەرێ هەمی تاكێ كوورد دا خەملاند و ئەڤ پرسە چێكر: ئەرێ چاوا چێدبیت ئەڤ پۆستێ گرنگ ببیتە كالایەكێ ئەرزان و هو بساناهی ژدەرڤەی ڕەزامەندی و بێ ئاگەهیا لایەنێن كوردستانی ب لایەنەكێ دی بهێتە ئالوگورگرن؟ ب ڕاستی ژی جهێ پرسیارێ یە كو پۆستەكێ هۆسا یێ گرنگ دناڤ ڕێكەفتنێن مژاویدا ببیتە بێ بهاكرنا دەنگ و ئیرادەیا خەلكێ كەركووكێ یێ كورد! لەورا پێدڤی بوو ل شوینا ڤێ هەڤڕكی و ڤێ سیاسەتا تاكڕەویانە پێنگاڤەكا دی یا كوردستانیانە هاڤێتبا هاڤێتن و دەستێ براتی و كوردایەتیێ د گەل پارتی هاتبا درێژكرن بۆ هندێ ب هێزەكا ئێكگرتی شیابان پارێزگاریێ ل سەر مانەڤەیە پارێزگارەكێ كورد بكەن و ئیدارەیا پارێزگەها كەركووكێ بێی جوداكاری دناڤبەرا هیچ پێكهاتە و لایەنەكێ دی دا نەهێتەكرن و دگەلدا خزمەتا كەركووكیێن كورد هاتبا كرن و مافێن وان ژی هاتبانە پاراستن، ئها ل وی دەمی دا سەنگ و هەیبەتا كوردان د چاڤێن نەیار و نەحەزان دا ب ڕەنگەكێ دی بیت نەكو ب ڤی ئاوایێ هەی، چونكی كورد وەك پێكهاتەكێ سەرەكی و كاریگەر دشێت سەنگێ خوە هەبیت و هەبوونا خوە بسەلمینیت نەكو كەرامەتا وان بهێتە شكاندن. گەر ڕێكەفتنەكا دلخواز و هەڤسەنگ ل گور واقعێ كەركووكێ هاتبا كرن یا دویر با ژ هندەك ڕێكەفتنێن گوماناوی وی و بەرژەوەندیا كوردا و هەمی پێكهاتان دا هاتبا ئێكلاكرن هینگێ دا بەلانسا سیاسی و ئیداری د خزمەتا لایەنێ كوردستانی دا بیت و ل وی دەمی دا كەركووك ب جلێ كوردستانی و ئالایێ ڕەنگینێ كوردستانێ جوانتر دەركەڤیت نەكو ئەڤا چێبووی و بوویە دلگرانیەكا مەزن بۆ هەمی خەلكێ كوردستانێ. دەمێ ئەم دبێژین پارتی واتە درۆشمێ كوردایتی و خۆ ب دەستڤەنەبەردان و خۆ نەچەماندن بۆ دوژمنان، واتە حزبەك ل پێشیا سەنگەرێ بەڕەڤانی و بەرخوەدانێ، لەوما ئەڤ بزاڤ و پێكولا دهێتە كرن ژ دەرڤەی ڕەزامەندی و ئاگەهیا پارتی نیازێن خراب و پێشهاتێن نەباش چاڤەڕێی پاشەڕۆژا كەركووكێ دكەن، ئەڤ هێز و قورسایی یا هەی هێدی هێدی دێ بەرەف لاوازیێ ڤە چیت و بیتە قوربانی سیاسەتەكا چەوت و خەلكێ كوردستانێ تێدا زەرەرمەند بیت و باجا وێ سیاسەتا شاش دەت. لێ دڤێت د هەمان دەم ژی دا وێ ڕاستیێ ژی بزانین كو پارتی و حیكمەتا سەركردایەتیا وێ ڕێكێ نادەت ئەڤ پیلانە ل هەنبەر لاوازكرنا پێگەهێ كوردان جهێ خوە بكەن، بەلكی دێ هەمی پێكولان كەت كەركووكێ وەك باژێڕەكێ كوردستانی بهێلیت و كورد شانازیێ ب هەبوونا خوە بكەن.
