د كۆمبوونا لژنا ئاماده‌كرنا دستوورى دا سه‌رۆك ناهێته هه‌لبژارتن
ئه‌ڤرۆ نيوز، نيوار محه‌مه‌د سه‌ليم:
بڕياره سوبه‌هى رۆژا دوشه‌مبى رێكه‌فتى 25ى گۆلانا 2015ێ لژنا 21 كه‌سى يا ئاماده‌كرنا دستوورى كۆمبوونا خوه يا ئێكێ ب سه‌رپه‌رشتيا سه‌رۆكاتيا په‌رله‌مانێ كوردستانێ ئه‌نجام بده‌ت و په‌رله‌مانتاره‌ك ديار دكه‌ت ژى كو د وێ كۆمبوونێ دا، سه‌رۆك و جێگر و بڕيارده‌رێن لژنێ ناهێنه هه‌لبژارتن.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ بۆ ئه‌ڤرۆ نيوز گۆت: “بڕياره سوبه‌هى لژنا 21 كه‌سى يا ئاماده‌كرنا دستوورێ هه‌رێما كوردستانێ روونشتنا خوه يا ئێكێ ب سه‌رپه‌رشتيا سه‌رۆكاتيا په‌رله‌مانى ئه‌نجام بده‌ت”.
محه‌مه‌د عه‌لى ياسين زێده‌تر گۆت: “چ ئاماژه بۆ وێ چه‌ندێ نينن كو د ڤێ كۆمبوونێ دا، دێ سه‌رۆك و جێگر و بڕيارده‌رێن لژنێ هێنه هه‌لبژارتن، ژ به‌ر كو كۆمبوونا فراكسيۆنا پارتى ديموكراتى كوردستان به‌رى ده‌مه‌كێ كێم ب دووماهى هات و چو ئاماژه بۆ هه‌لبژارتنا ده‌سته‌يا سه‌رۆكاتيا لژنى نه‌بوو”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه بۆ وێ چه‌ندێ ژى كر كو هه‌كه ب گۆره‌يى رێژا ئه‌ندامێن لژنێ يان يێن په‌رله‌مانێ كوردستانێ بيت، دڤێت سه‌رۆكێ لژنێ ژ پارتى بيت، به‌لێ ژ به‌ر كو ئه‌ڤ لژنه ب سازان هاتيه دانان، هێشتا ده‌ستنيشان نه‌بوويه كا دێ ده‌سته‌يا سه‌رۆكاتيا لژنێ ب چ ره‌نگ بيت و بۆ كێ بيت.
د. ڤالا فه‌ريد، ئه‌نداما لژنا ئاماده‌كرنا دستوورى، بۆ ئه‌ڤرۆ نيوز گۆت: “سوبه‌هى زێده‌تر دێ كار ژ بوو دانانا ميكانيزمه‌كێ و چاوانيا كاركرنێ ل گه‌ل په‌يره‌وه‌كێ ناڤخۆ هێته كرن ژ به‌ر كو د قانوونا ژماره 4 يا سالا 2015ێ نه‌هاتيه دياركرن كا دێ لژنه ب چ ره‌نگ كارێن خوه كه‌ت، ب تنێ ئاماژه ب دو خالان هاتيه كرن، ئێك دڤێت د 90 رۆژان دا لژنه كارێن خوه ب دووماهى بينيت و يا دژى دڤێت كارێن لژنێ ب سازان بن”.
