د هه‌يڤا ره‌مه‌زانێ دا دێ ره‌وشا كاره‌با گشتى يا چاوان بيت؟
ئەڤرۆ نيوز:
وەزارەتا کارەبێ یا حوکمەتا ھەرێما کوردستانێ راگەھاند، وان ھەمی شیانێن خوە داینە کاری کو دانا کارەبێ د ھەیڤا ڕەمەزانا پیرۆز دا زێدە بکەن.
حەمە ئەمین ھەورامانی، پەیڤدارێ وەزارەتا کارەبا حوکمەتا ھەرێمێ د داخویانیەکێ دا دیار کر، ھەر چەندە نھا نێزیکی 15 دەمژمێران کارەبێ ددەنە وەلاتیان، بەلێ دێ بزاڤێ کەن بۆ ھەیڤا ڕەمەزانێ دەمژمێرێن کارەبێ زێدەتر لێ بکەن، ب تایبەتی د دەمێ پاشیڤێ دا.
پەیڤدارێ وەزارەتا کارەبا حوکمەتا ھەرێمێ گۆت ژی “ھەر چەندە نھا وەزارەتا مە شیانا دابینکرنا دو ھزار و 500 مێگاواتێن کارەبێ ھەیە، بەلێ خواستا ل سەر کارەبێ بۆ نێزیکی چار ھزار مێگاواتان بلند بوویە”.
حەمە ئەمین ھەورامی ئاماژە ب وێ ئێکێ ژی کر کو ئەو ل سەر کارکرنێ د پێڤانێن زیرەکێن کارەبێ دا بەردەوامن و ھەتا نھا ژی ئەو پرۆژە تمام نەبوویە.
ئەڤە د دەمەکی دایە ھەر سال ھەم د وەرزێ گەرمایێ دا و ھەم ژی د وەرزێ سەرمایێ دا وەزارەتا کارەبێ، ب بھانەیا بکارئینانا کارەبا زێدە بۆ ئامیرێن ھینکرنێ و گەرمکرنێ دانا کارەبا نیشتیمانی کێم دکەت.
