د په‌قينه‌كێ دا ل بامه‌رنێ دو كه‌س بونه قوربانى
ئه‌ڤرۆ نیوز، نه‌وزاد هلۆرى :
به‌رى ده‌مه‌كێ كێم ل نێزیك فرۆكخانا بامه‌رنێ، ژ ئه‌نجامێ په‌قینه‌كێ دا دو كه‌س بونه قوربانى كو ئێك ژ وان گیانێ خوه ژ ده‌ست دا ، رێڤه‌به‌ریا ناحیا بامه‌رنێ ژى دیاركر په‌قين ژئه‌نجامێ قونبه‌له‌كا كه‌ڤن بوو كو دده‌مێ خوه دا هێزێن ئه‌مریكى هاڤێتیه ده‌وروبه‌رێن فرۆكخانا بامه‌رنێ.
حه‌مید زوبێر، رێڤه‌به‌رێ ناحیا بامه‌رنێ بۆ ئه‌ڤرۆ نیوز گۆت” به‌رى ده‌مه‌كێ كێم ئه‌ڤرۆ ئه‌ينيێ 9/2/2018، ل نێزیك فرۆكخانا بامه‌رنێ ژ ئه‌نجامێ ته‌قینا قونبه‌له‌كا كه‌ڤن كو به‌رى نوكه هێزێن ئه‌مریكى ل ده‌وروبه‌رێن فرۆكخانێ هاڤێتبوو، ژ ئه‌نجامى ده‌ستڤه‌دان و یاریپێكرنێ ب وێ قونبه‌لێ ژلايێ دو گه‌نجان ڤه، يا په‌قى و د ئه‌نجام دا ئێك ژ وان گیانێ خوه ژ ده‌ست دا و يێ ژى ب گرانى بریندار بوو”.
زێده‌تر گۆت” ئه‌و هه‌ردو گه‌نجه شڤان بوون و ل په‌ر په‌زى خوه بوون و خه‌لكێ بامه‌رنێ نه ، و نوكه ئه‌م وه‌كوكارگێریا ناحیێ ب هه‌ڤكاریا هێزێن ئه‌منى ڤه‌كۆلینێ ل سه‌ر وێ په‌قينێ دكه‌ین “.
