د کارتا نشتیمانی دا مافێ ڤان نەتەوان ھاتیە خوارن
ئه‌ڤرۆ نيوز:
ئەندامەکێ پەرلەمانێ کوردستانێ ژ کۆتا ئەرمەنان راگەھاند، دکارتا نیشتمانی یا عیراقی دا چو ئاماژە ب گەلێ ئەرمەنی و گەلێ کلدوسریانی ئاشووری ژی نەھاتیە کرن وەکو نەتەوە ل عیراقێ و ئەڤە سەرپێچیەکا دیارە ل دستوورێ بەردەوامێ عیراقێ، و دیارکر کو وان داخوازا راستڤەکرنا ڤێ شاشیێ د کارتا نیشتمانی دا کریە ب رێیا مەترانێ ئەرمەنا ل بەغدا و ھەکە ھات ئەو راستڤەکرن نەھاتە ئەنجامدان، دێ داخوازا ڤەکێشانا بنگەھێ مەترانیا ئەرمەنی ژ بەغدا بۆ ھەرێما کوردستانێ کەین.
یروانت نیسان، ئەندامێ پەرلەمانێ کوردستانێ ژ کۆتا ئەرمەنان بۆ رۆژناما ئەڤرۆ گۆت” ل دەمێ داگرتنا فۆرما تایبەت ب کارتا نیشتمانی یا عیراقی د خانا نەتەوە دا، تنێ نەتەوێن عەرەب، کورد و تورکمان تێدا ھەیە زێدەباری پەیڤا ( یێن دی)، و نەتەوێ ئەرمەن و نەتەوێ کلدو سریانی ئاشووری تێدا نینن”.
یروانتی گۆت ژی” کارتا نیشتمانی یا عیراقی ژ دەستھەلاتێن رەھا یێن حوکمەتا عیراقێ نە، حوکمەتا ھەرێما کوردستانێ ژی یا ئاگەھدارە ل دۆر ڤی بابەتی و پێدڤیە ڤێ پرسی دناڤ جڤاتا نوونەرێن عیراقێ دا بەحس بکەت ب رێیا پەرلەمانتارێن ھەرێما کوردستانێ ل جڤاتا نوونەران کو مە ئەو ژی ئاگەھدار کرینە ل سەر ڤی بابەتی، دیسا مە داخواز ژ مەترانیا ئەرمەنی ل بەغدا کریە کو ل گەل مەرجەعیاتان باخڤیت”.
دیسا گۆت” ھەبوونا ئەرمەنیان ل عیراقێ یا کەڤنە و ل سەردەمێ بابلیان ژی ئەرمەنی ل عیراقێ ھەبوون و نوکە ب کێمی نێزیکی 9 ھزار ئەرمەنی یێن ل عیراقێ و ھەرێما کوردستانێ ھەین و مە ژلایێ خوەڤە وەلاتیێن خوە یێن ئەرمەن یێن ئاگەھدارکرین کو فۆرمێن کارتا نیشتمانی یا عیراقی نە داگرن ژبەر نەبوونا خانا تایبەت ب نەتەوێ ئەرمەن ڤە”.
دیاکر ژی” ل دووڤ مادێ سێ یێ دستوورێ عیراقێ، عیراق وەلاتەکە چەندین پێکھات و مەزاھبان ب خوەڤە دگریت، و چو مەزھەبێن سەرەکی نینن، بەلێ ئاماژێ ددەت کو زمانێن عەرەبی و کوردی زمانێن سەرەکی نە ل عیراقێ، بەلێ زمانێن دی ژی یێن ھەین ل دووڤ مادێ چار، بەلێ دبیت نەتەوە ل دەف وان نە ھند یا گرنگ بیت، بەلکو ئایین گرنگتر بیت ژ نەتەوەی، ئەم ژی وەکو ئەرمەنیێن کوردستانێ رازی نابین ل سەر ڤێ چەندێ، چونکی ل دەمێ حوکرشانیا حزب بەعس، ئەمەنیان خوە وەکو ئەرمەن دانابوو، حوکمەتا عیراقی یا نوکە ئەوا خوە ب دیموکراتی ددەتە نیاسین، بەلێ دھەمان دەم دا ئەرمەنیان و کلدوسریانی ئاشووریان لاددەن د کارتا نیشتمانی دا، ئەم ژی عیراقێ ناھەژمێرین عیراقا مە و شەرمە ئەم ئێدی خوە ب عیراقی بدەینە نیاسین”.
یروانتی خویاکر ژی” ھەکە ھات و حوکمەتا عیراقێ ل دووڤ ڤێ داخوازیا مە نەھێت، دێ داخوازا ڤەگوھاستنا بنگەھێ مەترانیا ئەرمەنی ژ بەغدا بۆ ھەرێما کوردستانێ کەین، ژبەر ئەرمەنان ل ھەرێمێ کۆتا خوە یا ھەی و نوونەرێ خوە ل پەرلەمانێ کوردستانێ یێ ھەی”.
ل دۆر ھەلویستێ حزبێن ئاشووری، گۆت” وان نوونەرێن خوە یێن جڤاتا نوونەران دا ھەین ووەکو من زانی وان پەیوەندێ ب رێڤەبەرێ گشتیێ رەگەزنامێ ل عیراقێ کریە ل دۆر ڤی بابەتی وداخوازا راستڤەکرنا ڤێ شاشیێ یا کری”.