د ھەڤدیتنا AKP و CHP دا بەحسێ کوردان نەھاتە کرن
ئەڤرۆ نيوز:
دەزگەھێن راگەھاندنا تورکیا ناڤەرۆکا کۆمبوونا د ناڤبەرا AKP و CHP دا بەلاڤ کر کو ئەو کۆمبوون پتر ژ چار دەمژمێران بەردەوام کر و وەک درێژترین کۆمبوون بۆ ئاڤاکرنا کابینا نوو ل تورکیا ھاتە ل قەلەم دان، د وێ کۆمبوونێ دا پتر ل سەر دەستھەلاتێت سەرۆک کۆماری ھاتیە ئاخڤتن و سەرۆکێ CHP کەمال کلچدارئوگلۆ دیار کریە کو دڤێت ئەردۆگان ل گۆر دستووری سەرەدەریێ بکەت و نابیت کو دەستێوەردانێ د کاروبارێن حوکمەتێ دا بکەت و دیار کریە کو ئەم بەرھەڤین د کابینەکا چار سالان دا ل گەل ھەوە کار بکەین.
ل گۆر راگەھاندنێن تورکیا ئەحمەد داوود ئوگلۆ ژی دیار کریە کو مە دڤێت دستوورێ نھا یێ تورکیا بھێتە گوھۆرین و ل دستوورێ نوو دێ بابەتێ سەرۆک کۆماری و دەستھەلاتا وی ژی ھێتە نڤیسین و دڤێت ھوون پشتەڤانیێ ل بزاڤێن مە بۆ نڤیسینا دستوورەکێ نوو بکەن و کلچدارئوگلۆ ژی د بەرسڤا وی دا دیار کریە کو دڤێت ئەم ڤی بابەتی ل کۆمبوونەکا بەرفرەە ل گەل ئەندامێن سەرکردایەتیا پارتیا خوە گەنگەشە بکەین و پاشی دێ نێرینا خوە دیار کەین.
ھەروەسا خالەکا دی کو گەلەک بەحس لێ ھاتیە کرن بابەتێ وانێن ئایینی بوویە ل تورکیا کو CHP دیار کریە دڤێت ئەو بابەتە وەک بابەتێ زمانی ڤەکری بن و نەھێنە سەلماندن ل سەر قوتابیان و ل ھەمبەر وێ یەکێ ژی شاندێ ئاکپارتیێ دیار کریە کو بابەتێ گرێدای ئایینی ژی پشکەکن ژ وانێن کەلتوری و دڤێت ھەموو قوتابی بخوونن و فێر ببن و دڤێت ببیتە پشکەک ژ سیستەمێ خواندنێ ل تورکیا.
رۆژناما رادیکال ژی د راپۆرتەکێ دا دیار کریە کو د کۆمبوونا وان ھەر دو پارتیان دا ب چو رەنگەکێ بەحسێ قۆناغا ئاشتیێ و چارەکرنا پرسا کوردی نەھاتیە کرن و ھەروەسا بەحسێ پرسا عەلەویان ل تورکیا ژی نەھاتیە کرن کو نھا ئەو ژی وەک ئێک ژ پرسێن مەزن ل تورکیا دھێتە دیتن و دڤێت چارەیەک بۆ وان بھێتە دیتن، لێ مخابن ھەر دو پارتیێن مەزن یێن تورکیا کو دخوازن کابینەکێ ئاڤا بکەن بەحسێ بەرنامێ خوە بۆ چارەکرنا وان ھەر دو پرسێن مەزن یێن تورکیا نەکرینە و دیارە کو ئەو پارتیە ب جھێ کو ھزرا خزمەتێ بکەن پتر ھزرا ھندێ دکەن کو دێ چاوا شێن دەستھەلاتا خوە بەرفرەە بکەن و پاشەرۆژا سیاسی یا خوە گەرەنتی بکەن و ھەکە وەسا بیت ئەو ھەر دو پارتیە نەشێن کابینا نوو یا حوکمەتێ ئاڤا بکەن.
چاڤدێرێن سیاسی ل تورکیا ژی دیار دکەن کو قەیرانا نھا یا تورکیا بابەتێ چارەکرنا پرسا کوردی یە و ھەر کابینەک کو بھێتە ئاڤاکرن دڤێت بەر ھەر تشتەکێ نێرینا خوە ل ھەمبەر چارەکرنا پرسا کوردی دیار بکەت، پارتێن کو تنێ ھزرا کۆمکرنا دەنگان بکەن و براستی ژی بەرنامەکێ وان بۆ چارەکرنا مەزنترین پرسا تورکیا کو پرسا کوردیە، نەبیت ئەو نەشێن چار سالان ل تورکیا دەستھەلاتا خوە برێڤە ببەن.
ل ئالیێ دی ب دەھان سازی رێکخراوێن جڤاکێ مەدەنی ل تورکیا ژی د داخۆیانیێن جودا جودا داخواز ژ CHP کرن کو سەبارەت ب چارەکرنا پرسا کوردی، پرسا عەلەویان و دستوورێ نوو یێ تورکیا خوەدان ھەلویست بیت و وەک پارتیەک دیموکرات بەرەڤانیێ ل دیموکراسیا تورکیا بکەت و ببیتە پالدەرێ ئاشتیێ ل تورکیا، چونکو ھەکە وەسا نەبیت مەترسیا ھندێ ھەیە کو ئاکپارتی ل گەل پارتیا نەتەوەپەرست حوکمەتێ ئاڤا بکەن کو ئەو حوکمەتە ژی دێ حوکمەتا شەری بیت و ژ بلی وێرانیێ ژی تشتەکێ نادەتە تورکیا.
