د 14 سالێن بۆریدا بەغدا پارەیێ قەرەبۆكرنا زیانڤێكەفتیێن هەرێما كوردستانێ نەدایە
تەیف سامی، وەزیرا داراییا ئیراقێ د بەرسڤا نڤیسارەكا لژنەیەكا جڤاتا نوونەرێن ئیراقێ دبێژیت: پارەیێ قەرەبوویا مولك و مالێن زیانڤێكەفتیێن دەستێ دەستهەلاتا بەعس ل هەرێما كوردستانێ نەهاتیە دان، ئەڤە د دەمەكی دایە قانوونا قەرەبووكرنێ ل سالا 2010 یا هاتیە پەسەندكرن.
ئەو نڤیسارا تەیف سامی، وەزیرا داراییا ئیراقێ ل 12 مەها بۆری بوو بۆ لژنەیا شەهید و قوربانی و زیندانیێن سیاسی ل جڤاتا نوونەرێن ئیراقێ هاتیە هنارتن، ئەو ژی د بەرسڤا نڤیسارەكا ئەوێ لژنەیێ بوو كو داخواز ژێ كربوو رۆهنكرنێ بدەتێ ل دۆر ئەوێ چەندێ ئایا بودجەیا ئیراقێ پارە بۆ قەرەبووكرنا ئەوا وەلاتیێن خەلكێ هەرێما كوردستانێ كو ژ ئەگەرێ دەستهەلاتا بەعس زیان گەهشتینێ، هاتیە تەرخانكرن؟ پشتی كو قانوونا قەرەبووكرنا وەلاتیێن زیانڤێكەفتی ل سالا 2010 هاتیە پەسەندكرن.
چرۆ حەمە شەریف، ئەنداما لژنەیا شەهید و قوربانی و زیندانیێن سیاسی ل جڤاتا نوونەرێن ئیراقێ د داخۆیانییەكا رۆژنامەڤانیدا گوت» نڤیسارا وەزیرا داراییا ئیراقا فیدرال پشتەڤانییە بۆ سەلماندنا ئەوێ چەندێ كو پێشتر هیچ زیانڤێكەفتییەكێ دەستێ رژێما پێشتر نەهاتیە قەرەبووكرن. نڤیسارێ دێ كاریگەری ژی ل سەر راستڤەكرنا ئەوێ قانوونێ هەبیت كو نوكە ل جڤاتا نوونەرایە و د بزاڤێ داینە ئەو قەرەبووكرنە وەلاتییان ڤەگریت».
ل 24/7/2024، حەسەن سالم، سەرۆكێ لژنەیا شەهید و قوربانی و زیندانیێن سیاسی ل جڤاتا نوونەرێن ئیراقێ چار نڤیسار ئاراستەی ئالیێن پەیوەندیدارێن هەولێرێ و بەغدا كربوون ل دۆر قەرەبووكرنا زیانڤێكەفتیێن دەستێ رژێما بەعس ل هەرێما كوردستانێ بۆ ئەوێ چەندێ ئەو قەرەبووكرنە ئەوان ژی ڤەگریت. ئەو نڤیسار بۆ نوونەرایەتییا حوكمەتا هەرێما كوردستانێ ل بەغدا، جڤاتا بلند یا دادوەریێ ل ئیراقێ، وەزارەتا داراییا فیدرال، ئەمیندارییا گشتییا جڤاتا وەزیرێن ئیراقێ هاتبوو كرن.
چرۆ حەمە شەریف دیاركر» بەرسڤا سێ نڤیسارێن دی نەگەهشتییە دەستێ مە».
