ل 17 سالێن بۆرى 33 هزار كه‌س ل ده‌ریا ناڤه‌راست یێن خه‌ندقین
ئه‌ڤرۆ نیۆز، نه‌وزاد هلۆرى:
رێكخراوا نه‌ته‌وێن ئێكگرتى دیاركر كو ژسالا 2000 هه‌تا سالا 2017 زێده‌ترى 33 هزار كه‌سان ل ده‌ریا ناڤه‌راست یێن خه‌ندقین ده‌ما كو دڤیا ژوى ده‌ریای ده‌ربازببن و بگه‌هنه جیهانا ده‌رڤه.
ئاژانسا رویته‌رز به‌لاڤكریه كو رێكخراوا نێڤده‌وله‌تى یا په‌نابه‌ران دیاركر كو ب مه‌ره‌ما گه‌هشتن بۆ جیهانا ده‌رڤه دده‌مێ 17 سالێن بۆرى دا 33 هزار كه‌س ل ده‌ریا ناڤه‌راست خه‌ندقینه، و رێیا ناڤبرى ب ئێك ژ مه‌ترسیدارترین رێيێن سنورى كو كه‌س تێدا د بۆرن بۆ جیهانا ده‌رڤه دهێته هژمارتن.
هه‌ر ل گۆره‌ى پێزانينێن رێكخراوا ناڤبرى، رێژه‌یا قوربانیێن خه‌ندقینێ سال بۆ سالێ به‌ر ب زێده‌بوونێ ڤه دچن.
فیلیپ فارگ ئێكه ژ رێپورته‌رێن نه‌ته‌وێن ئێكگرتى و مامۆستایێ دامه‌زراوه‌یا زانكۆیه‌كا ئه‌ورۆپا ل فێلورانسى یا ئیتالى دبێژیت، رێككه‌فتنا ل گه‌ل توركیا ل دۆر په‌نابه‌رێن ده‌ریایى ژلایێ گاردیا ده‌ریا لیبیایێ ڤه ، گه‌شتا ده‌ریا ناڤه‌راست گه‌له‌ك ب مه‌ترسى كرینه، ژبه‌ركو رێیا وێ بۆ جهه‌كێ دوور و مه‌ترسیدارتر به‌ر ب ئیتالیا ڤه دگوهۆریت.
تنێ د 11 مه‌هێن بۆرى دا، سێ هزار په‌نابه‌ر ل رێیا ده‌ریا ناڤه‌راست بۆ ئه‌وروپا خه‌ندقینه و دهێته چاڤه‌رێكرن كو ئامارا خه‌ندقيا هه‌تا دوماهیا ئه‌ڤ ساله ببیته چار هزار و 757 په‌نابه‌ر.