راسته دێ مووچێ پێشمه‌رگه‌ى هێته كێمكرن؟
ئه‌ڤرۆ نيوز:
پشتی بەلاڤبوونا نووچەیێ کێمکرنا مووچێ ھێزێن ناڤخۆ و ئێمناھیێ نوکە پێزانین ھەنە مووچێ وەزارەتا پێشمەرگەی ژی بھێتە کێمکرن، ئەندامەکێ لیژنا پێشمەرگەی ژی دیار کر کو ھەتا نوکە ب فەرمی چو بڕیار ل دۆر کێمکرنا مووچێ ھێزێن پێشمەرگەی نەھاتینە دەرکرن.
مەحموود حاجی، ئەندامێ لیژنا پێشمەرگەی ل پەرلەمانێ کوردستانێ بۆ رۆژناما ئەڤرۆ دیار کر کو ھەتا نوکە چو پێزانینێن فەرمی ل دۆر کێمکرنا مووچێ ھێزێن پێشمەرگەی نەگەھشتینە بەردەستێ وان، لەوڕا ئەو وەکی پەرلەمانتار سەرەدەریێ دگەل پێزانینێن دروست دکەن نەک پڕۆپاکندێن دھێنە بەلاڤکرن، چونکی بشێوەیەکێ فەرمی ھێشتا چو بڕیار بۆ کێمکرنا مووچێن وەزارەتا پێشمەرگەی نەھاتینە دەرکرن و گۆت: “ئەوا نوکە دھێتە گۆتن ب تنێ پڕۆپاکندە و پێزانینێن نەفەرمی نە، لەوڕا نەشێم ئەڤێ پێزانینآ پشتڕاست بکەم ھەتا ب فەرمی نەھێتە راگەھاندن دێ کەنگی و چەوا ھێنە کێمکرن”.
ل دۆر ئێکگرتنا ھێزێن پێشمەرگەی مەحموود حاجی ئاشکرا کر کو بەری بۆیەرێن 16ی ئۆکتۆبەرێ بڕیاربوو ئەمریکا چار لیوایێن کوردی چێکەت، بەلێ مخابن ب تنێ دو لیوا ھاتنە پێکئینان ئەو ژی وەکی پێدڤی نەبوون، چونکی پێدڤیە ھەر لیوایەک ژ چار ھەتا پێنج ھزار سەربازان پێک بھێت و گۆت: “مە داخوازکربوو ب مەرج خەلک بھێتە وەرگرتن بۆ خزمەتا سەربازی نەک ب تەکەزیا حزبی خەلک بھێتە دامەزراندن، چونکی ل ھەموو جیھانێ دەمێ گەف ل ئاسایشا نەتەوەیی دھێتەکرن پێدڤیە ھێزەک ھەبیت بۆ بەڕەڤانیکرن و پاراستنا ئاسایشا نەتەوەیی”.