ھاریکاریا پەرلەمانی بۆ خێزانێن شه‌هيدێن شەڕێ دژی داعش ھاتیە ڕاگرتن
ئه‌ڤرۆ نيوز:
بڕیاردەرا لیژنا پێشمەرگەی ل پەرلەمانێ کوردستانێ دیار کر کو ھاریکاریا پەرلەمانی بۆ خێزانێن شەھیدێن شەڕێ دژی داعش ھاتیە ڕاگرتن و ھاریکاریا وەزارەتا پێشمەرگەی ژی بۆ خێزانێن شەھید و برینداران ژی وەکی پێدڤی ب ڕێڤە ناچیت.
بھار عەبدولڕەحمان، بڕیاردەرا لیژنا پێشمەرگەی ل پەرلەمانێ کوردستانێ بۆ رۆژناما ئەڤرۆ ئاشکرا کر، ھاریکاریا پەرلەمانێ کوردستانێ بۆ خێزانێن شەھیدێن شەڕێ دژی تیرۆرستێن داعش دو ملیۆن دیناربوون، بەلێ ئەڤە سالەکە ژ ئەگەرێ نەبوونا پارەی، ئەو ھاریکاریە گەلەک ب کێمی دھێتە مەزاختن و گۆت: “ب تنێ د حالەتەکی دا ئەو ھاریکاریە دھێتە مەزاختن، ھەکە خێزانا شەھیدەکی داخوازبکەت و ئەندامەکێ لیژنا پێشمەرگەی ل پەرلەمانی پشتەڤانیا داخوازا وێ خێزانێ بکەت، د وی دەمی دا دێ پارە بۆ ھێتە مەزاختن، ب شێوەیەکێ گشتی ھەتا نوکە پەرلەمانی بۆ نیڤا شەھیدێن شەڕێ دژی داعش ھاریکاری بەلاڤکرینە و پڕۆسا بەلاڤکرنا پارەی ل سەر خێزانێن شەھیدان نوکە ی ھاتیە ڕاگرتن.
بھار خانێ ئاماژە ب وێ چەندێ ژی کر، وەزارەتا پێشمەرگەی ژی ھاریکاریێن ب ڤی رەنگی بۆ خێزانێن شەھیدێن دژی داعش ھەبووینە و بۆ خێزانا ھەر شەھیدەکێ پێنج ملیۆن دینار و بۆ برینداران ژی ملیۆنەک وەکو ھاریکاری د مەزاختن و گۆت: “مە دووڤچوون ل سەر ڤێ چەندێ کریە، نوکە وەزارەتا پێشمەرگەی ژی وەکی پێدڤی ئەڤێ ھاریکاریێ ناگەھینیتە خێزانێن شەھید و برینداران، ھەروەکو وەزارەتێ بۆ مە دیار کری، ئەگەر ئەوە کو پارە د بانکێ دا نینە، پڕۆسا بەلاڤکرنا ھاریکاریا وەزارەتا پێشمەرگەی یا بەردەوامە، بەلێ گەلەک ھێدی ب ڕێڤە دچیت، ئەم پێشبینی دکەین ھێشتا ھژمارەکا زۆرا خێزانێن شەھید و برینداران ئەڤ ھاریکاریە وەرنەگرتینە”.
