راوەستاندنا تڕۆمبێلان ل جادان دێ بیتە ب پارە
ئه‌ڤرۆ نيوز:
بەرپرسەکێ وەزارەتا باژێڕڤانیێ ئاشکرا کر کو بڕیارە حوکمەت پڕۆژێ ب کرێدانا جادێن باژێڕان بێخیتە د بیاڤێ بجە ئینانێ دا و گۆت: ” ئێدی وەکو پاڕکێن ڕاوەستاندنا تڕۆمبێلان دێ جادێن گشتی و بازرگانی ژی بۆ راوەستاندنا ترۆمبێلان بنە ب پارە”.
عەبدولحەمید مەجید، رێڤەبەرێ گشتیێ پلاندانانێ ل وەزارەتا باژێڕڤانی و گەشت و گوزارێ بۆ رۆژناما ئەڤرۆ دیار کر کو حوکمەتا ھەرێما کوردستانێ ب رێیا وەزارەتا بازرگانی پلانەکا دی ھەیە بۆ زێدەکرنا داھاتی و بڕیارە جادێن د ناڤ باژێڕان دا ب تایبەتی جادێن بازرگانی ب کرێ ب دەتەف وەلاتیان و گۆت: “ھەر وەلاتیەکێ ترۆمبێلا خوە ل جادێن باژێران ب راوەستینیت ب تایبەت ل جھێن بازرگانی دێ پارە وەکو پارکێن راوەستاندنا ترۆمبێلان ژێ ھێنە وەرگرتن و بۆ ڤێ مەرەمێ ل سلێمانیێ بەرھەڤی ھاتینەکرن و ل ھەولێرێ ژی بازاڕ ل سەر دو بازنا ھاتیە بەلاڤکرن و ل دھۆکێ ژی دێ بەرھەڤی ھێنەکرن و ئەڤ پڕۆژە دێ ب رێیا سەرێک زێدەکرنەکا ئاشکرا ب کەرتێ تایبەت ھێتەدان”.
ناڤھاتی ئاماژە دا وێ چەندێ کو ژ بلی زێدەکرنا داھاتی ئەڤ پرۆژە دێ قەرەبالغا د ناڤ بازاران دا ژی کێم کەت و گۆت: ” ل گۆرەی پڕۆژێ ل بەردەستێ وەزارەتێ دێ وەکو پاڕکێن تڕۆمبێلان راوەستاندنا تڕۆمبێلان ب دەمژمێر بیت بۆ نموونە ھەکە وەلاتیەک تڕۆمبێلا خوە دەمژمێرەکێ ل جادەکێ ب راوەستینیت ب تنێ دێ کریا وێ دەمژمێرێ دەتە کۆمپانیێ”.
