راپۆرتەکا بەریتانی: ھێشتا زوویە حوکمەتا عیراقێ ڤێ سوزێ بدەت
ئەڤرۆ نیوز:
پشتی ئازادکرنا ھەموو دەڤەرێن روومادی یێن ژێر دەستێن چەکدارێن تیرۆرستێن داعشێ، حوکمەتا عیراقێ سۆزان ددەت باژێرێ موسلێ ئازاد بکەت، دوپاتکرن سالا 2016 دێ سالا ترس و لەرزێ بۆ توندڕەوێن داعشێ بیت، وەکی سزایەک بۆ وان کارێن ددەمێن بۆری دا ھاتینە ئەنجامدان.
تیلیگرافا یا بەریتانی ئاماژەدا ھندێ لەشکرێ عیراقێ شیان سەرکەفتنێ ل سەر چەکدارێن داعشێ تۆرمار بکەنو ئالایێ عیراقێ ل سەر دەزگەھێن حکومی یێن عیراقێ بھێتە بلندکرن، پشتی دەمەکێ درێژ و ھەڤڕکیەکا دژوار دناڤبەرا لەشکرێ عیراقێ و چەکدارێن داعشێ ل روومادی.
پشتی وێ سەرکەفتنێ یا ب ھاریکاریا دربێن ئەسمانیێ یێن فرۆکێن ئەمریکی و بەریتانی ھاتیە ئەنجامدان، ب گرنگترێن شەکەستنێن داعشێ دھێتە زانین ھەڤدەم وان شکەستنان یێن ل وەلاتێ سوریا ژی داعش تووش دبیت.
ژ ئالیەکێ دیڤە وەزیرێ دەرڤەیێ فرەنسا (فلیپ ھاموند) راگەھاند، لەشکرێ عیراقێ رۆلەکێ کاریگەر گێران ل دەڤەرا روومادی و ئاماژەدا ژدەستدانا روومادی شکەستنەکا مەزنە بۆ چەکدارێن داعشێ.
سەرۆک وەزیرێن عیراقێ حەیدەر عەبادی بۆ ئازادکرنا ھەموو ئاخا عیراقێ سۆز دا، کو سالا 2016 دێ بیتە نەھێلان و ژناڤبرنا داعشێ، ھەروەسا دیارکر حوکمەتا عیراقێ چو داگێرانا ل سەر ئازادکرنا موسلێ ناکەت، کو دێ بیتە دربەکێ کوژەک بۆ داعشێ، وەکی وی گۆتی.
ژئالیەکێ دیڤە سەرۆکێ پەرلەمانێ عیراقێ سەلیم جبوری دیارکر، روومادی پێنگاڤا ئێکێ یە بۆ ئازادکرنا ھەموو دڤەرێن ل ژێر دەستێن داعشێ کو دکەڤنە باکوورو رۆژئاڤایێ عیراقێ، بەلێ ل گۆڕ دیتنا ھندەک شرۆڤەکارێن سیاسی ھێشتا زویە بۆ وێ گۆتنێ.
تیلیگراف ھەروەسا خوەیاکر، ب دیتنا زۆربەیا شرۆڤەکارێن سیاسی و ئەمنیێن ل عیراقێ کو باژێرێ موسل وەکی روومادی نینە، کو پلاندانانا زڤراندنا موسلێ و دەرخستنا داعشێ پێدڤی ب ھێزەکا مەزن و شەرەکێ بلەز و دژوار ھەیە مەزنتر بیت ژ شەرێ روومادی.
ئێک ژ شرۆڤەکارێن عیراقی گۆت: مووسل جھەکێ تایبەت و جودا ھەیە چو بۆ ئالیێ لەشکرێ عیراقێ یان ژی بۆ چەکدارێن داعشێ، لەورا ھەردو ئالی ھەموو ھێز و شیانێن خوە دێ بکارئینن، بۆ ڤێ چەندێ ژی دڤێت لەشکرێ عیراقێ باشتر ھزرێن خوە تێدا بکەت، لەورا ب دیتنا وی خەونا ڤەگەریانا موسلێ د سالا 2016 ێ دا بدووری دبینیت.
ل گۆڕ رۆژناما ناڤبری لەشکرێ عیراقێ پێدڤی ب ھەموو شیانێن ھێزا لەشکریا خوەیا تایبەت ھەیە بتایبەتی پشت بۆ دەمێ 18 ھەیڤان شەرێ روومادی بەردەوام بووین.
