راگرتنا ھێلا ئاسمانی كارتێكرنه‌كا خراب ل خودانکرنا گۆلک و ئاژەلان كريه
ئەڤرۆ نیوز، نەوزاد ھلۆری:
قەزا ئامێدیێ ئێکە ژ باشترین جھێن ب خودانکرنا پرۆژێن گۆلک و ئاژەلێن خومالی ل ھەرێما کوردستانێ و زورترین پرۆژێن ب خودانکرنا وان ژی دکەڤنە دەڤەرێ، خودانێن پرۆژێن گولک و ئاژەلال ل شێلادزێ و دێرەلوک ددەن دیارکرن کو راگرتنا ھێلا ئاسمانی زیانێن زۆر گەھاندینە وان.
محەمەد عومەر خودانێ پرۆژەیەکێ ب خودانکرنا گۆلکایە ل شێلادزێ دیارکر کو ئەڤە نێزیکێ 20 سالایە ئەو بەردەوام کارێ ب خودانکرنا گۆلکان دکەت و بۆ ئەڤرۆ نیوز گۆت: (د ماوەیێ بوری دا چو جاران وەکو نھا زیان نەگەھشتینە مە و ئەگەر ژی دزڤریت بو راگرتنا ھێلا ئاسمانی و گرابوونا گۆلک و ئالفێ ب خودانکرنا وان ل ناڤخوە، ئەڤە سەرەرای کو دەستکەفتنا گۆلکان ژی کێمبوویە و زور ب زەحمەت کەفتیە).
زێدەتر گۆت: (من دو پرۆژێن کولکان ھەنە و ھەر پرۆژەیەکێ ژی نێزیکێ 70 سەرێن گۆلکێن گوشتی تێدا ھەنە و پرانیا وان من ژ جورجیا و ھندەک وەلاتێن دی کرینە، بەلێ نھا ب تایبەتی پشتی کو ھێزێن عیراقی ھاتینە سنوورێ کوردستانێ و ھێلا ئاسمانی ھاتیە گرتن زیانێن زۆر ب مە گەھشتینە ژ بەر کو ئەڤ یەک بوویە سەدەم گۆلک نەھێتە کوردستانێ و ئەگەر بھێت ژی دڤێت ب رێیا بەغدا بیت و ب ڤێ یەکێ ل سەر مە گران دبیت و وەلاتی ژ کرینا گوشتێ سور دوورر دکەڤیت، ئەڤە سەرەرای وەرزێ ب خودانکرنا وان ب سەرڤە دچیت، بۆ نمونە ب خودانکرنا گۆلکان نابیت ژ حەفت ھەیڤان ببۆریت بەروڤاژی زیان ب خودانێن پرۆژان دکەڤن و د نھا دا ئەڤە زێدەتری 10 ھەیڤ ل سەر وەرزێ ب خودانکرنا گۆلکان بوری و چو دیار نینە بۆ فروتنا وان و ب ڤێ یەکی ژی ئەم ل سەر کیستێ خوە یێ مفایی ب خودان دکەین).
سیروان جەمیل ئەو ژی خودانێ ئێک ژ پرۆژێن گۆلکایە ل دەڤەرێ دیارکر کو ئەو گۆلکان ژ دەرڤە ب کیلۆ دکرن و ب کیلۆ ژی ل ناڤخوە دفرۆشن و بۆ ئەڤرۆ نیوز گۆت: (ئەم کیلۆیا گوشتێ گۆلکان ب 5 ھزار و 300 دیناران دکرین و نێزیکێ حەفت ھزار دیناران دفروشینە بازارێن گوشتفروشان و ئەو ژی ب بھایەکێ بلندتر دفروشنە وەلاتیان، بەلێ نھا ب ڤی بھایی ناھێتە فروتن ژ بەر کو قەیرانا دارایی دروست بوویە و خەلکی پارە نەمایە، داکەفتنا بھایی و کێمبوونا بھایێ گوشتی مەزنترین زیان ب مە گەھاندیە و ھەکە ھوسا بەردەوام بیت ئەم نکارین بەردەوام بین ل سەر کارێ خوە).
لەشکەر عەزیز بەرپرسێ سەرژێگەھـا شێلادزێ دیارکر کو پشتی روودانێن ڤی َدوماھیێ ل کەرکووک و دەڤەرێن کوردستانێ کێمترین کرین و فروتن ل سەر گۆلک و ئاژەلێن خومالی دھێتەکرن و بۆ ئەڤرۆ گۆت: (زۆرترین پرۆژێن ب خودانکرنا گۆلک و ئاژەلێن خومالی دکەڤنە سنوورێ ناحیا شێلادزێ و ھێتوتێ کو نێزیکێ 150 پرۆژەیانە، ئەڤ یەک ژی بوویە ئەگەر کو بارەگایێ سەرژێگەھـا ئامێدیێ ل شێلادزێ بھێتە چێکرن، نھا ب شێوەیەکێ گشتی رۆژانە ھەموو گوشتفروشێن شێلادزێ و دێرەلوک ل سەرژێگەھـا شێلادزێ گۆلک و ئاژەلێن خوە ڤەدکوژن).
زێدەتر گۆت: (بەری نھا ل رۆژانێن ئاسایی د ناڤبەرا 10 بۆ 15 گۆلکان دھێنە سەرژێکرن و ل رۆژانێن ھەلکەفتان ژی ھەتا 40 گۆلک و ئاژەلان دھاتنە سەرژێکرن، بەلێ نھا رۆژان پێنج گۆلک و ئاژەل و کێمتر ژی دھێنە سەرژێکرن کو ئەڤ یەک ژی رێژەیەک زۆر کێمە و مەزنترین زیانێ ل خودانێن پرۆژێن گۆلک و گوشتفروشان ددەت، ئەگەر ژی دزڤریت بۆ گرانبوونا ئالفی و گرتنا فروکخانێن ھەرێمێ، ئانکو ئەم دکارین بێژین کو گرتنا فروکخانا زێدەتری 70% پرۆژێن خودانکرنا گۆلک و ئاژەلا راگرتینە).
ناڤبری دیارکر ژی کو بەری نھا گۆلک ل جورجیا و ھندستان و بەرازیل و ھندەک ژ وەلاتێن ئورۆپی دگەھشتنە کوردستانێ بەلێ ماوەیەکێ زۆرە ھاتیە راگرتن و گۆت: (نھا بۆ دابینکرنا گۆلک و ئاژەلان پشتبەستن ب سوریا و ئیرانێ دھێتە کرن، بەلێ پرانیا وان قاچاخی نە، دیسان ژی پشت بەستن ل سەر ئاژەلێن خومالی دھێتە کرن، بەلێ ھەکە ھوسا بەردەوام بیت دێ کارتێکرن ل سەر کێمبوونا ئاژەلێن خومالی ھێتەکرن).
ڤەگێر ئورەماری خودانێ ئێک ژ بازارێن گوشتفرۆشان ل شێلادزێ دیارکر کو ئەو وەکو خودان بازارێن گوشتفروشێن شێلادزێ پێگریێ ب رێنمایێن سەرژێگەھـ و ڤیتەرنەریا شێلادزێ دکەن و گۆت: (د نھا دا بھایێ گوشتێ سور گەلەک ئەرزانبوویە و ئەگەر بەری نھا مە روژانە دو گۆلک ڤەکوشت بن د نھا دا دو سێ رۆژان ئێکێ ڤەدکوژین، نھا کیلۆیا گوشتی د ناڤبەرا پێنج ھزار بۆ 13 ھزار دیناران دھێتە فرۆتن و ل سەر جورێ گوشتی دمینیت).
ل سنوورێ قەزا ئامێدیی َھەتا نێزیکێ 250 پرۆژێن ب خودانکرنا گۆلک و ئاژەلان ھەنە، ئەڤە سەرەرای ل گەل ھەبوونا 11 گوشتفروشان ل شێلادزێ و چوار گوشت فرۆشان ل دێرەلوک و نێزیکێ 10 گوشتفروشێن دن ل سەنتەر و دەروبەرێن ئامێدیێ.