راگه‌هاندنا ئەلکترونی دێ ب قانوون ھێتە رێکخستن
ئەڤرۆ نیوز، نەوزاد ھلۆری:
ب مەرەما زێدەتر رێکخستنا کارێ میدیای ل کوردستانێ و ڤەگوھاستنا ھەوال و نوچەیێن حوکمەتا ھەرێما کوردستانێ، بزاڤ دھێتەکرن کو تورەکا میدیای یا حوکمی بھێتە دامەزراندن.
موحسن ئەرتیسی،ئەندامێ پەرلەمانێ کوردستانێ بۆ ئەڤرۆ نیوز گۆت: (ل ھەرێما کوردستانێ میدیا ب گشتی و میدیا ئەلکترونی ب تایبەتی ب ھەموو جورێن خوڤە، بێی ل بەرچاڤگرتنا ئاسایشا نەتەوەی، دەمەکێ درێژە رادبن ب بەلاڤکرنا ھەوال و نوچەیێن نەراست، بابەتێن ھەستیار د لڤینن و دبیتە ئەگەرێ دروستبونا دوبەرەکیێ دناڤ جڤاکی دا و رەنگڤەدانێن جڤاکی و سیاسی ل پەی دروست دبن و شیرازا جڤاکی دھێتە تێکدان ژبەرڤێ پێدڤی یە بھێتە رێکخستن).
زێدەتر گۆت: (ب مەرەما رێکخستنا میدیایێ داکو ئێدی د بەرژەوەندیا جڤاکی و ئاسایشا نەتەوەی کار بکەت، پەرلەمانێ کوردستانێ بەرھەڤیان دکەت کو میدیایێ ب گشتی و میدیا ئەلکترونی ب تایبەتی ب گورەی قانون بھێتە رێکخستن، کو ئێدی چو کەس و لایەن ھەوال و نوچەیێن بەرەلا بەلاڤ نەکەن، نوکە ل پەرلەمانێ کوردستانێ لژنا رەوشەنبیری لسەر کارە بو بەرھەڤکرنا پرۆژە پێشنیارەکێ و دیسان بزاڤ دھێنەکرن کو دکابینا نوو یا حوکمەتا ھەرێما کوردستانێ تورەکا میدیایی یا سەر ب حوکمەتا ھەرێما کوردستانێ بھێتە دامەزراندن و ببیتە ژێدەرێ ھەوال و پێزانینێن دورست).
