فه‌رمانده‌یا گشتى یا هێزێن پێشمه‌رگێ كوردستانێ – ئێكه‌تى خیانه‌تكر و كوسره‌ت ره‌سول بتنێ هێلا
ئه‌ڤرۆ نیوز ، هلورى:
فه‌رمانده‌یا گشتى یا هێزێن پێشمه‌رگێ كوردستانێ راگه‌هاندنه‌كا بله‌ز به‌لاڤكر و دیاركر كو به‌رپرسیاره‌تیا هه‌موو شه‌رو روو ب رووبوونا د ستوویێ سه‌روك وه‌زیرێن عیراقێ دایه و ، ب داخن كو ئێكه‌تیا نیشتمانیا كوردستانێ سه‌نگه‌رێن خوه چولكرین و كوسه‌رت ره‌سول بتنێ هێلاى.
ئه‌ڤا ل خوارێ ده‌قا وێ یه
بو رایا گشتى یا كوردستانێ
سپێده‌هیا ئه‌ڤرۆ 16 چریا ئێكێ 2017 هێزێن حه‌شد شه‌عبى یێن سه‌ر ب سوپایێ پاسدارێن ئیرانێ ب فه‌رمانده‌یا ئیقبال پور ب هه‌ڤكاریا هێزێن عیراقێ هێرشه‌كا به‌رفره‌ه بو سه‌ر كه‌ركوكێ و ده‌ڤه‌رێن ده‌ردورا وێ ده‌ستپێكر ، ئه‌ڤ یه‌ك ژى ب ئاشكرایى رادگه‌هینیت كو دژى گه‌لێ كوردستانێ یه.
ئه‌ڤ هێرشه كو ژلایێ حكومه‌تا عیراقێ و حه‌شد و هێزێن سه‌ر ب قه‌واره‌یێ قودسا سوپایێ پاسداران ئه‌نجامدایه ، وه‌كو تولڤه‌كرن بوویه دژى خه‌لكێ كوردستانێ كو داخوازا ئازادیێ دكر و توله‌یه‌كه بو سه‌ر خه‌لكێ سه‌ربلندێ كه‌ركوكێ كو هه‌لویسته‌كێ مه‌ردانه راگه‌هاندبوو بو گه‌لێ كوردستانێ.
ب لێبورین ڤه هنده‌ك به‌رپرسێن ئێكه‌تى ژى هه‌ڤكاربوون و پیلان دژى گه‌لێ كوردستانێ كریه و كو ئه‌ڤ یه‌ك ژى خیانه‌ته‌كا مه‌زن و دیروكى یه لسه‌ر كوردستانێ و ئه‌وان شه‌هیدێن كو لژێر ئالایێ ئێكه‌تى گیانێ خوه كریه قوربانێ كوردستانێ ، ئه‌وان به‌رپرسان چه‌ند جهه‌كێن هه‌ستیار یێن كه‌ركوكێ بێى شه‌ر بو هێزێن حه‌شد شه‌عبى و سوپایێ پاسدارێن ئیرانێ چول كرینه و كوسره‌ت ره‌سول بتنێ هێلایه.
بو هه‌موو لایه‌كێ رادگه‌هینین كو په‌لامارا حه‌شد و و هێزێن عیراقێ ب چه‌ك و زریپوس و ده‌بابه و ئابرامزى ئه‌مریكى و چه‌كێ هه‌ڤپه‌یمانان ئه‌نجامدایه ، ئه‌ڤ چه‌كه ژى ده‌مه‌كه لژێر ناڤێ شه‌رێ داعش بو سوپایێ عیراق و حه‌شد دهێته‌دان ، ئه‌ڤه د ده‌مه‌كێ دایه كو هێزێن پێشمه‌رگه‌ى بو شه‌رێ دژى داعشێ پێویستى پێ هه‌بوویه و نه ددا.
ل ڤێره گه‌لێ كوردستانێ ل وێ یه‌كێ پشت راست دكه‌ین كو سه‌ره‌راى هه‌بوونا خیانه‌تێن هنده‌ك به‌رپرسان و ب پیلانێن حكومه‌ت و سوپایێ پاسداران ، به‌لى هێزێن پێشمه‌رگێ كوردستانێ ب وره‌یه‌كا بلند ڤه ل هه‌موو جهان كه‌فتینه د حاله‌تێ به‌رهه‌ڤیێ دا و ب قاره‌مانانه به‌ره‌ڤانیێ دكه‌ن و دوپات ژى كر كو نه‌یا مومكینه كو ئیرادا گه‌لێ كوردستانێ بشكێنن و رێك ناهێته‌دان كو ئه‌و سه‌ر بكه‌ڤن.
داخوازێ ل هه‌موو پێشمه‌رگه‌یێن راسته‌قینه‌یێن گه‌ل و وه‌لات و جه‌ماوه‌رێ خوراگرێ كوردستانێ ئه‌ڤێن كو به‌رى نها دوژمن شكاندى دكه‌ین بو به‌رخودان و په‌لاماردانا ئه‌وان پلانان به‌رهه‌ڤبن ، و به‌رپرسیارتیا ئێكێ یا شه‌رفروتنێ ب گه‌لێ كوردستانێ عه‌بادى یه دڤێت ئه‌و باجا ڤێ یه‌كێ بده‌تن.