راگەھاندنا تورکیا: چوونا پێشمەرگەی بۆ کۆبانێ نیشانا راکرنا سنۆرێ د ناڤبەرا کوردانە
ئەڤرۆ، سەرجان مەحمود:
چوونا پێشمەرگەی بۆ کۆبانێ ل باکورێ کوردستانێ و تورکیا بۆ رۆژەڤا ھەر کەسەکی راگەھاندنا تورکیا ژی دیار کرن کو کورد سنۆرێ د ناڤبەرا خوە دا رادکەن و کوردێن باکور ژی ئەو یەک وەک جەژنەکا نەتەوی رۆژە پیرۆرز کرن و دیار کرن کو ئەوە بەرھەمێ دبلۆماسیا سەرکەڤتی یا سەرۆکێ ھەرێما کوردستانێ یە و داخواز ژ ھێز و ئالیێن سیاسی یێن کوردستانێ ژی کرن کو د زووترین دەم کۆنگرێ نەتەوی ساز بکەن و ئێدی ھەموو ناکۆکیێن د ناڤبەرا خوە دا چارە بکەن.
چوونا ھێزا پێشمەرگەی بۆ کۆبانێ ب فەرمانا سەرۆکێ ھەرێما کوردستانێ و ب بریارا پەرلەمانێ کوردستانێ ل باکورێ کوردستانێ ل تورکیا بۆ رۆژەڤا سەرەکی یا دەزگەھێن راگەھاندنێ و رۆژنامێن تورکیا دیار کرن کو چوونا پێشمەرگەی پەیاما ئاشکرا یا کوردانە بۆ جیھانێ کو ئێدی چو کەسەک نەشێت رێگریێ ل ئێکەتیا کوردان بکەت و مەسعود بارزانی سەرۆکێ ھەرێما کوردستانێ شیا ب دبلۆماسیا خوە تورکیا نەچار بکەت کو رێکێ بدەن دا پێشمەرگە بچنە کۆبانێ و ئەوە بۆ کوردان دەستکەڤتنەکا دیرۆکی یە.
رۆژنامێن وەک رادیکال، مللیەت و ستار و گەلەک تەلەفزیۆنێن تورکیا دیار کرن کو چوونا پێشەرگەی بۆ کۆبانێ بۆ جھێ دلخوەشیا ھەموو کوردان و بێگومان نھا رەوشا کۆبانێ گەلەک ئالۆزە و ب چوونا پێشمەرگەی دێ ھەڤسەنگیا ھێزێ ھێتە گوھۆرین و دێ ورەیا شەرڤانان و خەلکێ کوبانێ ژی بلندتر بیت و خالا دی یا گرنگ ئەوە کو ب چوونا پێشمەرگەی کوردان ئەڤ پەیامە دا ھەموو جیھانێ کو ئەم ئێک ملەتین و چو کەسەک نەشێت ئێکەتیا مە تێک بدەت و ژ بەر وێ یەکێ ژی چوونا پێشمەرگەی دێ بیتە رۆژا دەستپێکرنا قۆناغەکا نوو د ناڤبەرا کوردان و ھەکە تورکیا ل سەر سیاسەتا خوە یا نھا ل ھەمبەر کوردان بەردەوام بیت دێ تووشی زیانەکا مەزن بیت.
گۆلتەن کشاناک ھەڤسەرۆکا باژێرڤانیا ئامەدێ ژی د ڤێ دەربارێ دا بۆ رۆژناما ئەڤرۆ دیار کر کو ئەز سۆپاسیا ھەلویستێ سەرۆک بارزانی و ھەرێما کوردستانێ دکەم راگەھاند کو ل ڤێ مەھێ گەلەک روودانێن خوەش و نەخوەش ل کوردستانێ دروست بوون، ھێرشا تیرۆرستێن داعشێ ل سەر کۆبانێ روودانەکا نەخوەش بوو، لێ رێککەڤتنا ل دھۆکێ و بریارا پەرلەمانێ کوردستانێ و چوونا پێشمەرگەی بۆ کۆبانێ ژی روودانێن گەلەک خوەش بوون و بوونە ئەگەرێ دەستپێکرنا قۆناغەکا نوو ل کوردستانێ.
ل ئالیێ دی ھژمارەک زێدە وەلاتیێن کورد یێن کو پێشەوازی ل پێشمەرگەی کربوون ژی دیار کرن کو ھەکە پێشمەرگە و شەرڤان پێکڤە شەرێ داعشێ بکەن دێ وان ژناڤ ببەن و دەمێ کورد ببنە ئێک ژی چو ھێزەک نەشێت کوردان لاواز بکەت و ئاریشا سەرەکی یا کوردان ھەتا نھا ئەو بوویە کو ھێزێن کوردی نەبووینە ئێک، لێ ئەم باوەرین کو ب چوونا پێشمەرگەی بۆ کۆبانێ ئێدی ئەو روودانێ بەرێ دوبارە نەبن و پارتێن کوردی ل سەر بنەمایێ بەرژەوەندیێن نەتەوی کار بکەن و ژ بەر وێ یەکێ ژی دڤێت د زووترین دەم کۆنگرێ نەتەوی یێ کوردستانێ ژی بھێتە گێران.
پارت و رێکخراوێن کوردی یێن ل باکورێ کوردستانێ ژی ب داخۆیانیێن جودا جودا پشتەڤانیا خوە بۆ چوونا پێشەرگەی بۆ کۆبانێ دیار کرن و سۆپاسیا ھەلویستێ نەتەوی یێ سەرۆکێ ھەرێما کوردستانێ کرن و دیار کرن کو دەمێ کورد ببنە ئێک دێ ھەموو دۆژمن ژی نەچار بن کو حسابەکا مەزن بۆ کوردان بکەن و ھەکە ئەو ھێزا کوردان نەبا نھا تورکیا نەدھێلا کو پێشمەرگە ژ ئاخا وێ دەربازی کۆبانێ ببن و دڤێت ھەردەم کورد شانازیێ ب سەرۆک بارزانی بکەن.
ل ئالیێ دی بەرپرسەکێ پارتیا ئێکەتیا دیموکراتی ل سووریێ ژی دیار کر کو ئەو دێ ب گەرمی پێشەوازیێ ل ھاتنا پێشمەرگی بۆ کۆبانێ کەن و ب ھاتنا وان دێ داعشێ تووشی شکەستنێ بیت و ژ بەر وێ یەکێ ژی چەند رۆژن کو تیرۆرستێن داعش دخوازن رێیا سنۆری بگرن دا کو ھێزێن پێشمەرگەی نەچنە کۆبانێ لێ ژ بەر بەرخوەدانیا شەرڤانێن کورد ھەتا نھا ئەو بزاڤێن داعشێ نەگەھشتنە چو ئەنجامەکێ و کۆبانێ سەلماند کو کورد ل سەر پیانە و چو ھێزەک نەشێت ئاستەنگیان ل ھەمبەر ئازادیا کوردان دروست کەت.
