راگەھاندنا جیھانێ: ئەمریکا پشتەڤانیەکا مەزن ددەتە سەرۆکاتیا بارزانى
ئەڤرۆ نيوز:
دەزگەھێن راگەھاندنا جیھانێ د نووچە و بابەت و راپۆرتێن خوە دا جھەکی گرنگ دانە ھەڤدیتنا د ناڤبەرا سەرۆکێ ھەرێما کوردستانێ و سەرۆک ئەرکانێ لەشکرێ ئەمریکا دا و راگەھاندن کو ھەردو ئالیان د کۆمبوونێ دا بەحسێ شەرێ ل دژی داعشێ کرینە و سەرۆک ئەرکانێ ئەمریکا داخواز ژ بارزانی کریە کو ئاریشەیێن د ناڤبەرا ئالیێن سیاسی دا چارە بکەت.
رۆژناما حورییەت یا تورکیا د راپۆرتەکێ دا ل سەر رەوشا ھەرێما کوردستانێ و سەرەدانا جۆسیف دانفۆرد سەرۆک ئەرکانێ ئەمریکا بۆ ھەولێرێ راوەستیایە و راگەھاندیە کو ئەمریکا و پرانیا گەلێ کورد و وەلاتێن جیھانی مەسعود بارزانی وەک سەرۆکێ ھەرێما کوردستانێ دبینن و د ھەڤدیتنا ل گەل بارزانی دا سەرۆک ئەرکانێ لەشکرێ ئەمریکا پشتەڤانیا خوە بۆ بارزانی دوپات کریە و ھەردو ئالیان بەحسێ رۆلێ پێشمەرگەی د شەرێ د دژی داعشێ دا کرینە.
رۆژناما واشنتۆن پۆست ژی د راپۆرتەکا خوە دا راگەھاندیە کو سەرۆک ئەرکانێ نوو یێ ئەمریکا ب سەرەدانا خوە یا ھەرێما کوردستانێ و کۆمبوونا ل گەل سەرۆکێ ھەرێما کوردستانا عیراقێ گرنگیا بارزانی و ھەرێما کوردستانێ بۆ ئەمریکا نیشا دایە و د پشکەکا دی یا راپۆرتێ دا ژی دیار کریە ئەمریکا داخواز ژ سەرۆکێ ھەرێما کوردستانێ مەسعود بارزانی کریە کو پارتێن سیاسی د رەوشا نھا یا کو شەرەکی دژوار ل دژی داعشێ دھێتە کرن د یەک سەنگەری دا کۆم بکەت.
ھەر د ڤێ دەربارێ دا رۆژناما دی زایدونگ یا ئەلمانی ژی جھەکی گرنگ دا سەرەدانا سەرۆک ئەرکانێ ئەمریکا بۆ ھەرێما کوردستانێ و راگەھاند کو وەسا دیارە ئەمریکا دخوازیت د دەمەکی نێزیک دا دەست ب ئۆپەراسیۆنا ئازادکرنا باژێرێ موسلێ ژ دەستێ تیرۆرستێن داعشێ بکەت و د ئۆپەراسیۆنا ئازادکرنا موسلێ دا رۆلێ سەرەکی دێ کەڤیتە سەر ملێن پێشمەرگەیێن کوردستانێ و ئاشکرا ژی کر کو سەرۆکێ ھەرێما کوردستانێ ژ سەرۆک ئەرکانێ ئەمریکا داخواز کریە کو راستەوخوە چەکێن پێشکەڤتی بدەنە ھەرێما کوردستانێ.
ل ئالیێ دی کەنالێ ٢٤ یێ ئیسپانی ژی د دەنگوباسێن خوە یێن ئێڤارێ دا راپۆرتەک تایبەت ل سەر ھەرێما کوردستانێ بەلاڤ کر و راگەھاند کو ھەرێما کوردستانێ د رەوشەکا دژوار دا دەرباز دبیت و چەند بشێت زووتر خوە ژ قەیرانا ئابووری و سیاسی رزگار بکەت ئەو ھندە ژی دشێت سەرکەڤتنێ د شەرێ داعشێ دا گەرەنتی بکەت، ھەروەسا راگەھاند ژی تاکەکەسێ کو ھەرێما کوردستانێ ژ پارچەبوونا سیاسی و قەیرانا ئابووری رزگار بکەت مەسعود بارزانی سەرۆکێ ھەرێما کوردستانێیە و ئەو دشێت ئالیێن سیاسی ل سەر چارەیەکا ھەڤپشک رازی بکەت.
دھێتە زانین سەرۆک ئەرکانێ نوو یێ لەشکرێ ئەمریکا د سەرەدانا خوە یا یەکێ دا بۆ دەرڤەی ئەمریکا چوو بوو ئیسرائیلێ و سەرەدانا خوە یا دویەم ژی بۆ کوردستانێ کر و دەزگەھێن راگەھاندنا جیھانی ڤان ھەردو سەرەدانان ژی ب گرنگ ب ناڤ کرن و ئاشکرا کرن کو ئەڤ ھەردو سەرەدان نیشانا نەخشێ نوو یێ ئەمریکایە ل رۆژھەلاتا ناڤین.
بەری سەرەدانا سەرۆک ئەرکانێ ئەمریکا بۆ کوردستانێ پەیڤدارێ کۆشکا سپی ژی د داخۆیانیەکی دا راگەھاند بوو کو کوردان د شکەستن و ژناڤبرنا داعشێ دا رۆلێ سەرەکی دیتیە و بۆ پاقژکرنا عیراقێ ژ تیرۆرستان ژی رۆلەکێ بەرچاڤ دکەڤیتە سەر ملێ کوردان.
