راگەھاندنا جیھانێ: داعش ب دەستێ پێشمەرگێن کوردستانێ یا ژناڤ دچیت
ئەڤرۆ:
پشتی سەرکەڤتنا ھێزێن پێشمەرگێن کوردستانێ ل دەڤەرا شنگالێ راگەھاندنێن جیھانێ ب گرنگی بەحسێ قارەمانیا کوردان دکەن و رادگەھینن کو داعشێ ترسەک مەزن ل سەر جیھانێ دروست کربوو و پێشمەرگێن کوردستانێ ئەو ترسە شکاند و داعش ب دەستێ کوردان لاواز بوویە و بەر ب نەمانێ دچیت و دڤێت ھەموو وەلاتێن جیھانێ پشتەڤانیا کوردان بکەن، چونکو کوردان ب جھێ ھەموو جیھانێ شەرێ تیرۆرێ کریە و نھا ژی دکەت.
ئاژانسا رویترز یا نووچەیان دوھی راپۆرتەک سەبارەت ب سەرکەڤتنێن ھێزێن پێشمەرگەی ل دەڤەرا شنگالێ بەلاڤ کر و د راپۆرتێ دا ھاتیە کو تیرۆرستێن داعش وەسا خوە دابوونە نیاسین کو ئەو چو دەمەکێ تووشی شکەستنێ نابن و دێ ھەر سەرکەڤن، لێ ھێزێن پێشمەرگەی ب چەکێن سڤک و بەرخوەدانەکا بێ وێنە شیان دربێن کۆژەک ل تیرۆرستێن داعشێ بدەن و وان ژ ھەموو دەڤەرێن خوە دەربخینن و ژ بەر ڤێ یەکێ ژی پێشمەرگە نھا د ناڤ خەلکێ دا وەک قارەمانیێن روناھیێ ل ھەمبەر ھێزەکا تاری دھێنە نیاسین و دڤێت وەلاتێن جیھانێ ژی چەکێن گران بدەنە کوردان و د ھەموو بیاڤەکێ دا ھاریکاریا وان بکەن، چونکو کوردان ب جھێ ھەموو جیھانێ شەرێ رێکخراوەکا تیرۆرستی یا درندە کر کو چو پیڤەرێن مرۆڤاتیێ ل دەڤ وان نەبوون.
رۆژناما واشنتۆن پۆست ژی د راپۆرتەکێ دا بەحسێ سەرکەڤتنێن ھێزا پێشمەرگەی ل ڤێ دووماھیێ دکەت و دیار دکەت کو شنگال بۆ ھەموو کوردان سیمبۆلە و دەمێ شنگال کەفتیە دەستێ داعشێ کورد ھەموو خەمگین بوون، لێ ھێزێن پێشمەرگەی ب ھاریکاریا فرۆکێن وەلاتێن ھەڤپەیمان شیان کو ھەموو دەڤەرێن سەر ب شنگالێ ژ دەستێ تیرۆرستان ئازاد بکەن و نھا خەلکێ ئێزدی ڤێ رۆژێ وەک جەژنەکا نەتەوی پیرۆز دکەن و کۆنترۆل کرنا شنگالێ دھێتە واتەیا دەستپێکرنا ژناڤچوونا داعشێ ل عیراقێ و دڤێت ئەمریکا و وەلاتێن ھەڤپەیمان ژی د چارچۆڤێ ستراتیژیا شەرێ دژی تیرۆرێ نەھێلن کو داعش جارەکا دی خوە ل سووریێ و دەڤەرێن دی یێن عیراقێ رێکخستن بکەت و ئەو دربێن کو پێشمەرگێن کورد ل وان داینە دشێت ببیتە دەلیڤەکا باش بۆ ژناڤچوونا داعشێ.
دەزگەھێن راگەھاندنا تورکیا ژی ب گرنگی بەحسێ سەرکەڤتنێن پێشمەرگەی کرن و دیار کرن کو کوردان سەلماند کو ئەو ھێزەکا سەرەکی نە ل دەڤەرا رۆژھەلاتا ناڤین و پێشمەرگەی ب چەکێن سڤک شیا دربێن کوژەک ل وێ رێکخراوا تیرۆرستی بدەت کو لەشکرێ ھەر دو وەلاتێن عیراق و سووریە دەمەکە نەشێن دەڤەرێن خوە ژ دەستێ وان دەربخینن و ژ بەر ڤێ یەکێ ژی نھا وەلاتێن جیھانێ گرنگیێ ددەنە کوردان و کورد بووینە ھەڤپەیمانێ رۆژئاڤا و دڤێت تورکیا ژی بریارا خوە بدەت و ب ھەموو رەنگەکێ ل گەل کوردان جە بگریت و شەرێ تیرۆرێ بکەت.
رۆژناما رادیکال د ڤێ دەربارێ دا جە ددەتە نڤیسەکا جەنگیز چاندار کو دبێژیت: سەرکەڤتنا پێشمەرگەی بوویە ئەگەر کو ھەرکەس ل جیھانێ کوردان وەک قارەمانێن ئازادیێ ببینین و ئێدی ھەر وەلاتەک دێ بزاڤێ کەت کو خوە نێزیکی کوردان بکەت و ئەڤە دێ دەلیڤەکا باش بیت بۆ کوردێن باکور کو بشێن ب رێیا پشتەڤانیا نێڤدەولەتی گڤاشتنان ل تورکیا بکەن دا کو پرسا کوردی بھێتە چارەکرن.
ئاژانسا مێھر یا ئیرانێ ژی د راپۆرتەکێ دا ئاماژە ب ڤێ یەکێ کر کو پێشمەرگە ھێزەکا مەزنە و خوەدان رۆلەک سەرەکی بوویە د شەرێ دژی تیرۆرێ دا و ھەکە حوکمەتا عیراقێ و یا ھەرێما کوردستانێ بشێن ھەماھەنگیەکا باش د ناڤبەرا خوە دا دروست بکەن دێ بشێن داعشێ ژ عیراقێ دەربخینن، لێ یا دیارە ئەمریکا دڤێت شەرێ داعشێ درێژ بکەت و بۆ خوە وەک بەھانەکێ بکار بینیت دا ل عیراقێ جێگر بیت و ھەتا ئەمریکا ل عیراقێ ھەبیت ژی دێ شەر و ئالۆزی بەردەوام بن.
