ره‌وش ل كۆبانێ يا باش نينه و داخوازا دربێن ئه‌سمانى دهێته كرن
ئه‌ڤرۆ نيوز:
هه‌ڤسه‌رۆكا PYD ل ناڤا كۆبانێ ره‌وش ل وێرێ ب “خراب” وه‌سفكر و داخواز ژ هێزێن هه‌پڤه‌يمانان كر كو هێرشێن خوه ل سه‌ر بنگه‌هێن چه‌كدارێن داعش دژوارتر لێ بكه‌ن.
ئاسيا عه‌بدولا، هه‌ڤسه‌رۆكا PYD دياكر كو نوكه ره‌وشا كۆبانێ يا خرابه و هه‌كه ئه‌وش ب ڤى ره‌نگى بيت نه‌يا باشه و ژ هێزێن هه‌ڤپه‌يمانان خواست كو دربێن خوه يێن ئه‌سمانى ل سه‌ر بنگه‌هێن چه‌كدارێن داعش دژوارتر لێ كه‌ن.
هێزێن هه‌ڤپه‌يمانان ل سه‌رۆكاتيا ئه‌مريكا به‌رده‌وام دربێن ئه‌سمانى د وه‌شيننه چه‌كدارێن داعش ل سوريا و عيراقێ و ب گۆره‌ى داخۆيانيێن په‌نتاگۆنێ ل ڤى ماوه‌يێ بۆرى ژى هێرشێن خوه يێن ئه‌سمانى زێده‌تر لێ كرينه.
هه‌ڤسه‌رۆكا PYD گۆت: “پێدڤيه هێزێن هه‌ڤپه‌يمانان هێرشێن خوه زێده‌تر و كاراتر لێ بكه‌ن دا كو چه‌كێ گرانێ داعش ژ ناڤ ببه‌ن”، ب ره‌نگه‌كى “شه‌رڤانێن كورد به‌ره‌ڤانيه‌كا قاره‌مانانه ل هه‌مبه‌ر چه‌كدارێن داعش كريه دا كو نه‌هێلن كۆبانێ بكه‌ڤيته ده‌ست داعش”.
ئاماژه ب وێ چه‌ندێ ژى كر كو زێده‌تر چه‌كێ وان يێ گران ژ ده‌ڤه‌رێن ره‌قه و وان لايان دهێت و گۆت: “پێدڤيه ل وان جهان هێزێن هه‌ڤپه‌يمانان دربێن خوه دژوار بكه‌ن و ب ڤێ چه‌ندێ ژى دێ رێ ل هه‌مبه‌ر پێشڤه‌چوونێن وان هێته گرتن”.
هێزێن يه‌كينه‌يێن پاراستنا گه‌ل ل كۆبانێ ل حه‌فتيا بۆرى شيان هه‌تا راده‌كێ باش چه‌كدارێن داعش بده‌نه پاش و ب گۆره‌ى زانياريێن ئه‌ڤرۆ نيوز نوكه ژى ره‌وشا كۆبانێ گه‌له‌ك يا ئالۆزه و شه‌ره‌كێ دژوار يێ ل ناڤا كۆبانێ دهێته كرن.
