ره‌ڤاندن و ده‌سته‌سه‌ركرنا سه‌كردێن كورد ژ لايێ په‌يه‌دێ ڤه يا به‌رده‌وامه
ئه‌ڤرۆ نيوز، فاتما مزوورى:
هنده‌ك چه‌كدارێن سه‌ر ب په‌يه‌دێ سه‌رۆكێ خوه‌جهيا ئه‌نه‌كه‌سێ يا قامشلۆ محه‌مه‌د ده‌هام ئه‌يۆ گرت و به‌ر ب جهه‌كێ نه‌ديار بر.
ئه‌مينداريا گشتى يا ئه‌نه‌كه‌سێ د داخۆيانيه‌كێ دا راگه‌هاند كو چارشه‌مبوويا ده‌رباس بوويى، ل دره‌نگى شه‌ڤ گرۆپه‌كێ چه‌كدار يێ سه‌ر ب پارتيا ئێكه‌تيا ديموكرات “په‌يه‌ده” سه‌رۆكێ خوه‌جهيا وان يا قامشلۆ و ئه‌ندامێ ده‌سته‌يا شيره‌تكاريا پارتيا ديموكرات يا كوردستانا سوريێ محه‌مه‌د ده‌هام ئه‌يۆ گرت و به‌ر ب جهه‌كێ نه‌ديار بر.
ئه‌نه‌كه‌سێ د داخۆيانيا خوه دا ئه‌و كار شه‌مرزار كر و ب كاره‌كێ تيرۆرستى ب ناڤ كر و داخوازا به‌ردانا هه‌موو گرتيێن خوه كرن.
جڤاتا كوردى د دووماهيا داخۆيانيا خوه دا، داخواز ژ هێزێن نشتيمانى و يێن جڤاكا سڤيل و لايه‌نێن كوردستانى كر كو فشاران ل سه‌ر په‌يه‌دێ زێده كه‌ن دا كو هه‌موو گرتيێن وان ژ زيندانان ده‌ربێخن.
ئه‌ڤرۆ سپێدێ ژى ئاسايشا باژێرێ قامشلۆ ده‌ست ب سه‌ر مالا ئه‌ندامێ كوميتا هه‌رێمى يا پارتيا ئێكه‌تيا كورد ل سوريا مه‌عسوم محه‌مه‌د دا گرت و ده‌سته‌سه‌ركر و به‌ر ب جهه‌كێ نه‌ديار بر.
پارتيا ئێكه‌تيا كورد د داخۆيانيه‌كێ دا راگه‌هاند كو ئه‌ڤرۆ سپێدێ ب سێ ترۆمبێلان ئاسايشا په‌يه‌دێ ل قامشلۆ چوونه سه‌ر مالا مه‌عسوم محه‌مه‌د و كورێ وى يێ 17 سالى ژى ده‌سته‌سه‌ركرن”.
مه‌عسوم محه‌مه‌د بابێ شه‌هيدێ پێشمه‌رگه شێرزاد مه‌عسوم محه‌مه‌ده كو د ناڤا له‌شكرێ رۆژ دابوو ل شنگال د شه‌رێ دژى داعش دا ل گه‌ل هه‌ڤالێ خوه ئه‌حمه‌د بۆزان قچۆ شه‌هيد ببوون.
