روسیا ناڤبژیڤانیێ د ناڤبەرا کوردان و رژێما ئەسەدی دا دکەت
ب ناڤبژیڤانیا روسیا، ھەڤدیتن و دانوستاندنێن د ناڤبەرا رژێما ئەسەد و رێڤەبەریا خوەسەر یا رۆژئاڤایێ کوردستانێ دا بەردەوام دکەن و ھەردو ئالی ل سەر ئۆتۆنۆمیا رۆژئاڤا کوردستانێ نێزیکی ھەڤدو بووینە لێ ھەتا نھا چو رێککەفتنەک نەھاتیە ئیمزاکرن.
زنار ساسۆن رۆژنامەڤانێ کورد ل قامشلۆ د داخۆیانیەکی دا راگەھاند کو ھەڤدیتن و دانوستاندنێن د ناڤبەرا رێڤەبەریا خوەسەر یا رۆژئاڤا و باکورێ سووریێ و رژێما ئەسەدی دا بەردەوام دکەن و ھەردو ئالی ل سەر ھژمارەک خالان گەلەک نێزیکی ھەڤدو بووینە و گۆت: (ھەتا نھا د ئەنجاما ھەڤدیتنان دا ل سەر بجە کرنا مافێن کوردان و مافێن کێم نەتەوە و باوەریێن جودا د دستووری دا تێگەھشتنەکا باش یا ھەی و رژێما ئەسەد قەبوول دکەت کو ھەرێمەکا ئۆتۆنۆمی یا رۆژئاڤایێ کوردستانێ ھەبیت لێ دخوازیت دەڤەرێن پەترۆلێ و خالێن سنۆری ل ژێر کۆنترۆلا دا وی دا بیت و ئالیێ کوردی ژی قەبوول ناکەت کو بیرێن پەترۆلێ و خالێن سنۆری بدەتە رژێما ئەسەدی و روسیا ژی بۆ ھەردو ئالیان پێشنیاز کریە کو لیژنەکا ھەڤپشک یا ژ ئۆتۆنۆمیا رۆژئاڤا و حوکمەتا سووریێ پێکڤە بیرێن پەترۆلێ و خالێن سنۆری برێڤە ببەن و ھەردو ئالی ژی ب ئەرێنی نێزیکی ڤێ پشنیازا روسیا دبن).
زناری راگەھاند ژی کو ئەو نووچەیێن د مالپەرێن ئنترنێتێ دا بەحسێ رێککەفتنا حەسەکێ دکەن نە راستە و ھەتا نھا رێککەفتنەک ب تەمامی د ناڤبەرا ھەردو ئالیان دا نینە و گۆت: (ھەڤدیتنێن د ناڤبەرا ئالیێ کوردی و رژێما ئەسەدی دا ب دەستپێشخەری ئانکۆ ناڤبژیڤانیا روسیا دھێنە کرن و دانوستاندن نە ل سەر باژێرەکی ئانکۆ دەڤەرەکی دھێنە کرن بەلکو ل سەر پاشەرۆژا سووریێ و رۆژئاڤایێ کوردستانێ دھێتە کرن و ھەتا نھا ل سەر چاوانیا برێڤەبرنا باژێرێ حەسەکێ گەنگەشە ل گەل رژێما ئەسەدی نەھاتنە کرن و دەمێ من ئەڤ پرسە ژ بەرپرسێن رۆژئاڤا و نوونەرێن رژێما ئەسەدی کر، ھەردو ئالیان ژی راگەھاندن کو چو رێککەفتنەک ل سەر باژێرێ حەسەکێ نەکرینە و د رۆژەڤا وان دا تشتەک وەسا نینە).
ناڤھاتی د پشکەکا دی یا ئاخڤتنا خوە دا ژی راگەھاند کو وەزیرێ دەرڤە یێ سووریێ ژی بۆ ئاژانسێن نووچەیان دیارکریە کو ھەڤدیتنێن وان ل گەل بەرپرسێن کورد ل باژێرێ قامشلۆ بەردەوام دکەن و ھەتا نھا ھەڤدیتنێن وان ئەرێنی نە لێ رێککەفتن نەھاتیە کرن و گۆت: (رۆژئاڤا ئانکۆ باکورێ سووریێ پشکەکە ژ ئاخا سووریێ و شەرڤانێن کورد پشکەک ژ ئاخا سووریێ ژ دەستێ تیرۆرستان دەرخستینە و پاراستینە و د قۆناغێن بھێت دا پەیوەندیێن مە ل گەل کوردان دێ گەھیتە ئاستەکی باشتر ژی و ئەم گەلێ کورد وەکو پشکەک ژ گەلێ سووریێ دبینین و د دەمێن داھاتی دا ھەموو پرسگرێکێن ھەی دێ ب ئاسانی ھێنە چارەکرن).
