روسیا ناھێلیت تورکیا ھێرشی عەفرینێ بکەت
ئەڤرۆ نيوز:
ئاژانسا سپۆتینگ نیۆز یا روسیا د راپۆرتەکێ دا دیار دکەت کو ھەرچەندە ھەتا نھا روسیا ب فەرمی داخواز ژ تورکیا نەکریە کو ھێرشێن خوە ل سەر گوندێن عەفرینێ بدەتە راگرتن لێ روسیا رێ نادەت کو تورکیا ھێرشی عەفرینێ بکەت، چونکو رێککەڤتنەکا نھینێ د ناڤبەرا روسیا و یەکینەیێن پاراستنا گەل دا ھەیە و ل گۆر وێ رێککەڤتنێ ژی دوھی ھێزێن کوردی بنگەھێ سەربازی یێ مینگ ل حەلەبێ رادەستێ روسیا کرن و ھەروەسا نھا گەلەک بنگەھێن سەربازی یێن روسیا ژی ل دەڤەرێن کوردی ھەنە و ئارمانجا سەرەکی یا وان ژی رێگری کرنە ژ ھێرشێن تورکیا.
د بەردەوامیا راپۆرتێ دا ئەو یەک ژی ھاتیە دیار کرن کو روسیا پرۆژێ خوە بۆ سووریا نوو رادەستی رژێما سووریێ کریە و داخوازا سیستەمێ فیدرالی بۆ کوردان کریە و ژ بەر ھندێ ژی چەند رۆژ بەری نھا بەشار ئەسەدی راگەھاند کو ئەو بەرھەڤن دستوورێ سووریێ بگوھۆرن، روسیا ژی دخوازیت ب رێیا سیستەمێ فیدرالی ل سووریێ رێگری ل ھێرشێن تورکیا بکەت، چونکو سووریا دێ وەکو وەلاتەکێ ئێکگرتی مینیت و تورکیا ژی نەشێت ھێرشی عەفرینێ یان ژی باژێرێن دی یێن کوردی بکەت، ژ بەر کو قانوونێن نێڤدوەلەتی ژی رێ نادەتە تورکیا ئاخا سووریێ ببەزینیت.
