روسیا و ئەمریکا سەبارەت ب دەولەتا کوردی رێککەڤتینە
ئەڤرۆ نیوز:
ئەندامەکێ پەرلەمانێ تورکیا سەر ب پارتیا بزاڤا نەتەوەپەرست راگەھاند کو ئەمریکا و روسیا سەبارەت ب ئاڤاکرنا دەولەتەکا کوردی رێککەڤتینە و سالەکێ بەری نھا ژی چەندین دەزگەھێن ھەوالگیریێن ئورۆپی ژی بەحسێ وێ رێککەڤتنێ کرن و تورکیا ب ئێخستنا فرۆکا روسیا وەسا کریە کو لەز د راگەھاندنا دەولەتا کوردی دا بھێتە کرن و چو ھێزەک ژی نەشێت ئاستەنگیان ل ھەمبەر ئەمریکا و روسیا دروست بکەت.
یوسف ھالاچ ئوگلۆ ئەندامێ پەرلەمانێ تورکیا سەر ب پارتیا بزاڤا نەتەوەپەرست بۆ رۆژناما رادیکال یا تورکیا دیار کر کو دەمێ ئالۆزیێن ل سووریایێ روو دایی ئەمریکا و روسیا سەبارەت ب دروست کرنا دەولەتا کوردی رێککەڤتنەک دروست کربوون. چونکو ئەمریکا و روسیا بۆ خوە ل ھەڤال و ھەڤپەیمانێن نوو دگەرن، ئەو ل گۆر بەرژەوەندیێن خوە دخوازن کو نەخشێ دەڤەرێ ژ نوو ڤە دروست بکەن و ژ بەر ھندێ ژی بۆ وان نھا ئاڤاکرنا دەولەتەکا کوردی گەلەک باشە و گۆت: (من سالەک بەری نھا نەخشێ کو ئەمریکا و روسیا دروست کرینە زانیاریێن تەمام ب رێیا ھندەک دەزگەھێن ھەوالگیریێن ئورۆپا بدەستڤە ئیناینە و من چەندین جاران ژی بزاڤ کرن کو پەرلەمانێ تورکیا سەبارەت ب وێ مەترسیێ ئاگەھدار بکەم. لێ ئەردۆگانی و حوکمەتا وی ل گۆر ھندەک بەرنامێن دوور ژ راستیێ کار دکەن و گوە نادەنە کەسێ و ژ بەر ھندێ ژی رەوشا تورکیا ب گشتی گەلەک ئالۆز بوویە و دێ ئالۆزتر ژی بیت و ب راگەھاندنا دەولەتا کوردی ل سووریایێ و عیراقێ دێ تورکیا گەلەک لاواز بیت و شاشیێن ئەردۆگانی و حوکمەتا وی وەسا کر کو چارەنڤیسێ وەلاتێ مە وەسا بیت).
ئەندامێ پەرلەمانێ تورکیا د پشکەکا دی یا ئاخڤتنا خوە دا ئەو یەک ژی دیار کریە کو ئەمریکا و روسیا تورکیایا نھا بۆ خوە وەک ئاستەنگیەک مەزن دبینن، چونکو ئەردۆگان و حوکمەتا وی نەشیاینە ل گۆر راستیا دەڤەرێ سیاسەتەکا راست برێڤە ببەن و کوردان د شەرێ ل دژی داعشێ پشتەڤانیەکا جیھانی بدەستڤە ئیناینە و دخوازن ببنە خوەدان دەولەت و روسیا و ئەمریکا ژی دبینن ب راگەھاندنا دەولەتا کوردی دێ گەلەک بەرژەوەندیێن وان ھێنە پاراستن و ژ بەر ھندێ ژی وان ل سەر ئاڤاکرنا دەولەتا کوردی ل سووریایێ و عیراقێ د ناڤبەرا خوە دا رێککەڤتنەکا نھێنی دروست کرینە و گۆت: (تورکیا ب ئێخستنا فرۆکا روسیا شاشیەک دیرۆکی کر، زیانێن ئابووری یێن وێ شاشیێ ئەز ب باوەرم دێ ل سەر تورکیا گەلەک گران بن و دێ ب ملیاردان دۆلار زیان گەھیتە وەلاتێ مە، دیارە تورکیا پشتا خوە ب ناتۆ و ئەمریکا گەرم کربوو و فرۆکا روسیا ئێخستن، لێ ئەو ژی خوەدان ژ تورکیا دەرنەکەڤتن و ناکەڤن ژی، چونکو ھەڤالینی و ھەڤپەیمانی ھەردەم دھێنە گوھۆرین و دڤێت تورکیا شاشیەکا وەسا دیرۆکی نەکربا).
یوسف ھالاچ ئوگلۆ ئەندامێ پەرلەمانێ تورکیا د دووماھیا ئاخڤتنا خوە دا نەرازیبوونا خوە ل ھەمبەر رێککەڤتنا تورکیا و ئێکەتیا ئورۆپا ژی دیار کر و راگەھاند کو دێ سێ ملیارد یورۆیان وەک ھاریکاری دەنە تورکیا، دا ب ملیۆنان پەنابەر ل تورکیا بمینن. ئەو یەک دێ تورکیا تووشی قەیرانەکا مەزن کەت، چونکو رەوشا ئابووری یا وەلاتی رۆژ ب رۆژێ خرابتر دبیت و وەرگرتنا پەنابەران دێ قەیرانا ئابووری و سیاسی یا تورکیا مەزنتر لێ کەت و ئەم نەشێین وان پەنابەران خوەدان بکەین و ئەو رێککەڤتنا حوکمەتێ کری دێ زیانێن مەزن گەھینتە وەلاتێ مە و گۆت: (ئەمریکا و ئورۆپا نھا یاریان ب تورکیا دکەن، چونکو حوکمەتێ و دەولەتا مە ھەموو کەڤتیە دەستێ مرۆڤەکێ و ئەو بریاران ددەت، ژ بەر ھندێ ژی دێ تووشی قەیرانێن نوو بین و چارەکرنا وی ژی یا ب ساناھی نابیت).
