روسیا و ئەمریکا ھەلویستێ خوە ل ھەمبەر سووریا نوو دیار دکەن
ئەڤرۆ نیوز:
جێگرێ وە‌زیرێ دە‌رڤە یێ روسیا راگەھاند کو چارە‌یا ھە‌ری گونجای بۆ پرسگرێک ئانکۆ شە‌رێ ناڤخوەیێ سووریێ بجە کرنا سیستە‌مێ فید‌رالیێ یە و سیستە‌مێ فیدرالی دێ ھە‌موو نە‌تە‌وە و باوە‌ریان د ناڤ یە‌ک دە‌ولە‌تە‌کا یە‌کگرتی دا کۆم کە‌ت و وە‌سا خوە‌یا دکە‌ت ھە‌کە فیدرالی نە‌بیت یە‌کگرتنا گە‌لان د ناڤ دە‌ولە‌تە‌کا ناڤەندی دا سەرناگریت.
سیرگێی ریابکۆڤ جێگرێ وە‌زیرێ دە‌رڤە یێ روسیا بۆ مالپە‌را سپوتنیک نیوز یا روسیا راگەھاند کو نھا ل پرانیا دە‌ڤە‌رێن سووریێ ئاگربە‌ست ب رە‌نگە‌کی ئە‌رە‌نی برێڤە دچیت و ب تنێ ل ھندە‌ک دە‌ڤە‌رێن وە‌ک حە‌لە‌ب و نێزیکی گرێ سپی تیرۆرستێن داعشێ و ئە‌لنوسرا ب رە‌نگە‌کی دژوار ھێرشی ھێزێن کوردی و رژێما سووریێ دکەن و گۆت: (ئە‌م وە‌ک روسیا دخوازین ئاگربە‌ست بگەھیتە ئە‌نجامە‌کی ئە‌رە‌نی و ب رە‌نگە‌کی سیاسی و ب قە‌بوولکرنا ھە‌موو ئالیێن ل سووریێ چارە‌کا یە‌کجاری پە‌یدا بکەین و د ڤێ مژارێ دا ئە‌م و ئەمریکا گە‌لە‌ک نێزیکی ھە‌ڤدو بووینە. نھا ل دە‌ڤە‌را عە‌زازێ و حە‌لە‌بێ کۆما تیرۆرست یا ئە‌لنوسرا ھێرشی ھێزێن کوردی دکە‌ت و ل حە‌لە‌بێ ژی شە‌رێ ل گەل داعشێ بە‌ردە‌وام دکە‌ت و ھە‌تا ب تە‌مامی داعش و ئە‌لنوسرا بھێنە ژناڤبرن ئە‌م دێ ب ھە‌موو ھێزا خوە ھە‌ڤکاریا کوردان و حوکمەتا سووریێ بکەین).
ل دۆر پاشە‌رۆژا سووریێ ژی جێگرێ وە‌زیرێ دە‌رڤە یێ روسیا راگەھاند ژی کو ل دووڤ ھزرا وان باشترین چارە‌سە‌ری و سیستە‌م بۆ پاشە‌رۆژا سووریێ سیستە‌مێ فیدرالیە و ئە‌ڤ سیستە‌م دشێت سووریێ یە‌کگرتی بھێلیت و گۆت: (د ڤێ دە‌ربارێ دا مە نە ل گەل ئەمریکا و نە ژی چو ئالیە‌کی دی رێککە‌ڤتن نە‌کریە و دێ بریارا ل سە‌ر پاشە‌رۆژا سووریێ ژ ئالیێ گەل و ئالیێن سیاسی یێن سووریێ ڤە ھێتە دان و ئە‌م دێ ھە‌ڤکاریا وان بکەین دا کو وە‌لاتێ وان جارە‌کا دی ئارام بیت).
جۆن کێربی پە‌یڤدارێ وە‌زارە‌تا دە‌رڤە یا ئەمریکا ژی راگەھاند ھە‌کە ئە‌ڤ بزاڤا وان یا ئاگربە‌ستێ سە‌رنە‌گریت دێ بەرنامەکا دی بێخنە د وارێ بجیە کرنێ دا و گۆت: (ئارمانجا مە سە‌رخستنا ئاگربە‌ستێ و چارە‌کا سیاسی یە لێ ھە‌کە ئە‌ڤ بزاڤا مە سە‌رنە‌گریت ئە‌م نەچارین رێیە‌کا دی ببینین و پرسگرێکا سووریێ چارە بکەد‌ن، لێ ھە‌تا نھا مە نە ل دۆر فید‌رالیێ نە ژی ل دۆر پارچە‌کرنا سووریێ مە ھە‌ڤدیتن ل گەل چو ئالیە‌کێ نەکرینە.
