روسیا يا بەرھەڤە بۆ شەرێ دژی تیرۆرێ ھاریکاریا کوردان بکەت
وەزیرێ دەرڤە یێ روسیا ل پەرلەمانی راگەھاند کو ئەو دێ د دەمەکی ھەری نێزیک دا دەست ب ھاریکاریێ بۆ ھەرێما کوردستانا عیراقێ و رۆژئاڤایێ کوردستانێ بکەن و راگەھاند گەلێ کورد رووبرووی ھێرشێن دژوار یێن تیرۆرستان بووینە و دڤێت د ھەر واری دا ھاریکاریێن سەربازی و مرۆڤی بگەھیننە کوردان دا کو خوە ب پارێزن و تیرۆرستان ژ ئاخا خوە دەربخینن.
ئەڤرۆ، سەرجان مەحمود:
ل پەرلەمانێ روسیا ب دەستپێشخەری و پێشنیازا پارتا دادوەریێ کۆمبوونەک تایبەت ل سەر ھێرشێن تیرۆرستان بۆ سەر ھەرێما کوردستانێ و عیراقێ و رۆژئاڤا کوردستانێ ھاتە گێران و پارتا دادوەریێ داخواز ژ ھەموو پارتێن ل پەرلەمانی کر کو ب بریارەکا مەزن پشتەڤانیێ ل کوردێن سووریێ و عیراقێ بکەن دا کو د شەرێ ل دژی رێکخستنا تیرۆرستی یا داعشێ سەرکەڤن.
پشتی پارتا دادوەریێ پێشنیازا ل سەر کوردستانێ پێشکێش کری، گەنگەشەیەکا مەزن ھاتە کرن و ب دەنگێ ھەموو پەرلەمانتارێن ل ھۆلا پەرلەمانی بریارا ھاتە داین کو د زووترین دەم دا حوکمەت دەست ب ھاریکاریا سەربازی، ئابووری و مرۆڤی بکەت و د خەباتا دبلۆماسیێ دا ژی پشتەڤانیێ ل مافێن گەلێ کورد بکەت.
د ڤێ دەربارێ دا پشتی بریارا پەرلەمانی، سیرگێی لاڤرۆڤ وەزیرێ دەرڤە یێ روسیا ل ھۆلا پەرلەمانێ د پرێس کۆنفرانسەکی دا راگەھاند کو بریارا پەرلەمانی جھێ رێزگرتنێیە و گۆت: (ئەم ژی وەک حوکمەت دەمەک درێژە ل سەر رەوشا کوردستانێ و ھێرشێن داعشێ بۆ سەر شنگال، رۆژئاڤا و کۆبانێ گەنگەشە دکەین و بریارا پەرلەمانی قۆناغا ھەڤکاریا بۆ کوردان دێ لەزتر بکەت و ب راستی دڤێت د ڤێ دەما ھەستیار دا ھەموو جیھان بۆ ژناڤبرنا تیرۆرستان ھاریکاریا کوردان بکەت).
سیرگێی لاڤرۆڤ ھەروەسا راگەھاند ژی کو وی ل ناڤەندا نەتەوێن ھەڤگرتی ل گەل بان کی مۆن کۆمبوونەک سازکریە و گۆت: (مە بۆ سکرتێرێ گشتی یێ نەتەوێن ھەڤگرتی ژی راگەھاند کو وەلاتێ مە ئامادەیە د ھەر واری دا بۆ ژناڤبرنا تیرۆرستێن داعشێ ھاریکاریێ بدەتە ھێزێن نێڤدەولەتی و کوردێن سووریێ و عیراقێ، ژ بەر کو تووشی ھێرشێن دژوار یێن تیرۆرستان دبن و د وارێ ژناڤبرنا تیرۆرستان و ھەڤکاریا بۆ کوردان ئەم و نەتەوێن ھەڤگرتی وەک ھەڤدو ھزر دکەین و دێ ھەماھەنگیەکا مەزن د ناڤبەرا مە دا ھەبیت).
وەزیرێ دەرڤە یێ روسیا د پشکەکا دی یا پرێس کۆنفرانسێ دا دیار کر کو پشتی ژناڤبرنا تیرۆرستێن ئەل نوسرە و داعشێ ئەو دشێن رەوشا سووریێ ب گشتی گەنگەشە بکەن و گۆت: (پشتی مەترسیا کۆمێن تیرۆرست ل سەر سووریێ و کوردێن رۆژئاڤا نەمینیت ئەم وی دەمی دشێین ئەنجامدانا ریفۆرمان و ئاڤاکرنا سووریەکا دیمۆکراتیک ل گەل ھێزێن نێڤدەولەتی گەنگەشە بکەین).
سیرگێی لاڤرۆڤ د ئاخڤتنا خوە دا داخوازا حوکمەتا تورکیا یا د دەربارێ ژناڤبرنا حوکمەتا سووریێ دا ژی دیار کر کو ئەو چو دەمی پشتەڤانیێ ل داخوازا دەولەتا تورکیا ناکەن و ناھێلن رژێما سووریێ ب دەستێ تیرۆرست و کۆمێن چەکدار بھێتە ھلوەشاندن و گۆت: (لێ دەمێ مەترسیا تیرۆرستان ل سەر ئاخا سووریێ و رۆژئاڤایێ کوردستانێ نەما، ئەم وی دەمی دشێین ل نەتەوێن یەکگرتی یان ل ئورۆپا چاوانیا گوھۆرینا دەستھەلاتێ ل سووریێ گەنگەشە بکەین و پێکڤە بۆ نەمانا ئالۆزیێن ل سووریێ و عیراقێ و رۆژھەلاتا ناڤین ب کار بکەین).
ل ئالیێ دی وەلید موعەلیم وەزیرێ دەرڤە یێ سووریێ ژی بۆ تەلەفزیۆنا فەرمی یا دەولەتا سووریێ راگەھاند کو وان وەک حوکمەتا سووریێ ژ نھا ڤە بەرنامەکا بەرفرەە بۆ سازکرنا ریفۆرمان ئامادە کرینە و ھەر دەمێ مەترسیا تیرۆرستان و کۆمێن چەکدار نەمینیت دێ ریفۆرمان یەک ب یەک ب کریاری بجە بکەین و گۆت: (ئەز باوەر دکەم ئێدی جیھانێ ب چاڤێن خوە دیتیە کو ل سووریێ شۆرەشا گەل نینە و ھێرشێن تیرۆرستان ھەیە و دڤێت جیھانا دەرڤە ھاریکاری و ھەماھەنگیێ ل گەل مە بکەت دا کو ئەم تیرۆرستان ژناڤ ببەین و ریفۆرمان بکەین).
