روسیا ھێزێن خوە ژ سنۆرێ ئوکرانیا ڤەکێشا
دوھی چەندین دەزگەھێن راگەھاندنا روسیا دیار کرن کو ب فەرمانا ڤیلادەمیر پۆتین سەرۆک کۆمارێ روسیا ١٨ ھزار چەکدارێن روسیا ل گەل ھژمارەکا مەزن یا چەکێن گران کو ل سەر سنۆرێ د ناڤبەرا وان و ئوکرانیا دا ھاتبوون کرن ئەو ھێز ھاتنە ڤەکێشان و ئەوە ژی د چارچۆڤێ وێ رێککەڤتنێ بوویە کو د ناڤبەرا ئوکرانیا ل گەل ھێزێن جودایخوازێن رۆژھەلاتێ وی وەلاتی بەریا نھا ھاتبوو ئیمزاکرن.
بەرپرسەکێ پایەبلند یێ روسیا ژی د ڤێ دەربارێ دا بۆ ئاژانسا رویترز ئەو ئاگاھی پشتراست کرن و دیار کر کو ئەو یەک ب فەرمانا پۆتین ھاتیە کرن و نھا چو ھێزێن مە ل سەر سنۆرێن ئوکرانیا دا نەماینە و مەرەما مە ژی ئەوە ئاگربەستا کو بەریا نھا د ناڤبەرا ھەر دو ئالیان دا ھاتیە ئیمزاکرن تێک نەچیت و ژ بەر وێ یەکێ ژی مە ھەموو ھێزێن خوە ڤەکێشاینە و ئەم چاڤەرێ وێ یەکێ دکەین کو ئوکرانیا وان سۆزێن خوە بجە بینیت کو بەریا نھا د چارچۆڤێ وێ رێککەڤتنێ دایە خەلکێ رۆژھەلاتێ ئوکرانیا.
ل ئالیێ دی پاتریک کۆکبۆرن نڤیسەرێ ناڤدارێ رۆژناما ئیندێپێندێنت ژی د بابەتەکا خوە دا ئاماژە ب وێ یەکێ کر کو روسیا دڤێت خوە وەک ئالیێ سەرەکی یێ چارەکرنا قەیرانا ئوکرانیا نیشا بدەت و ژ بەر وێ یەکێ ژی پۆتین فەرمانا ڤەکێشانا وان ھێزێن ل سەر سنۆری دایە و ئەز باوەرم ھێشتا ھندەک ھێزێن رۆسیا ل سەر سنۆری مابن، لێ پۆتین بزاڤەکا مەزن دکەت دا ھەم کاریگەریا خوە یا جاران ل سەر ئوکرانیا بھێلیت و ئەم ژی ب رێیا وێ پرۆژێ رۆژھەلاتێ ئوکرانیا بکەتە ژێر کاریگەریا خوە و ب وی رەنگی ژی بزاڤێ بکەت کو حوکمەتا ناڤەندی یا ئوکرانیا لاواز بکەت و ژ بەر وێ یەکێ ژی ئەو ھێز نھا ھاتینە ڤەکێشان و ھەر چاوا بیت ئەو یەک دێ خزمەتا ئارامیێ ل وێ دەڤەرێ کەت دا رێگری ل رێتنا خوینا وەلاتیان بھێتە کرن.
به‌رهه‌ڤكرن، هۆشه‌نگ تاجر:
