روفاتێن 10 قوربانیێن کۆچا ملیۆنی بۆ زێدێ وان دێ هێنە ڤەگـەڕاندن
ئامێدیێ، مەحمود نهێلی
ژ بۆ مەرەما بەفرەهکرنا دەرگەهێ سەرزێری یێ نیڤ دەولەتێ ژلایێ حکۆمەتا تورکیا ڤە و پشتی دەست ب چێکرنا ئاڤاهیەکێ هاتیە کرن هەژمارەکا گۆرێن کوچا ملیونی یێن سالا 1991 هاتنە دیتن و پشتی حکۆمەتا هەرێمێ هاتیە ئاگەهدارکرن ئێکسەر تیمێن وەزارەتا شەهید و ئەنفالکریان قەستا وی جهی کرن و دەست ب رێکارێن ڤەگۆهاستنا وان گۆران هاتە کرن.
د ناڤسەر نوری بریکارێ وەزارەتا شەهید و ئەنفالکریان یا حکۆمەتا هەرێما کوردستانێ دیار کر، ئەو ل گەل ئیدارەیا پارێزگەها دهوکێ ولقێ هەژدەیێ پارتی ل ڤێرێ بەرهەڤبوونە ژبۆ وێ یەکێ دەست ب رێکاران بهێتە کرن ژ بۆ ڤەگۆهاستنا رۆفاتێن هەژمارەکا شەهیدێن کوچا ملیونی یا سالا 1991 ێ یێن گۆرێن وان هاتیە دیتن دەمێ چێکرنا ئاڤاهیەکی ژلایێ حکۆمەتا تورکیا ڤە.
و گۆت : پشتی رێکار ل ڤێرێ ب داوی دهێن ئەڤ رۆفاتە دێ هێنە ڤەگۆهاستن بۆ نوشدارییا داد ل دهوکێ و دێ سومپل لێ هێنە وەرگرتن و پاشان دێ د رێ و رەسمەکێ دا ل کەلها نزارکێ هێنە ڤەشارتن.
ناڤهاتی گۆت : ل ڤێرێ ب سوپاسی ڤە کاگێرییا پارێزگەها دهوکێ و دەڤەردارییا چەلێ و لقێ هەژدە یێ پارتی و دەرگەهێ سەرزێری هەردولایان ڤە گەلەک هاریکار بووینە دگەل مە دا و ئاشکرا کر، دەست ب رێکاران هاتیە کرن و گۆر هاتینە ڤەکرن و سێ ژ وانا زارۆک بوونە و ب جل و بەرگ ڤە هاتینە ڤەشارتن و بتنێ ئێک یێ دیارە و ناڤێ وی یێ ل سەر، و گۆت : ئەڤێن دیتر پشتی سومپل لێ دێ هێنە وەرگرتن ئەڤ خەلکێ هزر دکەن کەس و کارێن وان ل وێ نزیکی هاتینە ڤەشارتن دشێن سوپملێن وان ژی بهێنە وەرگرتن بۆ وێ یەکێ کەس و کارێن وان بهێنە ناسکرن.
ناڤهاتی تەکز کر، کو ل هەر جهەکێ گورێن شەهیدان لێ هەبن ئەو کێمترخەمیێ ناکەن و یا پێدڤی دێ هێتە کرن بۆ ڤەگۆهاستنا گۆرێن وان و ئاشکرا کر، سێ گۆرستانێن باکورێ کوردستانێ ل کەمپێن موشێ و دیاربەکر و مێردینێ ل سەر داخازیا کەس وکارێن وان دێ هێنە نووژەنکرن.
ژلایێ خوەڤە بەهرام عریف یاسین بەرپرسێ لقێ 18 یێ پارتی دیار کر، ئەڤ یەکە ل سەر برۆسکەیەکا لژنا ناوچا کانی ماسێ بوویە کو حکۆمەتا تورکیا بریاردایە دەرگەهێ سەرزێری فرە بکەت و بەشەک ژ وان گۆران دکەڤنە بەر پرۆژەیێن وان و ئەڤ گۆرە یێن قوربانێن کوچا ملیونی بووینە و ئەو بووینە یێن دەسهەلاتا رژێما بەعس قەبوول نەکری و دەبەدەر بووین و ئاشکرا کر، هەر ئەڤ کوچا ملیونی بوویە بوویە ئەگەرێ پاراستنا هەرێمێ و دەستکەفتێن ئەڤرۆ.
