رویترز: کورد دێ زووتر ژ ھەر ھەرێمەکا دی ببنە خوەدان دەولەت
ئەڤرۆ:
ئاژانسا رویترز دوھی د راپۆرتەکێ دا دیار کر کو سەرەدانا سەرۆکێ ھەرێما کوردستانێ یا بۆ ئەلمانیا و پێشەوازیا کو لێ ھاتە کرن نیشا ددەت کو ئەلمانیا وەک دەولەتەک ئێدی سەرەدەریێ ل گەل وێ ھەرێما کوردی دکەت و ھەلویستێ فرەنسا ژی وەک یێ ئەلمانیە، چونکو نھا ل جیھانێ گەلەک ھەرێم ھەنە لێ ئەو گرنگیا کو نھا بۆ ھەرێما کوردستانێ دھێتە دان بۆ چو دەڤەرەکێ دی ناھێتە دان و ژ بەر ڤێ یەکێ ژی کورد دێ زووتر ژ ھەر ھەرێمەکا دی ل جیھانێ دەولەتا خوە راگەھینن و یا نھا فرەنسا و ئەلمانیا دکەن ب رەنگەکێ دانپێدانا وانە ب دەولەتا کوردی.
ئاژانسا رویترز یا نووچەیان راپۆرتەک سەبارەت ب رەوشا کوردستانێ و بزاڤێن دبلۆماسی یێن سەرۆکێ ھەرێما کوردستانێ بەلاڤ کر و د راپۆرتێ دا ئاماژە ب ڤێ یەکێ ھاتیە کرن کو سەرکەڤتنا ھێزێن پێشمەرگە ل ھەمبەر رێکخراوا تیرۆرستی یا داعش وەسا کر کو جارەکا دی ھەرێما کوردستانێ ببیتە جھێ سەرەنجا جیھانێ و ڤەخواندنا سەرۆکێ ھەرێما کوردستانێ یا بۆ کۆنفرانسێ میونخ و ئەو گرنگیا کو ژ ئالیێ وەلاتێن ئورۆپا ب تایبەتی ژی ئەلمانیا و فرەنسا ب ھەرێما کوردستانێ دھێتە دان نیشا ددەت کو ئێدی وەک دەولەتەک سەربخوە سەرەدەری ل گەل کوردان دھێتە کرن و بێگومان شەرێ ل دژی تیرۆرێ وەسا کر کو پشتەڤانیا جیھانی یا بۆ ھەرێما کوردستانێ زێدەتر ژ جاران بیت و ژ بەر ڤێ یەکێ ژی نھا ھەرێما کوردستانێ زووتر ژ ھەموو ھەرێمێن دی ل جیھانێ دشێت دەولەتا خوە راگەھینیت.
د بەردەوامیا راپۆرتێ دا ھاتیە دیار کرن کو سەرەرای دژبەریا تورکیا و گەلەک وەلاتێن ھەرێما رۆژھەلاتا ناڤین ئەڤرۆکە فرەنسا و ئەلمانیا چەکی ددەنە کوردان و ب رەنگەکێ ئاشکرا ژی وی کاری دکەن و دێ پتر ژی ھاریکاریا کوردان بکەن، چونکو د راستی دا ئەڤرۆکە عیراق د پراکتیکێ دا پارچە بوویە و وەلاتێن ئورۆپا ژی وێ راستیێ باش دبینن و بۆ وان دیار بوویە کو کورد دێ بۆ ئورۆپا ھەڤپەیمانێن گەلەک باش بن، لێ نھا ھەرێما کوردستانێ ل ژێر گەفا تیرۆرا داعشێ دایە و پێدڤی ب ھاریکاریا وەلاتێن زلھێز ھەیە و ئەلمانیا و فرەنسا ژی دخوازن نھا ھاریکاریا کوردان بکەن دا کو د رۆژھەلاتا ناڤین یا نوو دا بشێن ببنە ھەڤپەیمانێن باش بۆ کوردان و بێگومان ئەو دزانن ب رێیا کوردان دێ بشێن بەرژەوەندیێن خوە باش ب پارێزن و د دەمێن بۆری دا ئەو یەک بۆ وان باش دیار بوویە.
د دووماھیا راپۆرتێ دا ئاماژە ب ڤێ یەکێ ھاتیە کرن کو ئەڤرۆکە کوردستان دەڤەرەکە کو تێدا پێکڤەژیانا ھەموو نەتەوان و ئایینێن جودا ھەیە و ئەوە بۆ ئورۆپیان گەلەک گرنگە، چونکو ھەرێما کوردستانێ نھا وەک ناڤەندەکا نوو یا گەشەپێدانا ئازادی و دیموکراسیێ دھێتە دیتن و ھەکە ھاریکاریا وێ دەڤەرێ نەھێتە کرن دێ زیانێن مەزن گەھیتە بەرژەوەندیێن ئورۆپا و ژ بەر ڤێ یەکێ ژی دیتنا ئورۆپا و ئەمریکا بۆ ھەرێما کوردستانێ تا رادیەکێ ژ ھەڤدو جودایە و کورد ژی دخوازن ل ھەمبەر خەمساریا نھا یا ئەمریکا وەلاتێن ئورۆپا ب تایبەتی ژی فرەنسا و ئەلمانیا پتر ھاریکاریا وان بکەن.
