رۆحانی: ئەمریکا نەشێت ب سزایێن ئابووری سیستەمێ ئیرانێ بگوھۆڕیت
ئەڤرۆ نيوز:
حەسەن رۆحانی سەرۆک کۆمارێ ئیرانێ راگەھاند کو ئارمانجا سەرەکی یا سەپاندنا سزایێن ئابووری یێن ئەمریکا ل سەر ئیرانێ بۆ ھندێ یە کو دەستھەلاتا مە بگوھۆڕیت، لێ ئاشکرایە کو گەلێ ئیرانێ ب چو رەنگەکێ رازی نابیت ئەمریکا دەستێوەردانێ د کاروبارێن ناڤخوەیی یێن وەلاتێ مە بکەت، ژ بەر ھندێ ژی ئەمریکا نەشێت ب سزادانێ مە نەچار بکەت دا داخوازیێن وێ قەبوول کەین و گۆت: (بەری نھا مە رێککەفتنا ئەتۆمی ل گەل ئەمریکا ئیمزا کر، لێ ھەر دیسان ئەمریکا ل سەر سۆزا خوە نەما و خوە ژ رێککەفتنێ ڤەکێشا، نھا ژی ب رێیا ھندەک بەھانێن دی دخوازن ئالۆزیان بۆ مە دروست بکەن، سیاسەتا ئەمریکا ژ بۆ گەلێ مە ئاشکرایە و دڤێت بەرپرسێن ئەمریکا باش بزانن ب سزادانێ نەشێن ئیرادا مە ژناڤ ببەن).
رۆحانی ئەو یەک ژی دیار کر کو د دیرۆکا ئەمریکا دا ھەتا نھا چو دەستھەلاتەکا وی وەلاتی وەکو ترامپی دوژمناتیا مە نەکریە، ترامپ ب ھەموو ھێزا خوە و ل گەل وەلاتێن دی یێن ھەرێمێ دخوازن ئیرانێ ژناڤ ببەن و یا ژ دەستێ وان دھێت دکەن و گۆت: (براستی ژی ئەڤرۆکە گەفێن مەزن ل مە دکەن، لێ مە ھەتا نھا ل ھەمبەر گەفێن وان بەرخوەدانەکا مەزن یا کری و دێ بەردەوام بین).
سەرۆک کۆمارێ ئیرانێ ل دۆر گەرا نوو یا سزایێن ئەمریکا کو دێ ل ٤ مەھا داھاتی ل سەر ئیرانێ ھێنە سەپاندن ژی دیار کر کو مە بەرنامێ خوە یێ ھەی و ب پشتەڤانیا خودێ مەزن و گەلێ ئیرانێ ئەم دێ شێین ڤێ قۆناغێ ژی دەرباز کەین، ئەم کار دکەین ڤان رۆژێن نەخوەش زوو دەرباز کەین.