رۆحانی ل ئورمیێ تشتەک و ل مھابادێ تشتەکێ دی گۆت
ئەڤرۆ نیوز:
حەسەن روحانی سەرۆک کۆمارێ ئیرانێ د سەرەدانەکێ دا گەھشتە پارێزگەھا ئورمیێ و د کۆمبوونەکا جەماوەری دا بێی کو بەحسێ کوردان بکەت راگەھاند ئورمیە جھێ پێکڤەژیانا ئازەری و فارسان و بیروباوەریێن جودا بوویە و دڤێت ئەو پێکڤەژیانە ب ھێزتر لێ بھێت، لێ روحانی د ئاخڤتنا خوە دا بەحسێ کوردان نەکر و راگەھاند کو ڤێرێ ئازەربەیجان رۆژئاڤایە و خەلکێ وێ ژی پشکداریەکا باش د ھەلبژارتنان دا کرن و دلسۆزیا خوە بۆ کۆمارا ئیسلامی یا ئیرانێ دیار کرن.
پشتی سەرەدانا خوە یا ئورمیێ دوھی حەسەن روحانی گەھشتە مھابادێ و د ئاخڤتنەکێ دا دیار کر کو وان ھەولێر و بەغدا ژ داعشێ پاراستیە و گۆت: (ئەڤرۆکە رەوشا کوردان ل ئیرانێ ژ کوردێن عیراقێ، تورکیا و سووریایێ باشترە و مە شیایە ئارامی و ئێمناھیێ بۆ کوردان دابین بکەین، ل ئیرانێ چو جوداھیەک د ناڤبەرا کورد، فارس و ئازەریان نینە، چونکو ئەم ھەموو ئیرانی نە و موسولمانین و شانازیێ دکەین کو ل ئیرانێ پێکڤە دژین).
چاڤدێرێن سیاسی یێن رۆژھەلاتێ کوردستانێ ژی دیار دکەن کو داخۆیانیێن روحانی ل ئورمیێ و مھابادێ ژێک جودا بوون و ئاشکرایە کو روحانی ئورمیێ وەک باژێرێ کوردان نابینیت و ئەو سیاسەتە دێ وەسا کەت کو ناکۆکیێن د ناڤبەرا کورد و ئازەریان دا بەرفرەھتر بیت و ئەو یەک خزمەتا پێکڤەژیانێ ناکەت.
