رۆسيا پرۆژه‌ك بۆ راوه‌ستاندنا پشته‌ڤانيا دارايا داعش پێشكێشى جڤاتا ئاسايشێ كريه
ئه‌ڤرۆ نيوز:
نوونه‌رێ به‌رده‌وامێ رۆسيا ل نه‌ته‌وێن ئێكگرتى ڤيتالى تشوركين راگه‌هاند كو وه‌لاتێ وى ب ره‌نگێ فه‌رمى پرۆژه‌ك پێشكێشى جڤاتا ئاسايشا نێڤده‌وله‌تى كريه بۆ بڕينا پشته‌ڤانيا دارايى يا داعش كو نه‌شێت بگه‌هيته ئه‌و پارێ هه‌يى.
تشوركين گه‌شبينيا خوه نيشا دا كو جڤاتا ئاسايشێ ڤى پرۆژه‌يى ل 10 شياتا ئه‌ڤ ساله په‌سه‌ند بكه‌ت و گۆت: “من ب فه‌رمى پرۆژێ ئاريشا بازرگانى يا ل گه‌ل گرۆپێن تيرۆرستى ل سوريا و عيراقێ دايه جڤاتا ئاسايشا نێڤده‌وله‌تى”.
گۆتژى: “هيڤى خوازين كو پشته‌ڤانيا ڤى پرۆژه‌يى د جه‌ژنا دبلۆماسى يا ئه‌م ل رۆسيا ل 10 شياتێ دكه‌ين بهێته كرن و گه‌له‌ك ژ هه‌ڤالێن من دبێژن كو دشيان دايه ئه‌ڤه بهێته كرن”.
ئاماژه ب وێ چه‌ندێ ژى كر كو دێ دانوستاندنێن كه‌سانێن شاره‌زا ل سه‌ر پرۆژه‌يى هێنه كرن و گۆت: “مه گه‌له‌ك يا ل سه‌ر پرۆژه‌يى كار كرى و بۆچوونا گه‌له‌ك لايه‌نان بۆ سه‌ركه‌فتنا وى پرۆژه‌يى يا وه‌رگرتى”.
رۆسيا به‌رى نوكه پرۆژه‌ك ل سه‌ر ئه‌ندامێن جڤاتا ئاسايشا نێڤده‌وله‌تى به‌لاڤكريه ل سه‌ر وێ چه‌ندێ يه كو رێ ب تيرۆرستان نه‌ده‌ن بگه‌هنه داهاتێن خوه و بازرگانيێ بكه‌ن ب تايبه‌ت يا په‌ترۆلێ.
