رۆژا ده‌ستپێكرنا هه‌وا هه‌لبژارتنان هاته دياركرن
ئه‌ڤرۆنيوز:
به‌رپرسه‌كێ كۆمسيۆنا بلند يا سه‌ربخوه يا هه‌لبژارتنان ل عيراقێ ئاشكرا دكه‌ت كو ب شێوه‌كێ ده‌ستپێكێ رێككه‌فتن يا هاتيه كرن ل سه‌ر ژڤانێ ده‌ستپێكرنا هه‌وا هه‌لبژارتنان بۆ هه‌لبژارتنێن جڤاتا نوونه‌رێن عيراقێ.
عه‌لى قادر، رێڤه‌به‌رێ ئۆفيسا هه‌ولێرێ يا كۆمسيۆنا بلند يا هه‌لبژارتنان ل عيراقێ، ئه‌ڤرۆ دوشه‌مبى 26/2/2018، راگه‌هاند” ده‌ستپێكا هه‌وا هه‌لبژارتنان دێ ل 14 نيسانا 2018 ده‌ستپێكه‌ت وهه‌تا 24 ده‌مژمێران به‌رى ده‌ستپێكرنا هه‌لبژارتنان دێ به‌رده‌وامبيت”.
رێڤه‌به‌رێ ئۆفيسا هه‌ولێرێ يا كۆمسيۆنا هه‌لبژارتنان دياركر كو ئه‌و ژڤانه ب شێوه‌كێ ده‌مكى يێ هاتيه دياركرن، به‌لێ هێشتا نه‌بوويه بريارا دووماهيێ.
هه‌لبژارتنێن جڤاتا نوونه‌رێن عيراقێ دێ ل رۆژا شه‌مبيێ 12/5/2018 هێنه ئه‌نجامدان كو شه‌ش هزار كه‌سان ل سه‌رانسه‌رى عيراقێ يا خوه به‌ربژاركرى بۆ بده‌ستڤه‌ئينانا 329 كورسيێن جڤاتا نوونه‌ران.
