رۆژناما واشنتۆن پۆست: داعشێ دەست ب بازرگانیا مادێن بێھوشکەر کریە
رۆژناما واشنتۆن پۆست د راپۆرتەکێ دا ئاماژە ب ڤێ یەکێ کریە کو پشتی گەلەک بیرێن نەفتێ یێن داعشێ ژ ئالیێ فرۆکێن شەری یێن ھێزێن ھەڤپەیمان ھاتنە ژناڤبرن نھا داعشێ دەست ب بازرگانی کرنا ب مادێن بێھوشکەر کریە و گەلەک بازرگانێن مادێن بێھوشکەر نھا د ناڤ داعشێ دا کار دکەن و ئەڤە ژی نیشا ددەت کو داعش بەر ب نەمانێ ڤە دچیت و ئەمریکا ھێشتا کوشتنا سەرۆکێ داعشێ پشتراست نەکریە.
ئەڤرۆ، ھۆشەنگ:
رۆژناما واشنتۆن پۆست دا راپۆرتەکێ دا ئاماژە ب ڤێ یەکێ دکەت کو پرانیا بیرێن نەفتێ یێن کو ل عیراق و سووریێ داعشێ بکار دئینان ژ ئالیێ فرۆکێن شەری یێن ھێزێن ھەڤپەیمان ھاتنە ژناڤبرن و ھەری دووماھیێ ژی باژێرکێ بیجی ژ ئالیێ ھێزێن عیراقێ ڤە ھاتە کۆنترۆل کرن و ژ بەر ڤێ یەکێ ژی دربەک گەلەک مەزن ل داعشێ کەڤت و ژێرخانا وێ یا ئابووری ژناڤ چوو و ژ بەر ڤێ یەکێ ژی نھا داعشێ دەست ب کارێ بازرگانی کرن ب مادێن بێھوشکەر کریە و کەسەکێ ب ناڤێ ئەبو عەبدوللا کو بەرێ د ناڤ رێزێن داعشێ دا بوویە و نھا رەڤیە دیار دکەت کو کەسەکێ مسری یێ ب ناڤێ ئەبو جەمال کو ب سالان ل ئورۆپا ژیایە و کارێ بازرگانی ب مادێن بێھوشکەر کریە نھا بۆ داعشێ کار دکەت و داعشێ دڤێت ب ڤی رەنگی پارە بۆ خوە کۆم بکەت.
د بەردەوامیا راپۆرتێ دا ھاتیە کو ئەمریکا ھەر دەستپێکێ کار ل سەر ڤێ یەکێ دکر کو ژێدەرێن ئابووری یێن داعشێ ژناڤ ببەت و نھا مرۆڤ دشێت بێژیت کو ئەمریکا تا رادەیەکێ شیایە سەرکەڤتی بیت، لێ نھا ژی داعشێ دەست ب بازرگانی کرنا ب مادێ بێھوشکەر کریە و دڤێت ھەموو وەلاتێن جیھانێ دەست ب پێرابوونێن مەزن بکەن دا کو نەھێلن داعش بگەھیتە ئارمانجا خوە.
ل ئالیێ دی رۆژناما تلگراف یا بریتانی ژی د راپۆرتەکێ دا بەحسێ ڤێ یەکێ دکەت کو گەلەک بەلگە ل بەر دەستێ وان ھەنە کو پشتی بیرێن نەفتێ ھاتنە ژناڤبرن داعش دڤێت ب رێیا بازرگانی کرن ب مادێن بێھوشکەر پارە کۆم بکەت، چونکو داعشێ گەلەک بزاڤ کرن کو ل مووسل و باژارێن دی یێن عیراقێ پارە ژ خەلکێ وەربگریت لێ ژ بەر کو ئەو جھێن د دەستێ داعشێ داینە د بیاڤێ ئابووری دا گەلەک لاواز بووینە و ژ بەر ڤێ یەکێ ژی داعش ل رێیێن دی دگەریت دا بشێت پارە بۆ چەکدارێن خوە کۆم بکەت.
د بەردەوامیا راپۆرتێ دا ھاتیە کو داعشێ بەرێ پارەیەک گەلەک باش ددا چەکدارێن خوە و ژ بەر ڤێ یەکێ ژی ھژمارەک زێدە ژ گەنجێن بێکار ل سووریێ و عیراقێ بەرێ خوە ددانە ناڤ رێزێن داعشێ لێ نھا ئابووریا داعشێ تێک چوویە و گەلەک کەس ژی درەڤن و ژ بەر ڤێ یەکێ ژی داعشێ دڤێت ب ھەر رێیەکێ بیت پارە کۆم بکەت.
د دووماھیا راپۆرتێ دا ھاتیە کو گەلەک دەزگەھێن ھەوالگێری ئاماژە کوشتنا ئەبوبەکر بەغدادی سەرۆکێ رێکخراوا تیرۆرستی یا داعشێ دکەن، لێ ھەتا نھا ژی بەرپرسێن ئەمریکا ئەو یەک پشتراست نەکرینە و بەرپرسێن عیراقێ ژی ئاماژە ب برینداربوونا وی دکەن، لێ راستیەک ھەیە کو بەغدادی یان بریندار بوویە یان ژی ھاتیە کوشتن و رەنگە د رۆژێن داھاتی دا ئەو یەک بھێتە ئاشکرا کرن.
