رۆژنامه‌كا ئه‌مریكی ئه‌گه‌رێن نهێنی یێن هێرشا ل سه‌ر عه‌فرینێ ئاشكرا دكه‌ت
ئه‌ڤرۆ نيوز، ئه‌یاد به‌رواری:
رۆژناما (وول ستریت جورنال) یا ئه‌مریكی بابه‌ته‌ك د بن ناڤونیشانێ (ل پشت لڤینێن توركیا ل سووریێ، ترس ژ كاریگه‌ری و ڤه‌گه‌ریان بۆ پاشڤه) به‌لاڤكریه و تێدا هاتیه، ئه‌نقه‌ره یا نیگه‌رانه ژ كوردێن سووریێ هه‌ڤپه‌یمانێن ئه‌مریكا، ژ به‌رفره‌هبوونا ده‌ستهه‌لاتا وان ل سه‌ر سنورێ توركیا و بێده‌نگیا روسیا و ئیرانێ هه‌ڤپه‌یمانێن به‌شار ئه‌سه‌دی ل به‌رامبه‌ری وان، هه‌ڤده‌م توندره‌وێن سووری ئه‌وێن هه‌ڤپه‌یمانێن توركیا پشكه‌كا مه‌زن ژ ده‌ڤه‌رێن دبن كونترۆلا وان دا ل باكوورێ رۆژئاڤایێ سووریێ ل حه‌له‌بێ و ئیدلبێ ژده‌ستدایه).
رۆژنامێ دیاركریه كو سه‌رۆكێ توركیا ئه‌ردۆگان هه‌ست ب نیگه‌رانیه‌كا مه‌زن دكه‌ت ب تایبه‌تی دژی هێزێن كوردی ل سووریێ كو ب ( یه‌كینه‌یێن پاراستنا گه‌ل) د ناڤدارن و ئه‌نقه‌ره ب تیرۆرست دهه‌ژمێریت، دوپاتی ل وێ چه‌ندێ ژی دكه‌ت كو ب تمامی رێ ل دروستكرنا ده‌ستهه‌لاته‌كا نیمچه سه‌ربخوه و نیمچه ده‌وله‌ت ل باكوورێ سووریێ دگریت، ب ڤێ چه‌ندێ ژی پشته‌ڤانیا نه‌ته‌وه‌په‌رستێن دناڤ توركیا دا ب تمامی بده‌ستڤه‌ئینایه، له‌وما بێ دودلی هێرشا ل سه‌ر عه‌فرینێ ده‌ستپێكر بۆ ده‌ركرنا هێزێن كوردی و گه‌فێن چوونا دناڤ باژێرێ منبجێ ژی دكه‌ت پشتی داگیركرنا عه‌فرینێ كو هیزێن ئه‌مریكی و كوردی هه‌بوون ل منبجێ هه‌یه.
رۆژناما ئه‌مریكی هه‌روه‌سا دیار دكه‌ت گه‌فێن توركیا ل سه‌ر ئه‌مریكا ل منبجێ د ده‌مه‌كی دایه كۆمبوونێن قۆلپا باكوورێ ئه‌تله‌سی (ناتۆ) د به‌رده‌وامن و ل چه‌ند رۆژێن بۆری وه‌زیرێ ده‌رڤه یێ ئه‌مریكا ریكس تیله‌رسۆن گه‌هشته ئه‌نقه‌ره و ل گه‌ل ئه‌ردۆگانی كۆمبوو و هه‌ر دو ئالیان دوپاتی ل وێ چه‌ندێ كر كو پێكڤه كار بكه‌ن بۆ نه‌هێلانا ناكۆكی و گرژیان ل دۆر پرسا سووریێ، نوكه ژی ل سه‌رانسه‌ری جیهانێ چو وه‌لات وه‌كو سووریێ ئالۆزی تێدا نینن، هه‌ر ئێك ژ ئه‌مریكا، توركیا، ئیسرائیل، ئیران و روسیا هه‌بوونا له‌شكری ل سووریێ یا هه‌ی و به‌رژه‌وه‌ندیێن مه‌زن ژی ب وی وه‌لاتی ڤه گرێدده‌ن، توركیا ل 2011 پشتی ده‌ستپێكرنا ئالۆزیێن دناڤ سووریێ دا، ب پێدانا چه‌كی و مه‌شقكرنا به‌هنگارێن رژێما ئه‌سه‌دی و ب ئارمانجا ژناڤبرنا به‌شار ئه‌سه‌دی، پشته‌ڤانیا له‌شكرێ ئازاد كر، به‌لێ ئارمانجا خوه ب ده‌ستڤه نه‌ئینا، به‌لكو ئه‌و وه‌لات بۆ مه‌یدانا شه‌ره‌كێ خووناوی كو زلهیزێن جیهانی بۆ حه‌زێن خوه هه‌ر رۆژ ب جۆره‌كی به‌رده‌وامیێ ب شه‌ری دده‌ن.
رۆژناما ئه‌مریكی هه‌روه‌سا دیار دكه‌ت ژی كو دناڤ وان هه‌موو ناكۆكیێن ل سووریێ و وه‌لاتێن ل سووریێ هه‌بوون هه‌ی، ناكۆكیێن د ناڤبه‌را ئه‌مریكا و توركیا دا كو دو زلهیزترین وه‌لاتێن دناڤ هه‌ڤپه‌یمانیا ناتۆیێ دا، جهێ سه‌رنجێ یه، ب تایبه‌تی پشتی هێرشا ل سه‌ر عه‌فرینێ و گه‌فێن توركیا بۆ ده‌ست ب سه‌رداگرتنا منبجێ.
ل دۆر بابه‌تی سینان ئۆلجه‌ن دبلوماتكارێ به‌رێ یێ توركی دبێژیت ” ل گه‌ل ئه‌مریكا یا گه‌هشتیه ئاسته‌كی كو چو ده‌مه‌كی د دیرۆكا په‌یوه‌ندیێن هه‌ردو وه‌لاتان دا، ئه‌و په‌یوه‌ندیه ب ڤی شێوه‌ی دلاواز و شكه‌ستی نه‌بووینه”. به‌لاڤكر ژی كو ئه‌وا ل پشت هێرشا عه‌فرینێ ژلایێ توركیا ڤه، ژبلی بده‌ستڤه‌ئینانا پێگه‌هێ نوو و برنا ته‌نگه‌ژی بۆ ده‌رڤه‌ی توركیا، هه‌ڤده‌م ب تمامی تورك ژی ل ده‌وروبه‌رێن ئه‌ردۆگانی كۆمكرینه كو به‌ر ب هه‌لبژارتنێن 2019 دچیت، ل دووڤ راپرسیه‌كا ( ئۆرك ئاراستیرما) رێژه‌یا 80.7% ژ وه‌لاتیێن تورك ل گه‌ل هێرشا توركیا نه ل سه‌ر عه‌فرینێ و ب تمامی پشته‌ڤانیێ لێ دكه‌ن.
سینان ئۆلجن هه‌روه‌سا دبێژیت هه‌كه مه بڤێت ل گه‌ل ئه‌مریكا ل سه‌ر پرسا كوردی دانوستاندنان ژی بكه‌ین، ئه‌ردۆگان دێ به‌رده‌وام بیت ل هێرشا ل سه‌ر عه‌فرینێ، چونكی ئه‌و په‌یاما سیاسی كاریگه‌ریه‌كا مه‌زن ل سه‌ر جه‌ماوه‌رێ توركیا كریه، له‌وما توركیا ئه‌و هه‌وه یا ده‌ستپێكری و ژ ده‌هان ره‌هه‌ندان دێ مفای ژێ بینیت و ب چو شێوه‌كی ده‌ستبه‌رداری نابیت”.
